Ti Panggep ti Dios Agpaay iti Daga—Asidegen a Matungpal
IDI agnanaed pay la da Adan ken Eva iti Paraiso, imbilin kadakuada ti Dios: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.”—Genesis 1:28.
Ti panangparukma iti daga saanna laeng a kaipapanan ti panangtalon wenno panangaywan iti bassit laeng a paset dayta. Da Adan ken Eva ken dagiti kaputotanda pagsaknapenda ti Paraiso agingga iti intero a lubong. Ngem nagbasol ti umuna nga agassawa ket naparuarda iti minuyongan ti Eden. (Genesis 3:23, 24) Ngem di kayat a sawen dayta a saanton a maparukma ti daga.
Yantangay bendisionan ida ti Dios, kabaelanto ti natulnog a sangatauan a parukmaen ti daga. No tagtagiragsaken idi ti Israel ti anamong ti Dios, nawadwad ti apit kadagiti talonda ken agkakaimbag ti bunga dagiti mulada. Kastanto ti kasasaad inton in-inut nga agbalin a paraiso ti lubong. Kas naikari iti naipaltiing a Sao ti Dios, ti Biblia, “ti met laeng daga sigurado nga ipaaynanto ti bungana; ti Dios, a Diostayo, bendisionannatayto.” (Salmo 67:6) Arigna nga agrag-o dagiti karuotan ken bambantay, dagiti kaykayo ken sabsabong, dagiti karayan ken baybay. (Salmo 96:11-13; 98:7-9) Mapnonto ti daga kadagiti nalangto a mulmula, namaris a tumatayab, makaay-ayo nga animal, ken managayat a tattao.
Asidegen ti Maysa a Baro a Lubong!
Addatayon iti wangawangan ti maysa a baro a lubong nga inkari ni Jehova a Dios. “Adda baro a langlangit ken baro a daga nga ur-urayentayo sigun iti karina,” insurat ni apostol Pedro, “ket kadagitoy agtaeng ti kinalinteg.” (2 Pedro 3:13) Kalpasan a mabasada dagita a sasao ni Pedro, nalabit nga adda dagiti mangibaga a saanto pulos nga agbalin a paraiso ti daga. Mabalin a panunotenda a masukatan ti pisikal a langit ken daga. Kasta ngata ti mapasamak?
Ania ti “baro a langlangit”? Saan nga isu daytoy ti pisikal a langlangit a pinarsua ti Dios. (Salmo 19:1, 2) Kadakdakamat ni Pedro ti simboliko a “langlangit”—dagiti gobierno ti tao a nangatngato ngem kadagiti iturayanda. (2 Pedro 3:10-12) Dagitoy a “langlangit” napaayda iti panangiturayda iti sangatauan ket agpatinggada. (Jeremias 10:23; Daniel 2:44) Ti “baro a langlangit” a mangsukat kadakuada isu ti Pagarian ti Dios a buklen ni Jesu-Kristo nga Ari ken ti makipagtawid kenkuana a 144,000 a napagungar iti nailangitan a biag.—Roma 8:16, 17; Apocalipsis 5:9, 10; 14:1, 3.
Ti “baro a daga” a dinakamat ni Pedro ket saan a baro a planeta. Pinarsua ni Jehova ti daga a perpekto a pagbiagan dagiti tattao iti agnanayon. (Salmo 104:5) No dadduma, usaren ti Biblia ti sao a “daga” no tukoyenna dagiti tattao. (Genesis 11:1) Ti daga nga asidegen a madadael isu dagiti tattao a mangbukel iti daytoy dakes a lubong. Umasping iti dayta, maysa a lubong dagiti dakes a tattao ti nadadael iti Layus idi kaaldawan ni Noe. (2 Pedro 3:5-7) Ania ngarud ti “baro a daga”? Maysa dayta a baro a kagimongan dagiti tattao—dagiti pudno nga agdaydayaw iti Dios, a “napalungdo iti puspusoda.” (Salmo 125:4; 1 Juan 2:17) Aggapu iti “baro a langlangit” ti amin a linteg a maipaulog iti “baro a daga.” Dagiti matalek a lallaki ditoy daga siguraduenda a maipatungpal dagitoy a linteg.
Baro ken Nakaskasdaaw a Panagbalbaliw!
