Ania ti Ibagayo iti Maysa nga Ateista?
1 “Ateistaak,” kuna ti maysa a propesora a taga Poland iti maysa a misionera idiay Africa. Nupay kasta, nakasarita ti sister dayta a babai ket inikkanna iti libro a Life—How Did It Get Here? By Evolution or by Creation? Idi nagsubli ti misionera iti sumaganad a lawas, kinuna kenkuana ti propesora: “Saanakon nga ateista!” Nabasana ti intero a libro a Creation ket nagkiddawen nga agpayadal iti Biblia. Ania ti maaramidanyo tapno agballigikayo a mangasaba kadagidiay agkuna a dida mamati iti Dios? Umuna, usigenyo ti nadumaduma a makagapu no apay a kasta ti kuna dagiti tattao.
2 Dagiti Pakaigapuan ti Dida Panamati: Saan nga amin nga ateista ket dati a kasta. Adu ti addaan idi iti relihion ken dati a mamati iti Dios. Nupay kasta, kimmapuy ti pammatida gapu kadagiti napasaranda a nakaro a problema iti salun-at wenno iti pamilia wenno di kinahustisia. Iti dadduma, dagiti kurso a maisursuro kadagiti unibersidad ket adda negatibo nga epektona iti kapanunotanda maipapan iti Dios. Kitaenyo dagitoy a pagarigan maipapan kadagiti ateista nga idi agangay napatanorda ti nabileg a pammati ken Jehova a Dios ket nagbalinda a Saksina.
3 Adda babai idiay Paris a sigud nga addaan iti makapakapuy a sakit iti tulang. Nupay nabuniagan a Katoliko, impabigbigna ti bagina a maysa nga ateista. Idi dinamagna kadagiti madre no apay nga impalubos ti Dios a mayanak nga addaan iti kasta a sakit, insungbatda: “Agsipud ta ay-ayatennaka.” Dina maawat dayta a minamaag a kapanunotan. Kasta met, panunotenyo ti maysa nga agtutubo idiay Finland a naduktalan nga addaan iti di maagasan a sakit iti piskel ket nakatugaw laengen iti wheelchair. Impan ni nanangna iti maysa a Pentecostal nga agkuna a maagasanna dagiti masaksakit. Ngem awan namilagruan a pannakaagas. Kas resultana, napukaw dayta nga agtutubo a lalaki ti interesna iti Dios ket nagbalin nga ateista.
4 Dimmakkel a Katoliko ti maysa a lalaki idiay Honduras ngem inadalna ti Sosialista a pilosopia ken ateismo. Gapu ta naallukoy iti isursuro ti unibersidad a ti sangatauan ket produkto ti ebolusion, saanen a mamati iti Dios. Umasping iti dayta, dimmakkel a Metodista ti maysa a babai idiay Estados Unidos. Iti kolehio, inadalna ti sikolohia. Kasano a naapektaran ti pammatina? Kinunana: “Iti maysa a kalgaw dinadaelda a namimpinsan ti pammatik iti relihion.”
5 Panangdanon iti Puspuso Dagidiay Napasnek: Adu a tattao nga agkuna a dida mamati iti Dios ti maragsakan a mangammo no adda solusion kadagiti parikut iti salun-at, riribuk iti pamilia, kinaawan hustisia, ken dadduma pay. Interesadoda unay nga agbirok iti sungbat kadagiti saludsod a kas iti: ‘Apay nga adda kinadakes?’ ‘Apay a mapasamak ti dakes a bambanag kadagiti naimbag a tattao?’ ken ‘Ania ti panggep ti biag?’
6 Adda agassawa nga agnanaed idiay Switzerland nga agpadpada a dimmakkel nga ateista. Idi damo a mayam-ammo kadakuada ti kinapudno, negatibo ti reaksionda. Ngem adda dagiti nadagsen a problemada iti pamilia ket pampanunotenda idi ti agdiborsio. Idi bimmisita manen dagiti Saksi, impakitada kadagiti agassawa manipud iti Biblia no kasanoda a mapagballigian dagiti parikutda. Nasdaaw dagiti agassawa iti praktikal a balakad a linaon ti Kasuratan, ket immanamongda nga agadal iti Biblia. Napabileg ti panagasawada, rimmang-ayda iti naespirituan, ken nagpabautisarda.
7 No Ania ti Mabalinyo nga Ibaga iti Maysa nga Ateista: No adda agkuna kadakayo nga isu ket ateista, ikagumaanyo nga ammuen no apay a maikunana dayta. Gapu ngata iti napagadalanna, dagiti parikut a napasaranna, wenno gapu kadagiti narelihiosuan a panaginsisingpet ken palso a pannursuro a nakitana? Mabalinyo a damagen kenkuana: “Dati kadin a kastoy ti panangmatmatmo?” wenno “Apay a kasta ti konklusionmo?” Ti sungbatna ti tumulong kadakayo a mangeddeng no ania ti ibagayo. No nasken ti nabileg nga argumento, mabalin a kasapulan laeng ti libro nga Is There a Creator Who Cares About You?
8 Mabalinyo a kasarita ti ateista babaen ti panangisaludsodyo:
◼ “Pinampanunotyo kadin: ‘No adda Dios, apay a naruay ti panagsagsagaba ken di kinahustisia ditoy lubong?’ [Palubosanyo a sumungbat.] Mabalin kadi nga ipakitak kadakayo ti panangmatmat ti Biblia iti daytoy a tema?” Basaenyo ti Jeremias 10:23. Kalpasan a maibasayo dayta, damagenyo ti kapanunotanna iti dayta a teksto. Kalpasanna ipakitayo kenkuana ti panid 16 ken 17 iti broshur a Will There Ever Be a World Without War? Wenno mabalinyo pay ketdi nga usaren ti kapitulo 10 ti libro a Creator. Iyawisyo kenkuana nga alaenna ti publikasion ket basaenna ti material.—Para iti ad-adu pay a singasing, kitaenyo ti libro a Panakirinnason, panid 118-119.
9 Siempre, saan nga amin nga ateista ket awatenda ti kinapudno. Ngem adu ti sidadaan a mangusig iti sabali a kapanunotan. Agusarkayo iti lohika, panangguyugoy ken, kangrunaanna, ti bileg ti Sao ti Dios a tumulong kadakuada a mangkita iti kinapudno.—Ara. 28:23, 24; Heb. 4:12.