Report Dagiti Manangiwaragawag ti Pagarian
Manipud Panagladingit Agturong iti Kinaragsak
NI Jehova naragsak a Dios. (1 Timoteo 1:11) Kayatna a dagidiay agserserbi kenkuana agbalinda met a naragsak. Gapuna, no maysa kadagiti adipenna ti maladingitan, ni Jehova ti tumulong kenkuana a mangibtur ti ut-ot ket no maminsan mapasublina manen ti naragsak nga espirituna. Ti sumaganad a kapadasan manipud Uruguay iyilustrarna daytoy.
Maysa a sister ti agur-uray iti maysa a klinika idiay Montevideo para iti resulta ti eksaminasion ti X-ray. Maysa a babai nga agtugtugaw iti sibayna ket mabutbuteng unay no aniat’ maikuna ti doktor kas resulta ti eksaminasion a naglasatanna. Kinuna ti sister kenkuana a nanipud idi isut’ nagbalin a Saksi ni Jehova, isut’ saanen nga agbutbuteng iti aniaman. Ngem, ti babai, kunana a saanna a kayat dagiti Saksi ta nangato nga estandarte ti kalkalikagumanda manipud kadagiti tattao.
Kalpasanna imbaga ti sister no kasano a ti pannakaammona iti Biblia dakkel naitulongna kenkuana. Napukawna ti 18-años nga anakna a babai ken patay ket isut’ natnag iti panagladladingit iti walo a tawen. Awan kadagiti sikiatrista ken nangingina nga agas ti nakatulong kenkuana a mangparmek ti panagladingitna. Namin-adu a daras, kunana, nga isut’ naiyospital, ngem awan pulos rinang-ayanna. Ti sangakabbalayanna ket ay-aywanan dagiti ad-adipen ta isu a mismo awan aniaman a maas-asikasonan. Pinadpadasna pay ti agsusaid agsipud ta napukawnan ti interes iti panagbiag. Awan ti kasla makatulong kenkuana.
Kalpasanna, imbagana iti babai, maysa nga aldaw immay dagiti Saksi ni Jehova ket isut’ imbatianda kadagiti literatura ti Biblia. Daytat’ nangparissik ti interesna iti Sao ti Dios, ket rinugianna ti panagbasbasa ti Biblia manipud puon ingganat’ murdong. Adda banag a nangrugi nga agbaliw iti unegna. Isut’ mangrugi a bumangonen iti agsapa ken naaddaanen ti interes iti sangakabbalayanna. Iti kamaudianan naikeddengna nga aywananen ti balayna a bukbukodna ken nakitana a kabaelannan nga aramiden dayta. Arigna a kasla di pulos nagsaksakit! Daytoy ti nakaparagsak ti riknana.
Isut’ saanen a nagsubli iti sikiatrista. Ti ayatna nga agbiag naparegta kenkuana babaen iti pannakaammonat’ Sao ti Dios, ket daytoy ti napaneknekan a kasasayaatan nga agasna. Sinapulna dagiti Saksi ni Jehova, ket rinugianda ti regular a panagadal kenkuana. Isut’ nangrugi metten a tumabuno iti gimgimong, ket di nagbayag isut’ nabautisaranen. Gapu ta saanen a mariribukan iti panagladingit, itan tagtagiragsakennan ti panagserserbi ken Jehova.
Ti babai idiay siled a pagur-urayan nagimdeng a naimbag. Kalpasanna kunana iti sister: “Iti nabayag metten, nasabsabatkon dagiti Saksi ni Jehova; ngem no iti masanguanan, ket agbalinakto metten a Saksi ni Jehova, daytat’ maigapunto iti kaibagbagam kaniak. Ti panagdengdengngeg kenka arignat’ pannakakitak ti lawag iti nasipnget a lugar.”
Adu a tattao ditoy lubong makitkitada ti kinabarengbareng ti panangpadpadas a mangsolbar kadagiti parikut ti panagbiag a bukbukodda, ket agturturongdan ken Jehova a Dios. Anian ti ragsakda a makaammo iti um-umayen a baro a lubong ti Dios a sadiay tunggal maysa naragsakton, ket napalabasto metten ti panagladladingit!—Proverbio 16:20.