“Diakon Maidisso Dayta!”
● Iti intero a lubong, iyeb-ebkas dagiti agtutubo ti panangapresiarda iti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2.a Usigem ti sumagmamano a pagarigan:
“Apresiarek ti panangiparegta ti libro iti pannakisaritami kadagiti nagannakmi. Sinurotko dagiti singasing ket ita, makunak a simmayaaten ti komunikasionmi kadagiti nagannakko.”—Roberto, Mexico.
“Idi rinugiak a basaen ti libro, diakon maidisso dayta! Magustuak ti paset a ‘Dagiti Aramidek’ iti ud-udi ti tunggal kapitulo ken ti panid a ‘Ti Notak’ iti ngudo ti kada benneg.”—Joelah, Estados Unidos.
“Bayat nga umad-adu ti mabasak, ad-adda met a natignayak kadagiti impormasion. Bilibak iti imbaga ti adu nga agtutubo, agraman dagiti kahon nga ‘Ammom Kadi?’ ken ‘Balakad.’ Inlawlawag kaniak daytoy a libro a ti Bagi a Manarawidwid dagiti Saksi ni Jehova ket interesado kadagiti agtutubo!”—Hui-won, South Korea.
“Kadagiti amin a libro nga impablaak dagiti Saksi ni Jehova, daytoy ti magusgustuak unay. Ammoyo ti eksakto a pampanunoten dagiti tin-edyer ken dagiti problemada iti pamilia, eskuelaan, ken gagayyemda.”—Shana, Canada.
“Kada agapa ti dadakkelko, mapanak agsangit iti kuartok. Ngem idi nabasak ti kapitulo 24 nga ‘Ania ti Aramidek no Agapa Dagiti Dadakkelko?,’ naituredko ti nakisarita kadakuada maipapan iti dayta. Naklaatda a nakaammo a nakaro gayam ti epekto kaniak ti panagap-apada. Binasada met dayta a kapitulo. Ita, ad-addan a maawatanda ti riknak ket manmanodan nga agapa.”—Mariana, Czech Republic.
“Nagustuak unay dagiti panid nga ayan ti ‘Nasayaat nga Ulidan.’ Dagita ti nakatulong tapno mailintegko dagiti pagkapuyak. Kas pagarigan, iti kongregasion Kristiano, marigatanak a makigayyem kadagiti diak unay am-ammo. Ngem mabasa iti panid 97 no kasano a naam-ammo a naimbag ni Lidia da Pablo ken ti kakaduana babaen ti panangpadagusna kadakuada. Kasta metten ti ar-aramidek.”—Mónika, Hungary.
[Footnote]
a Impablaak dagiti Saksi ni Jehova.
[Kahon/Ladawan iti panid 25]
“PANAGDENNA SAKBAY TI PANAGKASAR—APAY A DAKES?”
Ni Katrina ket agtawen iti 16 ken agnanaed idiay Estados Unidos. Iti speech class-da, naikkan iti asaynment nga agreport maipapan iti suheto a pilienna. Inusarna a naimbag ti libro a Dagiti Saludsod nga Iyimtuod ti Agtutubo—Dagiti Sungbat nga Epektibo, Tomo 2, ket pinilina ti suheto a “Panagdenna Sakbay ti Panagkasar—Apay a Dakes?” Kinuna ti nagannakna: “Iti reportna, inlawlawag ni Katrina ti kaipapanan ti di pannakidenna, dagiti peggad ti pannakidenna sakbay ti panagkasar, ken dagiti makadangran a resulta ti panagsukir kadagiti moral a pagalagadan ti Dios. Binasa met ni Katrina manipud iti libro ti imbaga ti dadduma nga agtutubo kalpasan a sinukirda dagiti pagalagadan ti Dios. Kalpasanna, inawisna nga agsaludsod dagiti kaklasena sana sinungbatan ida. Idi nalpas ti reportna, isu ket sinuratan ti maestrana. Kastoy ti paset dayta: ‘Pagyamanan iti napudno ken makaisuro a reportmo maipapan iti suheto a di ammo ti adu a tattao. Itultuloymo ti nabileg a pammatim.’”