Report dagiti Manangiwaragawag ti Pagarian

Ti Ayat Pagkaykaysaenna dagiti Pamilia

TI PANAGKAYKAYSA ti pamilia ket maibanag laeng no ti panagasawa ket naibatay iti ayat nga iwanwanwan ti kinaawan agum. Ti kasta nga ayat agtaud ken Jehova, ti Dios iti ayat, gapuna dayta ket bunga ti espiritu ti Dios. (Galacia 5:22, 23; 1 Juan 4:8) Dagiti sumaganad a kapadasan iyilustrarda no kasano a ti ayat a naibatay iti pannakaammo iti Biblia pinagkaykaysana dagiti pamilia.

Hong Kong

◻ Idiay Hong Kong maysa a payunir ti nangirugi iti panagadal iti Biblia iti maysa nga asawa a babai ken iti dua nga annakna a babbai. Ti lalaki inyebkasna ti pannakaseknan a mabalin nga isut’ mairamraman iti maysa a radikal a relihiuso a grupo. Insingasing ti payunir iti babai nga awisenna ti lalaki a makipagadal ket ikeddengna a mismo, isu nga inaramidna. Kabayatanna, ti babai nangrugin a tumabuno kadagiti gimong, ngem isut’ addaan iti parikut a panangsanay kadagiti annakna. Kankanayon nga ungtanna ti inauna ket sobra met ti panangpampanuynoyna iti inaudi. Idin naammuanen a ti babai ken ti lalaki addaanda kadagiti parikut. Ti panagapada masansan a nagbanag iti kinaranggas, ket iti sumagmamano a daras masapul a maayaban ti polis. Ti payunir inusarna ti nabileg a Sao ti Dios a mangisuro kadakuada no kasano ti panangiparangarang iti nadiosan nga ayat iti panagasawada. Di nagbayag dagiti daan nga aw-awidda ken ug-ugalida nangrugin a nagbalbaliw. Isuda a dua kanayondan a makigimgimong, ket ti naragragsak a kasasaad naruayen iti pagtaengan. Insardengen ti lalaki ti agsigarilio ket itan nakikaduan iti Teokratiko nga Eskuelaan ti Panagministro. Ti babai ket maysan a nabautisaran a manangibunannag.

Ti panagkaykaysa ti pamilia ket naibanag babaen ti panangipakita iti ayat, maysa a bunga ti espiritu ti Dios.

Britania

◻ Maysa a kapadasan manipud Britania iyilustrarna no kasano a bendisionan ni Jehova ti maysa a lalaki a mangipakita iti ayat, anus, ken panagibtur iti pannakilangen iti asawana. Idi dimteng ti lalaki iti kinapudno 12 a tawen a napalabasen, ti nakaro nga ibubusor ti babai ti nangiturong kenkuana a mangala iti diborsio. Nupay kasta, ti lalaki intultuloyna ti nangipakita kenkuana iti asi, a siguraduenna nga isut’ maaywanan a naimbag iti pinansial, mangaramid kadagiti babassit a trabaho a maipaay kenkuana a kankanayon. Kalpasan ti uppat a tawen ken nupay dati a bumusbusor, inkeddengna ti mangdakamat manen iti kinapudno kenkuana. Idi insingasingna a maysa a kabsat a babai ti makipagadal ti Biblia kenkuana, inawatna dayta, isu a nakasdaawanna. Kamaudiananna innalanan ti takderna iti kinapudno ket nabautisaran. Ti lalaki pulos a dina napukaw ti ayatna kenkuana, ket idi pinaneknekanen ti babai nga inawatnan ti kinapudno, dinawatna ti panangasawana manen kenkuana. Isut’ naragsakan, a pulos a dina inanamaen ti panangaramid ti lalaki iti daytoy gapu iti napalabas a dakes a kababalinna. Dagitoy nagasawadan iti ngangnganin walo a tawen, ket isuda a dua rumangrang-ayda a naimbag iti kinapudno.

Sud Pacifico

◻ Nasurok a 20 a tawenen ti napalabas, maysa nga agtutubo a lalaki iti maysa nga isla iti Tuvalu iti Sud Pacifico nagsurat iti Watch Tower Society nga agkalkalikagum iti literatura. Awan ti Saksi iti isla iti dayta a tiempo. Nupay kasta, binasana ti literatura a bukodna ket nabigbigna dayta kas ti kinapudno. Ti asawana, nupay kasta, binusorna iti kasta unay ti baro a pammatina, gapuna binaybay-anna dayta.

Di nagbayag, idi adda magun-odanen a literatura iti Tuvaluan, nakagun-od ti asawa a babai kadagiti dadduma a publikasion ket nabasana ida a mismo. Itan nabigbigna ti kinapudno ket nagreklamo iti asawana: “Kadagitoy amin a tawtawen addaanka iti lawag, ngem dika intandudo dayta. Apay a dika pulos inlawlawag kaniak no apay a mamatika nga umiso dagiti Saksi?” Itan ta nagkaykaysadan iti kinapudno iti Biblia, daytoy nga agasawa rinugiandan ti makitimpuyog kadagiti Saksi.

Idi nagawid dagiti annakda a babbai, nga ages-eskuela idiay Fiji, impakaammo dagiti nagannak ti pangngeddengda nga agbalin a Saksi ni Jehova. Pinaregtada dagiti ubbing a babbai a makikadua kadakuada nga agadal iti Biblia, ngem iti pakasdaawanda, nasarakanda a tumabtabunodan kadagiti gimgimong idiay Fiji. Ti pamilia siraragsak a nagkaykaysada nga immawat iti kinapudno, ket ti ama, ti ina, ken maysa kadagiti annakda a babbai nagbalindan a manangibunannag ti Pagarian.

Anian a rag-o ti pannakakita no kasano a ti kinapudno ken ti ayat pagkaykaysaenna dagiti pampamilia iti intero a lubong.