Report dagiti Manangibunannag ti Pagarian
Dagitoy Met Nagtalekda ken ni Jehova
ITI maysa a pagilian a sadiay ti edukasional a trabaho ti Biblia dagiti Saksi ni Jehova ti naiparit, sumagmamano nga agtutubo ti mangsalsaludsod ti bagida: “Aniat’ panggep ti biag? Sadino ti pakasarakan ti maysa ti kinapudno? Apay nga aglaplapusanan unay ti kinadakes?“ Saanda a nakagun-od kadagiti makapnek a sungbat manipud ti simbaan wenno manipud kadagiti dadakkelda. Ti alkohol ken panangabuso ti droga saan a nangyeg ti talna ti panunotda. Maysa kadagitoy nga agtutubo a lalaki ti nakaammo a maysa kadagiti gayyemna makipagad-adal ti Biblia kadagiti Saksi ni Jehova ket naikeddengna a tumabuno ti panagadal ti Biblia ken “isalakan” ti gayyemna babaen ti panangsapulna kadagiti pagkapuyan daytoy nga organisasion. Ti kasunganina ti nasarakanna—ti sungbat dagiti salsaludsod a mangrirriribuk kenkuana. Gapuna rinugianna ti makipagadal ti Biblia kadagiti Saksi ni Jehova. Idi agangay, ti kinapudno ti Biblia ti nangbalbaliw iti agtutubo a lalaki ket insardengna ti panagsigariliona, insardengna ti panagbarbartekna, ket rinugiannan a pakitaan ti ad-adu nga interes ti mismo a pamiliana.
Dagiti nagannak kenkuana ti nangpilit ti ipapanawna iti apartmentda agsipud ta bumusorda iti maad-adalna. Kalpasanna adda napasamak a pagarupda nga imposible koma. Isut’ nangala ti maysa a baro nga apartment, nga iti gagangay abutenna ti adu a tawtawen a magun-odan. Iti panagkomentona iti daytoy, ti agtutubo a lalaki ti nagkuna: “Gaput’ pannakaammok iti panggep ti Dios, ken panangiyaplikarko ti balakad ti Biblia iti panagbiagko, daytat’ namagbalin a posible ti pannakagun-odko manen ti kinatimbeng ti isipko ken tapno mataginayon ti kinaragsak ti pamiliak. Umanamong ni baketko kaniak, ket kumitkitakamin iti masanguanan nga addaan panagtalek.”
Ammon daytoy nga agtutubo a lalaki ita ti kaipapanan ti Proverbio 3:5, 6: “Nga agtalekka ken ni Jehova iti amin a pusom ken dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.”
Iti sabali pay a pagilian a sadiay ti trabaho dagiti Saksi ni Jehova ti naiparit, maysa a baket ti nakasao ti maysa a Saksi. Imbaga ti baket iti Saksi nga isut’ maup-upay iti biag. Natayen ni lakayna, ket dagiti annakna ti bastos kenkuana ket agsangsangit gaput’ kasasaadna. Ngem isut’ dimngeg iti makaliwliwa a naimbag a damag ti Pagarian ket nangipakita ti dakkel nga interes. Kayatna ti Saksi a makisao iti balasangna, a kunana a natangken ti ulona, masansan a mabarbartek, mannigarilio ken nagubsang panagsasaona.
Ti kabsat a babai ti simmarungkar iti balasangna, a dimngeg iti mensahe ti Pagarian ket nabigbigna ti dakkel a pateg ti kinapudno. Isut’ immanamong iti panagadal ti Biblia, ket ti pannakabalin dagiti Kasuratan ti nangbalbaliw ti panagbiagna ket indedikarnan ti biagna ken Jehova ket nabautisaran. Inaramidna daytoy uray pay sakbay a ni nanangna, nagsagsagana metten a mangala iti dayta nagpateg nga addang. Di nagbayag ti balasangna ti makipagad-adal metten kadagiti tallo pay a nagduduma nga indibidual.
Mailadawanyo kadi ti ragsak ti ina ken ti balasangna ita? Pudno nga adda rasonda a maragsakan ta nagtalekda ken Jehova a Dios ken iti naayat a saganana a maipaay iti biag nga agnanayon.—Salmo 56:11.