Ti Panangmatmat ti Biblia

Apay a Magurgura Dagiti Pudno a Pasurot ni Jesus?

“Dagiti tattao iyawatdakayto iti rigat ken papatayendakayto, ket puntiriakayto ti pananggura ti amin a nasnasion maigapu iti naganko.”—MATEO 24:9.

SINAO ni Jesus dagita sumagmamano la nga aldaw sakbay ti nakaul-ulpit a pannakapapatayna. Iti rabii sakbay ti ipapatayna, kinunana kadagiti matalek nga apostolna: “No indadanesdak, idadanesdakayto met.” (Juan 15:20, 21) Ngem apay a gurguraen dagiti tattao dagidiay agtultulnog ken Jesus ken mangikagkagumaan a mangtulad kenkuana, idinto ta impaay ni Jesus ti bagina maigapu iti sabsabali, nangliwliwa kadagiti nakurapay, ken nangipaay iti namnama kadagiti maikuskuspil?

Ipalgak ti Biblia dagiti espesipiko a makagapu. No usigentayo dagitoy, matarusantayo no apay a dagidiay sumursurot ita ken Kristo ket maipaspasango iti adu nga ibubusor a kas kadagiti napasaranna.

Gapu iti Kinaignorante

Imbaga ni Jesus kadagiti pasurotna: “Um-umayen ti oras inton tunggal maysa a mangpapatay kadakayo pagarupennanto a nakaipaay iti sagrado a panagserbi iti Dios. Ngem aramidendanto dagitoy a banag agsipud ta saanda a naam-ammo uray ti Ama wenno siak.” (Juan 16:2, 3) Pudno nga adu a bumusbusor ti agkunkuna nga agserserbida iti Dios a pagserserbian ni Jesus, ngem naimpluensiaanda kadagiti palso a narelihiosuan a pammati ken tradision. Wen, adda “regtada iti Dios; ngem saan a maitunos iti umiso a pannakaammo.” (Roma 10:2) Ti maysa kadagita ket ni Saulo iti Tarso, nga idi agangay nagbalin a Kristiano a ni apostol Pablo.

Ni Saulo ket kameng ti grupo a pagaammo kas dagiti Fariseo, maysa a sekta dagiti Judio a napigsa ti impluensiana iti politika ken bumusbusor iti Kristianidad. “Sigud a managtabbaawak ken manangidadanes ken nakuspag a tao,” inadmitir idi ni Saulo. Kinunana pay: “Ignoranteak idi ken nagtignayak a buyogen ti kaawan ti pammati.” (1 Timoteo 1:12, 13) Ngem dagus a nagbalbaliw apaman a naammuanna ti kinapudno maipapan iti Dios ken ni Jesu-Kristo.

Kasta met la ti mapaspasamak ita iti adu a dati a bumusbusor. Dadduma kadakuada ket kas ken Saulo, a nagbalin a puntiria met laeng ti pannakaidadanes. Ngem dida agibalbales ta sursurotenda ti balakad ni Jesus: “Itultuloyyo nga ayaten dagiti kabusoryo ken ikararagan dagidiay mangidaddadanes kadakayo.” (Mateo 5:44) Ikagkagumaan dagiti Saksi ni Jehova nga iyaplikar dayta, bareng no agbaliw ti kababalin ti dadduma kadagiti bumusbusor a kas iti napasamak ken Saulo.

Gapu iti Apal

Apal ti makagapu nga adu idi ti bimmusor ken Jesus. Kinapudnona, ni Poncio Pilato a gobernador ti Roma ‘ammona a gapu iti apal a ni Jesus inyawat dagiti panguluen a papadi’ tapno mailansa. (Marcos 15:9, 10) Apay a ni Kristo ket ap-apalan dagiti panguluen ti relihion dagiti Judio? Ti maysa a rason ket ti kinalatakna kadagiti lalaisenda nga ordinario a tattao. “Ti lubong simmuroten kenkuana,” inreklamo dagiti Fariseo. (Juan 12:19) Kasta met nga idi impangag ti tattao ti inkasaba dagiti pasurot ni Kristo, dagiti relihioso a bumusbusor ‘napnoda manen iti imon’ ken pinagsasawanda dagiti Kristiano nga ebanghelisador.—Aramid 13:45, 50.