Talaga a nangted ni Jehova iti nakasaysayaat a pagtaengan idi insaganana daytoy daga tapno pagbiagan dagiti tattao. Isu a mismo ti nangibaga a “nasayaat unay” dagiti amin nga inaramidna ditoy daga. (Genesis 1:31) Ni Satanas a Diablo insungsongna da Adan ken Eva tapno agrebeldeda. (Genesis 3:1-5; Apocalipsis 12:9) Nupay kasta, asidegen nga agtignay ti Dios tapno dagiti napalungdo maaddaanda iti “pudpudno a biag.” Kayatna a sawen, ti “agnanayon a biag” iti sidong ti perpekto a kasasaad iti Paraiso. (1 Timoteo 6:12, 19) Usigentayo ita ti dadduma kadagiti bendision a matagiragsakto.
Bayat ti Sangaribu a Tawen a Panagturay ni Kristo, maipupok ni Satanas ket saanna a maiyeg ti panagsagaba iti sangatauan. Kuna ni apostol Juan: “Nakitak ti maysa nga anghel [ni arkanghel a Miguel, wenno ni Jesu-Kristo] a bumabbaba manipud langit nga addaan iti tulbek ti mangliwengliweng ken maysa a dakkel a kawar iti imana. Ket kinemmegna ti dragon, ti kadaanan a serpiente, nga isu ti Diablo ken Satanas, ket pinarautanna iti las-ud ti sangaribu a tawen. Ket inggarangugongna iti mangliwengliweng ket rinikpanna dayta ken sinelioanna dayta iti rabawna, tapno saannan a maiyaw-awan dagiti nasion agingga a maturpos ti sangaribu a tawen.” (Apocalipsis 20:1-3; 12:12) Malaksid iti wayawaya manipud iti impluensia ni Satanas bayat ti kaaddana iti mangliwengliweng, tagiragsaken ti sangatauan ti dadduma pay a bendision iti sidong ti panangituray ti Pagarian.
Awanton ti kinadakes, kinaranggas, ken gubat. Ikarkari ti Biblia: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna. Dagiti nalinteg tagikuaendanto ti daga, ket agtaengdanto nga agnanayon iti dayta.” (Salmo 37:10, 11, 29) Ni Jehova a Dios “pagsardengenna dagiti gubat agingga iti ungto ti daga.” (Salmo 46:9) Anian a nagsayaat a pammasingked iti kinatalged ken talna!
Aglaplapusananto ti makapasalun-at ken agkakaimas a taraon. “Maaddanto ti naruay a bukbukel iti daga,” inkanta ti salmista. “Iti tapaw dagiti bantay addanto ti panaglaplapusanan.” (Salmo 72:16) Awanton ti agsagaba iti ut-ot a maigapu iti nakaro a bisin.
Awanton ti agsagaba iti an-annayen ken sakit. Kinapudnona, “awanto ti agtataeng nga agkuna: ‘Masakitak.’” (Isaias 33:24; 35:5, 6) Idi adda ditoy daga ni Jesu-Kristo, pinaimbagna dagiti agkukutel, pilay, ken bulsek. (Mateo 9:35; Marcos 1:40-42; Juan 5:5-9) Panunotenyo laengen no ania ti aramidenna iti baro a lubong! Darepdepenyo ti kinaragsak inton umimbag dagiti bulsek, tuleng, pilay, ken umel.
Bayat nga agsubsubli ti kinaperpekto dagiti natulnog a tattao, sumalibukagto dagiti lallakay ken babbaket. Awanton dagiti antipara, sarukod, muleta, wheelchair, ospital, ken ag-agas. Anian a panagbalbaliw dagita bayat a maisubli ti kinasarantatayo a kas iti maysa nga agtutubo! (Job 33:25) Kanayonto nga agriingtayo a naganaygay manipud iti nargaan a pannaturog ken nakasagana a mangiringpas iti agmalem a makaparagsak nga aktibidad.
Mangyegto iti rag-o kadagiti pusotayo ti panagungar dagiti ing-ingungotentayo ken dagiti sabsabali. (Juan 5:28, 29; Aramid 24:15) Anian a makapagagar ti panangabrasanto kada Abel, Noe, Abraham, Sara, Job, Moises, Ruth, David, Elias, Ester, ken adu pay a kas kadakuada! Sabali laeng dagiti minilmilion a kaduada a mapagungar. Kaaduan kadakuada ti saan pulos a nakaam-ammo ken Jehova, ngem abrasaento ida dagiti tattao a sigagagar a mangisuro kadakuada maipapan iti Dios, kadagiti panggepna, ken iti Anakna a ni Jesu-Kristo. Bayat a maammuan dagiti napagungar ti maipapan iti Namarsua kadakuada, talaga a mapnonto ti daga iti pannakaammo maipapan ken Jehova.
