Report Dagiti Manangiwaragawag ti Pagarian
“Naragsak ti Tao a Makasarak iti Sirib”
PUDNO daytoy a proverbio idiay Korea, a sadiay adda itan ti nasurok a 71,000 a nararagsak a Saksi ni Jehova. (Proverbio 3:13) Ken panunotenyo, 42 porsiento kadagitoy a ministro ti adda iti amin-tiempo a serbisio! Ipakita dagiti sumaganad a kapadasan a kinaragsak ti gunggona dagidiay a mangbiruk iti pudpudno a sirib.
Ag-16 a tawen a makigimgimong iti maysa kadagiti simbaan ti Kakristianuan ti maysa a babai a taga Pusan. Nakitana nga adu unay dagiti di nainkasuratan nga aramid ta impatona payen a mabalin nga awan ti Dios. Iti sabali a bangir, dina mailibak ti kaadda ti Dios, isu a sipapasnek nga inkararagna iti Dios a masarakanna koma ti pudno nga iglesia no bilang adda man. Pagammuan ta napanunotna dagiti Saksi ni Jehova, ken nalagipna a linalais ti simbaanna ida ken binallaaganna dagiti makigimgimong maibusor kadakuada gapu ta saan a mamati dagiti Saksi iti Trinidad, umap-apuy nga impierno, ken dadduma pay a sursuro ti Kakristianuan. Nalabit isuda ti pudno nga iglesia? Babaen ti tulong ti maysa a kaarruba, nasarakanna ti ayan ti Kingdom Hall. Iti simmaganad nga aldaw met laeng, napan nakigimong.
Nasdaaw iti kinaurnos ti gimong. Awan pinapanatiko nga arimbangaw wenno emosional a panagkakanta a kas maar-aramid iti simbaanna. Nayam-ammo iti maysa a Saksi a sisasagana a mangiyadal ti Biblia kenkuana, ket nagpaut iti sumagmamano nga oras ti damo a panagadal gapu ta nagadu ti saludsodna. Iti maikadua a panagadal, impakaammona nga aglusulos iti simbaanna ket agbalin a Saksi. Imbagana iti sister a dinan kasapulan ti makipagadal pay kenkuana, ta umatender laengen kadagiti gimong. Nupay kasta, nailawlawag kenkuana ti pateg ti maaddaan iti personal a panagadal iti Biblia malaksid pay iti itatabuno kadagiti gimong. Inawatna ti singasing, rineggetanna ti nagadal, ket nabautisaran idi agangay.
Kasta unay ti ragsakna itan ta nasarakanna ti sirib ti pudpudno a Dios, ni Jehova, ken addaanen iti namnama nga agbiag nga agnanayon iti baro a lubong ti Dios.
Naammuan ti Retirado a Heneral ti Kinapudno
Nabautisaran idi 1962 ti asawa ti maysa a heneral ti army. Binusor ni lakayna idi damo, ngem kamaudiananna insardeng ni lakayna a busoren, ket iti las-ud ti simmuno a 28 a tawen irregular a nakipagadal ni lakayna. Masukansukat dagiti kakabsat a nangiyadal kenkuana, a nangikagumaan a mangkumbinsir kenkuana iti kinapudno. Timmabtabuno kadagiti sumagmamano a gimong ken kumbension, ngem maysa isuna kadagidiay nangiyaleng-aleng iti kinapudno. Idi 1990 napanda ken ni baketna idiay Japan, a sadiay immatenderda iti maysa a kumbension distrito. Iti daytoy a gundaway nagimdeng a naimbag kadagiti palawag—banag a dina pay naaramid idi. Uray la a nakigtot kadagiti nabara a palawag a mangibutaktak iti ulbod a relihion, ngem sigurado a dagitoy ti nangipabigbig kenkuana iti kinamanaginsisingpet ti Kakristianuan. Nasdaaw iti kinaurnos ken kinaragsak dagiti tattao ti Dios idiay Japan, a kas met laeng iti naimatanganna idiay Korea. Apaman a nakasubli idiay Korea, rinugianna nga impasnek ti nagadal iti Biblia ket nabautisaran kamaudiananna.
Isu a kalpasan ti bautismona ania ti rumbeng nga aramidenna? Inlusulosna ti saadna kas presidente iti maysa a nalatak nga hotel ti turista ket kimmadua ken ni baketna iti amin-tiempo a ministerio kas payunir. Napanunotna a ti panagbalin a kas regular a payunir ti kasayaatan a pamay-an tapno makaabrut iti 28 a tawen a pukawna bayat a nagpamayan.
Mabigbigna itan nga agaplikar met kenkuana ti proverbio a “naragsak ti tao a makasarak ti sirib”!