Report Dagiti Manangiwaragawag ti Pagarian
Dagiti Karnero ni Jesus Ipangagda ti Timekna
BAYAT nga agsaknap ti trabaho a panangasaba iti amin a paset ti daga, ni Jehova babaen kadagiti anghelna iturongna dagiti adipenna kadagiti marakarnero a tattao. Ipangagda ti timek ni Jesus ken adalenda ti agserbi kenkuana a siinanamada iti biag nga agnanayon. Kinuna ni Jesus idiay Juan 10:27, 28: “Dagiti karnerok denggenda ti timekko, ket ammok ida, ket surotendak. Ket siak ikkak ida ti biag nga agnanayon.” Paliiwenyo no kasano nga impangag dagiti nasingpet-panagpuspusona a tattao idiay Madagascar ti timek ni Jesus.
Maysa a Saksi ni Jehova ti nangted kadagiti kopia dagiti libro a Mabalinyo ti Agbiag nga Agnanayon iti Paraiso a Daga ken Ti Kina-agtutuboyo—Pananggun-od ti Kasayaatan iti Dayta iti doktor nga immay nangkita iti masakit nga amana.
Ti doktor ket Protestante ken kabusbusorna unay dagiti Saksi, ngem binasana ti libro ket kinitana dagiti kasuratan iti mismo a Bibliana. Ti baketna, maysa a Katoliko ken maysa met a doktora, binasana ti libro a Kina-agtutubo iti adu a daras agsipud ta kunana a kasla naisurat dayta a nangnangruna nga agpaay kenkuana. Nagustuanda a dua ti naibatay-Biblia a panangilawlawag ti Sosiedad iti kaipapanan ti 1914. Biniruk ti lalaki daydi Saksi a nangted kenkuana iti libro. Ti Saksi nangted manen iti Life—How Did It Get Here? By Evolution or by Creation? ken inyurnosna ti sumarungkar kenkuana kasta met iti baketna tapno sungbatanna dagiti saludsodda. Idi sinarungkaranna ida, inrugina ti regular a panagadal ti Biblia kadagiti agassawa ken iti tallo nga annakda. Napartak a rimmang-ay ti pannakaawatda iti Biblia.
Kalpasan ti umuna a panagadal, rinugianen ti intero a pamilia ti makigimong idiay Kingdom Hall ket di nagbayag nagpalistada iti Teokratiko nga Eskuelaan ti Panagministro. Dakkel ti simmayaatan ti kababalin dagiti annakda. Manipud iti panagadalda ti Biblia, naammuanda a ti panangrambak kadagiti panagkasangay ken dadduma pay a relihiuso a ngilin ket saan a Nakristianuan; ngarud, insardengdan dagita. Nagkedked ti asawa a lalaki a mangyalison ti darana iti kabagianna, nupay saan pay a nasagid dayta a tema iti panagadalda ti Biblia. Di nagbayag awanen dagiti unipormena iti karate iti aparadorna; impanna dayta iti dumadait tapno maaramid a kawes dagiti annakna. Pinuoranna amin a magasin ken librona maipapan iti gasat. Tallo a bulan laeng kalpasan nga inrugida ti nagadal, immikkat dagiti agassawa kadagiti simbaanda ket inyebkasda ti tarigagayda a makipaset iti trabaho a panangasaba. Itan nabautisarandan.
◻ Maysa a babai idiay Thailand ti agbirbiruk ti kinapudno. Nupay maysa a Budhista, pulos a saan a napasnek iti relihionna gaput’ makitkitana a nakaro a kinamanaginsisingpet ken kinaagum. Maysa pay, adu a kustombre ti dina magustuan. Isut’ nauman kadagita.
Idi agangay, insingasing ti maysa a kaarrubana a padasenna dagiti Kristiano ket inkuyogna iti simbaan ti Pentecostal. Ngem bayat ti gimong, napigsa ti tarigagay ti babai a pumanaw ken agawiden gapu iti ariwawa, ngamin nalaaw ti panagkarkararag dagiti amin a timmabuno. Isu dayta ti naudi nga itatabunona iti dayta a simbaan.
Di nagbayag, pinadasna ti simbaan ti Romano Katoliko. Nupay kasta, kalpasan ti adu a daras a pannakimisana, nadlawna manen ti kinamanaginsisingpet ken kinaagum, kasta met ti naluho a panagbiag ti padi. Isut’ nakaluksaw ket insardengnan ti mapan sadiay. Masdaaw ti padi no apay a pimmanaw. Idi naammuanna ti makagapu, kinunana iti makalais a pamay-an: “No tarigagayam ti makitimpuyog kadagiti pudpudno a naistrikto a tattao, mapanka kadagiti Saksi ni Jehova.” Inimtuodna: “Sadinot’ ayanda?” Insungbat ti padi: “Addada iti asideg ti ahensia a mangas-asikaso ti suplay ti danum.” Iti sumuno nga aldaw binirukna ida ngem awan nasarakanna. Nupay naupay, kankanayon latta a sipapanunot kadagiti Saksi ni Jehova.
Maysa nga aldaw natimudna ti maysa a kaarrubana a mangsursuron iti sabali: “Madamdama maysakanto metten a Saksi ni Jehova!” Apaman a nangngegna dayta, nagdardaras a napan ti babai iti kaarrubana ket dinamagna: “Adda kadi Saksi ni Jehova ditoy?” “Wen,” ti sungbat. “Dadduma ti umayto iti sangakaarrubaan a mangasaba iti binalaybalay. Mailasinmonto ida babaen ti nadalus ken nadalimanek a panagkawkawesda.” Idin rimuar ket nagdardaras a binirukna ida. Idi damo awan nasarakanna, ngem idi magmagna nga agsubli idiay pagtaenganna, nadlawna ti dua a babbai a nakadaldalimanek ti panagkawesda a makisarsarita iti maysa a tao. Isut’ immasideg ket dinamagna no isuda ket Saksi ni Jehova. Idi kinunada a kasta nga agpayso, isut’ nagpakpakaasi: “Pangaasiyo umaykayo idiay balay. Kayatkot’ makisarita kadakayo.”
Nairugi ti panagadal ti Biblia, ket iti baet ti ibubusor ken pananglais dagiti kameng ti pamiliana, daytoy a babai nangrugin a makigimong ken mangasaba kadagiti kabagianna.
Pudno nga ammo ni Jesus dagiti karnerona ket ur-urnongenna ida iti organisasionna maipaay iti pannakailasat nga agturong iti baro a lubong ti kinalinteg.