Nasingsingedka Kadi iti Dios No Parigatem ti Bagim?

Ti Panangmatmat ti Biblia

Nasingsingedka Kadi iti Dios No Parigatem ti Bagim?

ADU ti masimron iti kapanunotan a panangparigat iti bagi. Nupay kasta, maibilang a managbuteng iti Dios dagidiay managdaydayaw a mangtutuok iti bagida babaen ti panangsaplit, nakaro a panagayunar, ken panangisuot iti nakersang a kawes a naaramid iti muldot ti animal a nairanta a manggasgas iti kudilda. Saan la nga idi un-unana a maar-aramid dagita. Sigun kadagiti nabiit pay a damag, uray dagiti nalatak a panguluen ti relihion parparigatenda ti bagida babaen ti panangsaplitda iti dayta.

Ania ti nangtignay kadakuada nga agdayaw iti kasta a pamay-an? Kas imbaga ti pannakangiwat ti maysa nga organisasion nga agkunkuna a Kristiano, ti “situtulok a panangparigat iti bagi ket maysa a pamay-an tapno ti tao maikaykaysa ken Jesu-Kristo ken mapasaranna met dagiti rigat a situtulok nga inibturan ni Kristo tapno subbotennatayo manipud iti basol.” Aniaman ti kapanunotan dagiti panguluen ti relihion, ania ti ibagbaga ti Biblia maipapan iti daytoy?

Tagipatgem ti Bagim

Saan nga iparegta wenno anamongan ti Biblia ti panagdayaw iti Dios buyogen ti panangparigat iti bagi. Kinapudnona, kanayon nga idagadag ti Biblia kadagiti managbuteng iti Dios nga aywananda ti bagida. Usigem ti panangdeskribir ti Biblia iti panagdinnungngo ti agassawa. Inyaspingna dayta iti natural a panangtrato ti lalaki iti mismo a bagina ket indagadagna: “Dagiti lallaki ayatenda dagiti assawada a kas kadagiti bukodda a bagi . . . Awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion.”—Efeso 5:28, 29.

Ania koma ngay ti serserbi ti bilin nga ayaten ti maysa ti asawana a kas iti bagina no mainanama met gayam kadagiti agserserbi iti Dios a ranggasanda ti bagida bayat ti panagdaydayawda? Nalawag a dagiti mangipatpateg kadagiti prinsipio ti Biblia ket mainanama a tagipatgen ken ayatenda pay ketdi ti mismo a bagida. Rumbeng nga ipakitada met iti asawada ti kasta nga umno a panagayat iti bagi.

Maitunos iti dayta, aglaon ti Biblia iti adu a prinsipio a tumulong kadagiti agbasbasa a mangipateg iti bagida. Kas pagarigan, dakamaten ti Biblia ti pagimbagan ti kalkalainganna a panagehersisio. (1 Timoteo 4:8) Ipakaammona met ti dadduma a makaagas a taraon ken ipasimudaagna dagiti makadangran nga epekto ti di pannangan iti nasustansia. (Proverbio 23:20, 21; 1 Timoteo 5:23) Iparparegta ti Biblia kadagiti tattao nga agtalinaedda a nasalun-at tapno ad-adu ti maaramidanda. (Eclesiastes 9:4) No dagiti agbasbasa iti Biblia ket mainanama nga aywananda ti salun-atda kadagitoy a pamay-an, ania koma ti panggapuanda a mangdangran iti bagida?—2 Corinto 7:1.

Rumbeng Kadi a Tuladen Dagiti Kristiano ti Panagsagaba ni Jesus?

Kaskasdi, dagiti panagsagaba nga inibturan ni Jesus ken dagiti nagkauna a pasurotna ket sibibiddut nga us-usaren ita ti dadduma nga organisasion tapno iparegtada ti panangparigat iti bagi. Ngem dagiti rigat a dineskribir dagiti adipen ti Dios iti Biblia ket saan a pulos a panangparigat iti bagi. Idi tinukoy dagiti Kristiano a nagsurat iti Biblia ti panagsagaba ni Kristo, inlanadda dayta tapno paregtaen dagiti Kristiano nga agibtur iti pannakaidadanes, saan a tapno idadanesda ti mismo a bagida. Saan ngarud a ni Jesu-Kristo ti tultuladen dagidiay mangtutuok iti bagida.

