Nadisenio Kadi?

Ti Shell ti Scaly-Foot Snail

● Ti scaly-foot snail (maysa a kita ti bisukol) a masarakan iti lansad ti Taaw Indiano ket maysa kadagiti addaan iti katangkenan a shell a nadiskobre iti nakaparsuaan. Madaeranna ti puersa ti danum iti kaadalem a 2,400 a metro. Kanayonanna, makapagbiag daytoy a moluska uray no nakaro ti kinaasido ti danum ken agbaliwbaliw ti temperatura, a pakairamanan ti napudot a danum a pumsuak manipud kadagiti rengngat iti tukok ti taaw. Mangsalaknib met ti shell-na manipud kadagiti mangkaan kenkuana.

Usigem: Adda tallo a katuon ti shell ti scaly-foot snail. Ti makinruar ket buklen dagiti iron sulfide; ti makintengnga ket umarngi iti protina a naikalupkop iti shell ti dadduma a kita ti moluska; ti makin-uneg ket buklen ti mineral a calcium a maawagan iti aragonite. Gapu iti tallo-katuon a shell-na, di iginggina ti scaly-foot snail ti panangipit dagiti agkaan a rasa a mangikagumaan a mangrumek iti shell babaen kadagiti napigsa nga ipitda. Mabalin a di inggaan ti rasa nga ipiten dayta iti adu nga aldaw ngem dina mabtak ti shell.

Babaen iti indenter, maysa nga instrumento a diamante ti murdongna, naammuan dagiti managsirarak a “nadisenio nga agrikki ti makinruar a katuon ti shell iti pamay-an a maagsep ti enerhia,” kuna ti magasin a Discover. “Agwara laeng dagiti rikki iti makinruar a katuon nga addaan kadagiti partikulo nga iron sulphide. Gapu kadagita a ‘babassit a rikki’ a mangagsep iti enerhia, sigurado a saanen a dumakkel pay dagita.” Ti met napuskol a makintengnga a katuon ti mangagsep iti mekanikal nga enerhia no adda mangdangran.”

Kayat dagiti managsirarak a tuladen ti disenio ti shell ti scaly-foot snail tapno makaaramidda kadagiti nalaglagda a helmet ken aruat a di masalput ti bala, agraman dagiti kaha ti barko ken eroplano. “Mausar met dayta uray kadagiti tubo a pagayusan iti langis a kanayon a madungpar dagiti iceberg,” kuna ti Discover.

Ania ti makunam? Naiparna la kadi a timmaud ti shell ti scaly-foot snail? Wenno nadisenio dayta?

[Diagram iti panid 23]

(Para iti aktual a pannakaurnosna, kitaem ti publikasion)

Indenter

Makinruar a katuon

Makintengnga a katuon

Makin-uneg a katuon

[Picture Credit Line iti panid 23]

Courtesy Anders Warén