Masuron ti dadduma a bumusbusor iti kinasayaat ti kababalin dagiti agserserbi iti Dios. Kinuna ni apostol Pedro kadagiti padana a Kristiano: “Agsipud ta saankayo nga agtultuloy a makipagtaray kadakuada [dagiti nadangkes] iti daytoy a dalan nga agturong iti isu met laeng a lugnak ti kinagaramugam, masmasdaawda ket itultuloyda ti agsao a sibabassawang kadakayo.” (1 Pedro 4:4) Kasta met la ti mapaspasamak ita. Siempre, nupay dagiti pudno a Kristiano likliklikanda dagiti dakes a kababalin, dida aginlilinteg ken agtignay a natantan-ok ngem iti sabsabali. Kinapudnona, saan a Nakristianuan dayta, ta managbasol ti amin a tao ken agkasapulan iti asi ti Dios.—Roma 3:23.

Magurgurada Gapu ta ‘Saanda a Paset ti Lubong’

“Dikay ayaten ti lubong wenno uray ti bambanag nga adda iti lubong,” kuna ti Biblia. (1 Juan 2:15) Ania a lubong ti tuktukoyen ni apostol Juan? Ti lubong ti sangatauan a naisina iti Dios ken agpaspasakup ken Satanas—ti “dios daytoy a sistema ti bambanag.”—2 Corinto 4:4; 1 Juan 5:19.

Nakalkaldaang ta dadduma kadagidiay agayat iti lubong ken kadagiti dakes a dalanna guraenda dagidiay mangikagkagumaan a mangannurot kadagiti pannursuro ti Biblia. Gapuna, kinuna ni Jesus kadagiti apostolna: “No pasetnakayo koma ti lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.”—Juan 15:19.

Anian a makapaladingit ta gurguraen ti tattao dagidiay agserserbi ken Jehova gapu ta dida ay-ayaten ti lubong nga iturturayan ni Satanas, a napno iti korapsion, kinaawan hustisia, ken kinaranggas! Kayat ti adu a maseknan a tattao a pagbalinen ti lubong a nasaysayaat a pagnaedan, ngem dida kabaelan a pagpatinggaen ti di makita nga agturturay iti dayta. Ni Jehova laeng ti makabael a mangpukaw ken Satanas—ket aramidennanto dayta babaen iti naan-anay a panangdadael kenkuana, a kas man la babaen iti apuy!—Apocalipsis 20:10, 14.

Dayta a nagsayaat a namnama ket maysa a kangrunaan a paset ti nagpateg a “naimbag a damag ti pagarian” nga iwarwaragawag dagiti Saksi ni Jehova iti intero a lubong. (Mateo 24:14) Wen, kombinsido dagiti Saksi a ti laeng Pagarian ti Dios, ti gobierno nga iturturayan ni Kristo, ti mangyeg iti manayon a talna ken kinaragsak ditoy daga. (Mateo 6:9, 10) Gapuna, itultuloyda nga iwaragawag dayta a Pagarian ta ibilangda a napatpateg nga amang ti anamong ti Dios ngem ti anamong ti tattao.

NAPANUNOTMO KADIN?

● Apay a binusor ni Saulo iti Tarso dagiti pasurot ni Kristo?—1 Timoteo 1:12, 13.

● Ania a dakes a kababalin ti nangtignay iti dadduma a bumusor ken Jesus?—Marcos 15:9, 10.

● Ania ti panangmatmat dagiti pudno a Kristiano iti lubong?—1 Juan 2:15.

[Ladawan iti panid 21]

Idi 1945, napasaran dagiti Saksi ni Jehova ti kinaranggas dagiti managderraaw idiay Quebec, Canada, gapu iti panangikasabada iti naimbag a damag maipapan iti Pagarian ti Dios

[Credit Line]

Impaay ti Canada Wide