Kas panangyilustrar: Nakitam ti nasinged a gayyemmo a pagsasawan ken kabkabilen ti bunggoy dagiti nauyong a tattao. Nadlawmo a kalmado latta ti gayyemmo ken di bumalbales. No kayatmo a tuladen ti gayyemmo, kabilem ken pagsasawam met kadi ti bagim? Siempre saan, ta ti inaramid ti bunggoy no kuan ti tultuladem. Ikagumaam ketdi a liklikan ti agibales no mapasamak met kenka dayta.

Nalawag ngarud a saan a mainanama a parigaten dagiti pasurot ni Kristo ti bagida a kasla ket kasapulan a tuladenda ti nauyong a bunggoy a nangtutuok ken nangipamuspusan a mangpapatay ken Jesus. (Juan 5:18; 7:1, 25; 8:40; 11:53) Imbes ketdi, no maidadanesda, tuladenda ti kalmado a panangibtur ni Jesus iti pannakaparigat.—Juan 15:20.

Panangballikug iti Kasuratan

Sakbay pay ti panawen dagiti Kristiano, ti aniaman a panangdangran iti lasag ket imparit ti Kasuratan a mangtartarawidwid iti biag ken panagdaydayaw dagiti Judio. Kas pagarigan, sibabatad nga imparit ti Linteg ti panangsugatsugat dagiti Judio iti bagida—kaugalian a kadawyan kadagiti nagkauna a nasion a di Judio. (Levitico 19:28; Deuteronomio 14:1) No saan a kayat ti Dios a masugatan ti bagi, dina met ngarud kayat a madunor dayta babaen kadagiti saplit. Nalawag ti pagalagadan ti Biblia—pulos a di anamongan ti Dios ti aniaman a pamay-an ti inggagara a panangdangran iti mismo a bagi.

No kasano a kayat ti maysa nga artist a maraem ti obrana, kayat met ti Namarsua a ni Jehova a Dios a maraem ti pinarsuana a bagi ti tao. (Salmo 139:14-16) Kinapudnona, ti panangparigat iti bagi dina pagbalinen a nasingsinged ti relasiontayo iti Dios. Maikaniwas ketdi dayta iti pannursuro dagiti Ebanghelio.

Napaltiingan ni apostol Pablo a mangisurat maipapan kadagiti mangirurumen a doktrina nga inaramid ti tao: “Dagidiay met laeng a banag agik-ikutda iti maysa a langa ti kinasirib iti kabukbukodan nga impasdek a porma ti panagdaydayaw ken sinsinan a kinapakumbaba, maysa a nakaro a panangparigat iti bagi; ngem awan pategda iti panangsaranget iti panangpennek iti lasag.” (Colosas 2:20-23) Talaga nga awan a pulos ti pateg ti panangparigat iti bagi tapno agbalin ti maysa a nasingsinged iti Dios. Imbes ketdi, makapabang-ar, nalanay, ken nalag-an dagiti maikalikagum iti pudno a panagdaydayaw iti Dios.—Mateo 11:28-30.

NAPANUNOTMO KADIN?

● Ania ti panangmatmat ti Dios iti bagi ti tao?—Salmo 139:13-16.

● Maparmekmo kadi dagiti di umiso a tarigagay babaen ti panangparigatmo iti bagim?—Colosas 2:20-23.

● Nairanta kadi a makapadagsen wenno naulpit ti pudno a panagdaydayaw?—Mateo 11:28-30.

[Blurb iti panid 11]

Nalawag ti pagalagadan ti Biblia—pulos a di anamongan ti Dios ti aniaman a pamay-an ti inggagara a panangdangran iti mismo a bagi

[Ladawan iti panid 10]

Maysa a deboto a nakaparintumeng nga umul-uli iti maysa a simbaan

[Credit Line]