“Napadakkelak nga Ateista”

NI Propesor František Vyskočil iti Charles University idiay Prague ket nalatak iti adu a pagilian gapu iti panagsirarakna iti neurophysiology. Ateista idi ngem natibker itan ti panamatina iti Dios. Idi ininterbiu ti Agriingkayo!, inlawlawag ni Propesor Vyskočil no apay a binaliwanna ti pammatina.

Sakbay a simrekkayo iti tay-ak ti siensia, ania ti panangmatmatyo iti relihion?

Napadakkelak nga ateista, ken masansan a pagang-angawan ni tatangko dagiti panguluen ti relihion. Biology ken chemistry ti kursok ket nagturposak iti kolehio idi 1963. Bayat ti panageskuelak, namatiak a rimsua ti nadumaduma a banag gapu iti ebolusion.

Ibagayo man biit kadakami ti maipapan iti trabahoyo iti siensia.

Kalpasan a naturposko ti degree iti kinadoktor, inadalko dagiti kemikal ken elektrikal a panagandar dagiti nerve synapse. Inadalko met dagiti neuron, membrane pump, transplantation, ken desensitization. Adu kadagiti resulta ti panagadalko ti naipablaak, ken dadduma kadagiti artikulo ket napili kas pagreperensiaan. Idi agangay, nagbalinak a miembro ti Learned Society of the Czech Republic, maysa a gunglo dagiti sientista a pinili dagiti padada nga eksperto iti siensia. Kalpasan ti “Velvet Revolution” idi Nobiembre-Disiembre 1989, nagbalinak a propesor idiay Charles University. Pinalubosandak a mapan kadagiti pagilian a saan a Komunista tapno maam-ammok dagiti padak a sientista a premiado iti Nobel Prize ti dadduma kadakuada.

Napampanunotyo kadi idin ti maipapan iti Dios?

No an-anagen, wen. Pasaray agsidsiddaawak idi no apay nga adu kadagiti edukado a pakairamanan ti dadduma a propesorko ket mamati iti Dios—nupay dida unay ipadlaw gapu iti Komunista a turay. Ngem para kaniak, ti Dios ket inimbento laeng ti tao. Kagurak met idi ti dakes nga ar-aramid dagiti relihion.

Apay a nagbalbaliw ti panangmatmatyo iti ebolusion?

Nangrugiak nga agduadua iti ebolusion idi ad-adalek dagiti synapse. Nagsiddaawak unay ti makapaamanga a kinakomplikado dagitoy a naipagarup a simple a koneksion dagiti selula ti nerbio. Pinampanunotko, ‘Kasano koma a naiparna laeng ti itataud dagitoy a synapse ken dagiti genetic program a linaonda?’ Imposible dayta.

Idi met rugrugi ti dekada 1970, timmabunoak iti lekteur ti nalatak a Ruso a sientista ken propesor. Imbagana a dagiti sibibiag nga organismo ket saan a mabalin a resulta ti kumporme lattan a panagbalbaliw iti pakabuklan dagiti gene ken ti proseso a matda laeng dagiti kapigsaan. Maysa iti tallaong ti nagdamag idi agangay no pakasarakan iti sungbat. Inruar ti propesor ti bassit a Ruso a Biblia iti jacketna, impakitana dayta sana kinuna, “Basaenyo ti Biblia—nangruna ti salaysay ti Genesis maipapan iti panamarsua.”

Kalpasan ti lekteur, dinamagko iti propesor no serioso isuna iti imbagana maipapan iti Biblia. Daytoy ti kababagas ti insungbatna: “Iti agarup kada 20 a minuto, agbingay dagiti simple a bakteria ken addaanda iti ginasut a nagduduma a protina, a tunggal maysa ket aglaon iti 20 a kita ti ginasut nga amino acid a naurnos a kasla kadena. Isursuro ti ebolusion a dagiti bakteria ket agbalin a sabali a kita sigun iti agsasaganad a panagbalbaliwda. Ngem tapno mapasamak dayta, kasapulan ti napapaut pay nga amang ngem tallo wenno uppat a bilion a tawen—ti tiempo a patien ti adu a sientista a kabayagen nga adda biag ditoy daga.” Para kenkuana, mas lohikal ti salaysay ti Genesis iti Biblia.

Ania ti epekto kadakayo ti imbaga ti propesor?

Gapu kadagiti kapaliiwanna ken kadagiti di pay nasungbatan a saludsod iti panunotko, nakisaritaak iti sumagmamano a relihioso a katrabahuak ken gagayyemko ngem saan a makakombinsir ti imbagada. Kalpasanna, kinapatangko ti maysa a pharmacologist a Saksi ni Jehova. Tallo a tawen nga inlawlawagna ti Biblia kadakami ken Ema a baketko. Dua a banag ti nakasdaawanmi. Umuna, ti gagangay a “Kristianidad” ket adayo iti isursuro ti Biblia. Maikadua, ti Biblia ket saan a libro maipapan iti siensia ngem maitunos dayta iti pudno a siensia.

Ti kadi panagbalbaliw ti kapanunotanyo ket nakalapped iti nasientipikuan a panagsirarakyo?

Saan a pulos. Rumbeng a nalawa ti panagpampanunot ti nalaing a sientista aniaman ti patpatienna. Nupay kasta, nagbalbaliwak gapu iti pammatik. Dati, nalabes ti panagtalekko iti bagik, mannakikompetensiaak, ken pagpannakkelko unay dagiti paglaingak iti siensia. Ngem ita, agyamyamanakon iti Dios gapu kadagiti abilidadko. Ipapanko met idi a naiparna laeng ti itataud dagiti nakaskasdaaw a disenio iti sangaparsuaan, ngem ita, siak ken ti adu pay a sientista iyim-imtuodmin iti bagimi, ‘Kasano ngata ti panangdisenio ti Dios iti daytoy?’

[Blurb iti panid 9]

Siak ken ti adu pay a sientista iyim-imtuodmin iti bagimi, ‘Kasano ngata ti panangdisenio ti Dios iti daytoy?’