Mangpaneknek ti Naikahon a Taraon

KALPASAN ti ginggined idiay Kobe, Japan, idi Enero, adu nga aldaw a narigatan dagiti tattao nga agbirok iti taraon iti dayta a naapektaran a lugar. Kaskasdi, di naawanan iti taraon dagiti Saksi ni Jehova, gapu iti naasi a tulong dagiti gagayyemda. Iti immuna a dua wenno tallo nga aldaw kalpasan ti ginggined, nangipaay dagiti kabangibang a kongregasion iti innapuy. Di nagbayag, nangipaay dagiti naasi a gagayyem kadagiti naikahon a taraon. Adu ti nairagpin a surat kadagiti naikahon a taraon, a mangyeb-ebkas iti pannakaseknan kadagiti naapektaran. Kinuna dagidiay immawat iti taraon a tunggal pannangan ket “naasinan iti lulua” ta dida magawidan ti luluada idi basbasaenda dagiti surat.

Imburay dagiti Saksi ni Jehova ti taraonda kadagiti sabsabali nga agkasapulan. Mangal-aldaw idi ti maysa a Saksi bayat ti panagbiaheda babaen iti kotse a kaduana ti saan a Saksi a katrabahuanna iti isu met laeng a kompania. Isu nga imburayna ti maysa a naikahon a taraon a naawatna.

“Sadino ti nanggatangam iti daytoy naikahon a taraon?” inimtuod ti katrabahuanna. Inlawlawag ti kabsat ti panangtulong nga ar-aramiden dagiti Saksi. “Adun nga aldaw a diak nakapangan iti nateng. Ilasinko ti dadduma ket iyawidko para iti pamiliak,” siyayaman a kinuna ti lalaki.

Iti maikatlo a daras a napasamak daytoy, nangted ti katrabahuan iti 3,000 yen (agarup $35, E.U.) iti Saksi sana kinuna: “Pagaammok ti trabahoyo, isu a pangngaasim ta bay-annak nga agdonar para iti trabahoyo. Apresiarek ti panangiburaymo kaniak iti balonmo. Pudno, nakasaysayaat a tattao dagiti gagayyemmo.”