Report Dagiti Manangiwaragawag ti Pagarian
“Ti Dios Saan a Mangidumduma”
SANGARIBU siam a gasut a tawenen ti napalabas, imbaga ni napaltiingan nga apostol Pedro: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Kadagiti Saksi ni Jehova masarakan dagiti tao a naggapu iti amin a puli ken relihion. Tarigagayanda ti kinalinteg, ket agbutengda iti Dios. Awaten ni Jehova ida amin iti baro a lubong a kagimongan, kas iti inaramidna iti maysa a babai idiay Chad.
Saan a mapnek iti relihionna daytoy a babai. Adu a tawen ti napalabas, isut’ immawat iti maysa a kopia ti libro a Ti Kina-Agtutuboyo—Pananggun-od ti Kasayaatan iti Dayta, nga impablaak dagiti Saksi ni Jehova, ket inapresiarna ti nagsayaatan a balakad a linaon ti libro. Narugian ti panagadal iti Biblia, ket kankanayon nga adda sadiay maipaay iti panagadal. Nupay kasta, idi naawis a tumabuno kadagiti gimong idiay Kingdom Hall, saan a napan. Apay? Nupay saan a binusor ni lakayna ti pannakipagadalna, pinagelanna a tumabuno kadagiti gimong idiay Kingdom Hall.
Idi tinarigagayan ti asawa a babai ti tumabuno iti asamblea sirkito, ti Saksi a mangyad-adal impakitana iti asawa a lalaki ti programa, a mangitamtampok iti nagsayaatan a balakad a maiparang. Pinalubosanna ti asawana a mapan ti “maminsan laeng.” Timmabuno ket tinagiragsakna unay ti programa. Kalpasan nga inlawlawagna ken ni lakayna ti naadalna, dinan pinagelan a tumabuno iti dadduma pay a panaggigimong. Nasdaaw unay a nakaammo a ti kongregasion ket buklen dagiti tattao manipud iti nagduduma nga etniko a grupo nga agpipinnateg unay iti maysa ken maysa. Idi agangay timmabuno iti kumbension distrito ket kasta unay ti ragsakna a makakita kadagiti annakna a saksakloten dagiti Saksi manipud iti sabsabali a pagilian. Inraman dagiti Saksi ni Jehova ti taraonda kadagiti ubbing, ken trinatoda ida kas kameng ti pamilia. Daytoy ti namagbalbaliw unay kenkuana.
Ngem simmaruno ti ibubusor. Nupay managbabain, rinugianna ti agkomento kadagiti panaggigimong ken situtured a sinarangetna dagiti negatibo a komento dagiti kakabagian ken kaarruba. Adun a tawen nga agdendennada ken ni lakayna, ngem basta pinagtulaganda laeng ti panagtiponda kas agassawa a mayannurot iti tradisionda. Kasanona nga ibaga a masapul a pagbalinenda a legal ti panagasawada? Kalpasan ti napasnek a panagkararag ken Jehova, kinasaritana ni lakayna, a nangikuna a kitaenna no ania ti maaramidanna. Kamaudiananna nagtignay ni lakayna, ket legalen ti panagasawada.
Namataud ti ipagna a makipagnanaed kadakuada iti adu a parikut, ngem insakit ti asawa a lalaki ni baketna. Idi kuan simmarungkar ti ama ti asawa a lalaki. Minandaranna ti anakna a lalaki nga isinana ni baketna, gapu ta binalbaliwanna ti relihionna. Kinuna ti ama iti anakna nga isu ti makaammo iti sab-ong a maipaay iti “nasaysayaat nga asawa.” Kinuna ti anak a lalaki: “Saan, diak aramiden dayta. Naimbag isuna nga asawa. No kayatna ti pumanaw, sabali a saritaan dayta, ngem diakto pulos papanawen.” Nakadaydayaw ti asawa a babai iti katuganganna a lalaki, ket mababain [ti katuganganna] gapu iti kababalinna. Nupay kasta, idi nagsubli iti purokda, sinuratanna ti anakna a lalaki, nga iti daytoy a gundaway inikkanna iti ultimatum. Kinunana a no agkedked ti anakna a lalaki a mangpapanaw ken ni baketna, saannanton nga ibilang kas anak. Kimmappon manen ti anak a lalaki ken ni baketna. Darepdepenyo ti rag-o ti asawa a babai iti pannakakitana ken ni lakayna nga addaan kasta a natibker a pangngeddeng.
Ita pagay-ayat dagiti dua nga annakda a lallaki ti kumuyog ken ni nanangda idiay Kingdom Hall. Nagpagatangda pay ketdi ken ni tatangda iti kurbata, agsipud ta nakitada a nakakurbata dagiti amin a kakabsat a lallaki a nangipaay kadagiti palawag. Ita maysan a bautisado a kabsat daytoy a babai.
Maysa isuna kadagiti 345 a nararagsak a Saksi idiay Chad a mangiwarwaragawag ti naimbag a damag ti Pagarian ni Jehova ken mangap-apresiar iti kinapudno a “ti Dios saan a mangidumduma.”