Ti Pudno a Gubuayan ti Giya ken Namnama
SAAN a kas kadagiti demonio, ni Jehova a Dios ti kasisiriban ken mannakabalin-amin. Isu met ti mismo a personipikasion ti ayat. (1 Juan 4:8) Ti balakadna ket kanayon a nasayaat, awan bayadna, ken pagimbagantayo. Naiduma unay dayta iti balakad dagiti espiritista ken psychic! Kuna ti Dios: “Umaykayo, dakay amin a mawaw [iti naespirituan]—adtoy ti danum! Umaykayo, dakayo nga awan kuartana—gumatangkay iti taraon ket mangankayo! Umaykayo gumatang iti arak ken gatas—gumatangkay ngem awan ti bayadanyo. Apay a gastosenyo ti kuartayo iti taraon a saan a makan? Apay a gastoenyo ti sueldoyo, ket kaskasdi nga awan pannakapnekyo? Denggendak ket aramidenyo ti ibagak tapno maramananyo ti kaimasan a makan.”—Isaias 55:1, 2, Ti Baro a Naimbag a Damag Biblia.
Yantangay ti Biblia ket impaltiing ti naayat a Namarsua kadatayo, ipaayannatayo dayta iti namnama, naespirituan a proteksion, panggep iti biag, ken kasasayaatan a prinsipio a rumbeng a surotentayo. Nagsayaat ngarud nga usigem ti sumaganad a salsaludsod ken dagiti nainaig a teksto ti Biblia.
[Kahon iti panid 7]
● Kasano a maaddaanak iti pudno a natalna a panunot? Kuna ti Biblia: “Daytoy ti kinuna ni Jehova, ti Manangsakam, Daydiay Santo ti Israel: ‘Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.’”—Isaias 48:17, 18.
● Agpatingganto pay ngata ti kinadakes? “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.” (Proverbio 2:21, 22) Wen, dagiti nadangkes a tattao, agraman dagiti nadangkes nga anghel, ket madadaelto iti agnanayon a kas man la babaen iti apuy.—Apocalipsis 20:10, 14.
● Agpatingganto pay ngata ti sakit ken panagsagaba? “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag [ti adu a problema ita] naglabasdan.”—Apocalipsis 21:3, 4.
Saan a kas kadagiti demonio, pulos a di agulbod ti Dios. Kinapudnona, “saanna a mabalin ti agulbod.” (Tito 1:2) Ipakita ti maudi nga artikulo iti daytoy a serye a ti kinapudno ti Dios ket agpadpada a mangwayawaya ken mangted-biag.—Juan 8:32; 17:3.