Bay-am nga Iturongnaka ti Dios iti “Pudpudno a Biag”
TI KINAMAPAGTALKAN ti maysa a napateg a galad ti asinoman a mangiwanwanwan. Dagidiay makaam-ammo ken ni Jehova, ti Autor ti Biblia, mamatida nga isu ti kangrunaan a mapagtalkan kadagiti amin a persona. “Saanna a mabalin ti agulbod.” (Tito 1:2; 2 Timoteo 3:16) Ti managbuteng iti Dios a ni Josue, a nangidaulo iti Israel a simrek iti Naikari a Daga, napaneknekanna a mismo ti kinamapagtalkan ni Jehova. Kinunana kadagiti tattao: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.”—Josue 23:14.
Sipud idi kaaldawan ni Josue, adu pay dagiti natungpal a padto ti Biblia. Dayta ti mangted kadatayo iti nabileg a rason a naan-anay nga agtalek kadagiti padto a di pay natungpal. Adu kadagitoy a padto ti mainaig iti panggep ti Dios iti daga ken iti natulnog a sangatauan.
Pagimbagam Kadi ti Panangiwanwan ti Dios?
Ni Jehova, ti naan-anay a pagwadan iti ayat, kayatna nga agragsaktayo itan ken iti agnanayon. (Juan 17:3; 1 Juan 4:8) Wen, tarigagayan ti Dios a sagrapentayo “ti pudpudno a biag”—ti biag nga agnanayon. (1 Timoteo 6:12, 19) Gapu iti daytoy, adda nasurok nga innem a milion a Saksi ni Jehova, a gapu iti panagtulnogda iti bilin ti Dios, siraragsak nga iranranudda ti “naimbag a damag ti pagarian” kadagiti kaarrubada. (Mateo 24:14) Ita, ar-aramidenda daytoy iti 235 a pagilian—iti dandani amin a pagilian ditoy daga!
Ti Pagarian ti Dios ket maysa a nailangitan a gobierno nga iturayan ni Jesu-Kristo. (Daniel 7:13, 14; Apocalipsis 11:15) Babaen ti panangiturayna, madadael ti amin a nadangkes—dagidiay saan nga agpasakup iti nalinteg a pagalagadan ni Jehova. (Salmo 37:10; 92:7) Kalpasanna, ti intero a daga “sigurado a mapnonto iti pannakaammo ken Jehova kas iti dandanum abbonganda ti mismo a baybay.”—Isaias 11:9.
Panunotenyo ti agari a talna ken panagtutunos gapu ta ti tunggal tao iti planeta agdaydayawdanto iti Dios “buyogen ti espiritu ken kinapudno” ken situtulok nga agpasakup iti naayat a panangiturongna ken iti naan-anay a pagalagadanna! (Juan 4:24) Mapasaranto met laengen dagiti tattao “ti pudpudno a biag” nga inkari ti Dios!
Ngem kas naipadto, manmano ti agpaiwanwan iti Dios ken makagun-od iti biag. (Mateo 7:13, 14) Kayatmo kadi a maysakanto kadakuada? No kasta, naimpusuan nga awisendaka dagiti Saksi ni Jehova a mangusig iti Biblia ken agpaidalan iti balakad ti Dios. No aramidem ti kasta, ‘mananammo’ a mismo ti kinaimbag ni Jehova. (Salmo 34:8) No kasano a ti nainkasigudan a sirib sigurado nga iturongna dagiti tumatayab iti papananda, ni Jehova iturongna dagiti nasungdo kenkuana iti biag idiay Paraiso.—Lucas 23:43.
[Ladawan iti panid 8, 9]
“Naragsak dagiti naalumamay ti kababalinda, yantangay tawidendanto ti daga.”—MATEO 5:5
“Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”—SALMO 37:11
“Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay.”—APOCALIPSIS 21:3, 4
“Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”—PROVERBIO 2:21, 22