Kangrunaan iti amin, agnanayon a maidaydayawtayto ti kakaisuna a pudno a Dios. Addaantayo iti pribilehio nga ‘agserbi ken Jehova buyogen ti panagrag-o,’ ken agtutunostayto nga agtrabaho a sangsangkamaysa bayat nga ibangontayo dagiti napipintas a pagtaengan, sukayen ti daga, ket kamaudiananna maparukmatayo ti intero a daga. (Salmo 100:1-3; Isaias 65:21-24) Anian a makaparagsak ti agbiagto nga agnanayon iti nabunga, natalna, ken nangayed a paraiso a pakaidayawan ti nasantuan a nagan ni Jehova!—Salmo 145:21; Juan 17:3.
Maudi a Pannubok iti Sangatauan
Bayat ti Sangaribu a Tawen a Panagturayna, ipaayto ni Jesus dagiti gunggona nga iyeg ti pangsubbot a datonna. Kamaudiananna, maikkatton ti amin a basol ken agbalinton a perpekto dagiti tattao. (1 Juan 2:2; Apocalipsis 21:1-4) Gapu ta naan-anayton a naikkat dagiti epekto ti basol ni Adan, makapagbiagto dagiti perpekto a tattao maitunos kadagiti pagalagadan ti Dios no iti pisikal, mental, moral, ken naespirituan. Gapuna, ‘agbiagdanto’ iti naan-anay nga anag apaman a makagtengda iti kinaperpekto. (Apocalipsis 20:5) Anian a pakaidayawan ni Jehova dayta ken ti Paraiso a daga!
Iti apagbiit a tiempo kalpasan ti Sangaribu a Tawen a Panagturay ni Kristo, ni Satanas a Diablo ken dagiti demoniona, wenno nadangkes nga anghel, maruk-atandanto manipud mangliwengliweng a nakaigarangugonganda iti agarup sangapulo a siglo. (Apocalipsis 20:1-3) Mapalubosandanto a mangaramid iti maudi a panagreggetda a mangpatallikud kadagiti tattao manipud iti Dios. Nupay addanto dagiti tattao a tumulok kadagiti dakes a tarigagay, mapaayto dayta a panagrebelde. Dadaelento ni Jehova dagiti naagum agraman ni Satanas ken amin a demoniona. Awanton a pulos ti tumaud manen a kinadakes. Agnanayon a mapukawto dagiti amin a managdakdakes, ket dagiti nalinteg umawatda iti biag nga agnanayon.—Apocalipsis 20:7-10.
Addakayto Kadi Sadiay?
Agur-uray ti agnanayon a kinaragsak kadagidiay agayat ken ni Jehova a Dios. Saanto a makauma ti biag nga agnanayon iti Paraiso. Kinapudnona, agbalin nga ad-adda a makapainteres ti biag bayat ti panaglabas ti tiempo, agsipud ta awan ti limitasion ti pannakaammo maipapan ken Jehova a Dios. (Roma 11:33) Addanto a kanayon ti baro a maadal, ken nawadwadto ti tiempom a gumun-od iti pannakaammo. Apay? Agsipud ta agbiagka, saan laeng a 70 wenno 80 a tawen, no di ket iti agnanayon.—Salmo 22:26; 90:10; Eclesiastes 3:11.
No ay-ayatem ti Dios, kanayon a pakaragsakam nga aramiden ti pagayatanna. Insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Gapuna, dimo koma ipalubos nga adda manglapped kenka a mangannurot iti kinalinteg, banag a makaay-ayo ken ni Jehova a Dios. Laglagipem ti nakaskasdaaw a namnama nga ituktukon kenka ti Biblia a Sao ti Dios. Determinadoka koma a mangaramid iti pagayatan ni Jehova, ket dika pulos sumiasi iti dayta a dana. No kasta, addakanto inton matungpal ti panggep ti Dios iti daga ken agbalin nga agnanayon a paraiso ti sangalubongan a pagtaengantayo.
[Ladawan iti panid 4]
Gapu iti pamendision ti Dios, nawadwad ti apit kadagiti talon ti Israel
[Ladawan iti panid 7]
Ania dagiti bendision a namnamaem a matagiragsak idiay Paraiso?