Ti Kinapudno ti Biblia Winayawayaanna Ida
KINUNA ni Jesu-Kristo iti maysa a grupo dagiti dumdumngeg kenkuana: “Maammuanyonto ti kinapudno, ket ti kinapudno wayawayaannakayto.” (Juan 8:32) Kas ipakita dagiti sumaganad a pagarigan, karaman iti dayta ti pannakawayawaya manipud kadagiti demonio—dagiti managulbod ken manangallilaw nga adda iti likudan ti okulto.—Juan 8:44.
Itampok ti tunggal maysa kadagitoy a kapadasan ti mangwayawaya a bileg ti kinapudno ti Biblia. Wen, dayta laeng ti pudno a mangwayawaya iti tattao. Usigem koma ngarud ti Biblia ket sigurado a dikanto mapaay.
[Kahon/Ladawan iti panid 8]
Nayakto laeng dagiti retrato
● Ni Susanna ket babai a padi ti maysa a templo idiay Brazil. Kayatna nga usaren ti karkarna a pannakabalinna a tumulong kadagiti agkasapulan. Magusgustuanna met ti “makisarsarita iti natay a nanangna.” Ngem idi agangay, impakaasi ni “nanangna” nga agpakamatay ni Susanna tapno agkaduadan iti lubong dagiti espiritu. Dayta ti nangburibor kenkuana ken nakaigapuan ti kanayon a panagtagtagainepna iti dakes. Idi agangay, isu ken ni lakayna ket nakipagadal iti Biblia kadagiti Saksi ni Jehova. Narigatanda a ‘nangbusor iti Diablo,’ ngem ‘nagtalaw’ kadakuada idi agangay. (Santiago 4:7) Natalna itan ti biagda ken awanen dagiti dakes a tagtagainep ni Susanna. Insuratna: “Nagadu ti pagyamyamanak ken Jehova ngem ti kangrunaan ket ti panangiruarna kaniak manipud iti naespirituan a kinasipnget.”
[Kahon/Ladawan iti panid 8]
● Ni Timothy a taga-Makinlaud nga Africa ket umel ken tuleng.a Gapu ta di maagasan dagiti doktor, napan kadagiti faith healer, ngem awan simmayaatanna. “Napaayak iti panangallilawda,” insuratna. Idi agangay, ni Timothy ket nakipagadal iti Biblia kadagiti Saksi ni Jehova. Inlawlawagda kenkuana ti panggep ti Dios a mangpukaw iti amin a sakit ken depekto. Kinuna ni Timothy, “Segseggaak ti baro a lubong ti Dios a sadiay ‘maluktanto ti mismo a laplapayag dagidiay tuleng . . . ket ti dila daydiay umel umkisto gapu iti ragsak.’” (Isaias 35:1-6) Kabayatanna, maragragsakan a mangusar iti bassit a DVD player-na tapno mairanudna dagiti kinapudno ti Biblia kadagiti addaan depekto iti panagdengngeg ken matulonganna ida a maaddaan iti pudno a wayawaya.
[Footnote]
a Nabaliwan ti dadduma a nagan.
[Kahon/Ladawan iti panid 9]
● Ni Evelyn ket naigamer unay iti okulto idiay Estonia. Tangay nangpaimbag idi ni Jesus kadagiti masakit, kayatna met nga aramiden dayta. Nangruna a kayatna a paimbagen ti grabe a sakit ni nanangna. Tapno maammuan ken maagasanna dagiti nakaro a sakit, inadalna ngarud ti agusar kadagiti pendulum. Idi agangay, inadalna ti Biblia ket kas resulta, kinunana: “Naamirisko a nakaro gayam ti pannakaallilawko isu a pinuorak dagiti pendulumko ken literaturak a nainaig iti espiritismo.” Isursurona itan iti sabsabali dagiti mangwayawaya a kinapudno ti Biblia.
[Kahon/Ladawan iti panid 9]
● Ni Mary ket dimmakkel iti maysa kadagiti isla ti Papua New Guinea, a sadiay kabuteng ti tattao dagiti natay. No adda matay a kalugaranna, maturog ni Mary iti sirok ti katre ti sabali. Mabuteng ngamin nga agmaymaysa amangan no isu ket dangran ti espiritu ti natay. Ngem naammuanna iti Biblia nga arigna a matmaturog dagiti natay—addada iti tanem nga agur-uray iti panagungar iti Paraiso a daga. (Lucas 23:43; Juan 11:11-14) Gapuna, dinan kabuteng dagiti natay.
[Kahon/Ladawan iti panid 9]
● Ni Alicia, a pinadakkel dagiti nagannakna a Saksi ni Jehova idiay Estados Unidos, ket naginteres kadagiti naokultuan a libro ken pelikula. Idi agangay, inusigna a naimbag dagiti naadalna a kinapudno ti Biblia. Naamirisna nga arigna ‘makiramraman iti lamisaan ni Jehova ken iti lamisaan dagiti sairo,’ isu a nagbalbaliw ket nadalus itan ti konsiensiana iti imatang ti Dios.—1 Co 10:21.