Panangmatmat iti Lubong
Awan pay 25% kadagiti German a nababbaba ngem 40 ti edadna ti mayat iti inaldaw a panagkararag a kadua ti annakda, ken kadagiti miembro ti simbaan, 4 laeng iti kada 10 ti mangibilang a napateg dayta.—APOTHEKEN UMSCHAU, GERMANY.
Adda nagidonar iti semilia a di naduktalan a depektibo ti gene-na a nainaig iti sakit ti puso. Naipatawidna dayta iti 9 kadagiti 24 a naammuan a putotna. Natayen ti maysa nga agtawen iti dua gapu iti sakit ti puso.—JAMA, U.S.A.
“Patien ti nasurok a 50% a Ruso a ti korapsion ket di maliklikan ken permanenten a paset ti biag.”—RIA NOVOSTI, RUSSIA.
Manmano ti Pudno a Gagayyemda
“Tallo laeng ti pudno a gayyem a mapagtalkan ti gagangay a Briton,” kuna ti Daily Telegraph ti London. Sigun iti panagadal, dagiti rason a mapukaw ti maysa a tao “ti agarup 36 a gayyemna iti adun a tawen” ket ti “kinaokupadona,” ‘in-inut a panaginnaddayo’ ken, kas iti napasamak iti 43% kadagiti nasurbey, “panagapa . . . ken ti din pulos pannakisarita.” Dandani 20% ti agpabalakad kadagiti katrabahuanda, ta “awanen ti sabali pay a maasitganda.” Kinuna ti pannakangiwat dagiti nagsurbey: “Dakkel a banag ti panagbalin a mapagtalkan ken mapagpannurayan.”
Submarino a Pagipuslit iti Droga
Umad-adu ken sumiksikap ti pamay-an dagiti sindikato ti droga idiay Colombia tapno maipuslitda ti cocaine iti Central America, Mexico, ken Estados Unidos. Sipud idi 1993, di kumurang nga 42 a di unay lumned a submarino ti natiliw dagiti autoridad idiay Colombia. Nasukalan met ti adu a lugar a pakaar-aramidan dagita. Uray no saan a makapag-dive dagitoy a de krudo a lugan, narigat ida a masiputan ti radar. Ti sumagmamano ket makaadayo iti 3,200 a kilometro, makalaonda iti 6-10 a tonelada a cocaine, ken nalabit 46 milion a pisos ti gatadda.
Dagiti Pagsayaatan ti Sangapamiliaan a Pannangan
Kadagiti nabiit pay a nainterbiu a 14-16 anyos a taga-Finland, kurang a 50% ti mangan a kagiddan ti pamiliada. Naammuan iti panagadal nga iti adu a pagtaengan, awan ti maidasdasar a taraon. Ngem il-iliwen dagiti agtutubo dagita a regular ken naragsak a kanito a kaduada ti pamiliada. Idi napagsaludsodanda no ania ti kayatda kadagiti nagannakda, nalawag ti sungbatda: “Napudot a taraon, sangapamiliaan a pannangan, ken maysa nga adda tiempona a dumngeg kenka,” kuna ti diario a Helsingin Sanomat. Ti sangapamiliaan a pannangan ket dakkel ti epektona iti salun-at ti isip ti agtutubo. Sigun iti artikulo, “dagiti agtutubo a makigiddan iti pannangan ti pamilia ket masansan a nalalaingda nga estudiante, manmano kadakuada ti madepres, agsigarilio, aginum, wenno agdroga.”