Nadisenio Kadi?

Ti Dila ti Hummingbird

● Ad-adalen dagiti managsirarak ti nagbabassit a kapaset ti dara, DNA, ken dadduma pay a substansia iti rabaw ti sarming a kadkadakkel ti dakulapmo. Tapno masusop ken mayakar dagita a babassit a tedted ti likido, agus-usarda kadagiti instrumento ngem saan unay nga epektibo dagita. Adda ngata nasaysayaat a pamay-an? Sigun ken Dr. John Bush iti Massachusetts Institute of Technology, “nasolbar daytan ti nakaparsuaan.”

Usigem: Saan a nasken nga agpakarigat pay ti hummingbird a mangsusop iti nektar ti sabong. Us-usarenna ngamin ti natural a mamagdedekket a puersa a mangsumra iti grabidad ken mamagtimbukel iti danum iti rabaw ti aniaman a patad. No madilpatanna ti nektar, ti rabaw ti likido ti mamaglukot iti dilana ket agbalin dayta a kasla bassit nga straw. Agpangato met no kuan ti nektar. Kaipapanan dayta a saan unay a mabannog ti hummingbird ta agpangato lattan a bukbukod ti nektar iti “straw” agingga iti ngiwatna. No mangmangan dagiti hummingbird, ti dilada ket mapno iti nektar iti aginggat’ mamin-20 a daras kada segundo!

Saan la a dagiti hummingbird ti addaan iti dila nga aglukot a kasla straw no uminumda. Kasta met ti ar-aramiden ti dadduma a tumatayab nga agnanaed iti igid ti baybay. Kastoy ti kinuna ni Propesor Mark Denny iti Stanford University idiay California, U.S.A. maipapan iti dayta nga abilidad: “Nagsayaat ti resulta ti panagtitipon ti inhenieria, pisika, ken matematika . . . No ibagam iti inheniero ken matematiko a mangdisenioda iti pamay-an tapno makainum ti billit, dida la ketdi mapanunot dayta.”

Ania ti makunam? Naiparna la kadi ti nagbassit a dila ti hummingbird a napartak ken naannayas nga agurnong iti nektar? Wenno nadisenio dayta?

[Picture Credit Line iti panid 23]

© Richard Mittleman/Gon2Foto/Alamy