Ti Shell ti Clusterwink Snail

● Adu a parsua iti baybay ti bioluminescent, wenno agpataud iti lawag. Naisangsangayan ti panangusar ti clusterwink snail iti dayta nga abilidad. No adda rasa a manggandat a mangkaan iti daytoy a kita ti susó ti baybay, agsanud iti shell wenno balayna sa “bigla nga agsilaw.” Mangpataud iti raniag a mangkigtot iti rasa. Ngem kasano a sumarut ti lawag iti balayna?

Usigem: Imbes a lapdan ti shell ti lawag, iwarasna ketdi dayta. Da Dimitri Deheyn ken Nerida Wilson a sientista iti Scripps Institution of Oceanography idiay San Diego, California, U.S.A., naduktalanda a ti lawag a patauden ti clusterwink snail ket agpapada ti pannakaiwarasna iti intero a shell. Mamin-10 a mas episiente ti pannakaiwaras ti lawag ngem iti mailaklako a diffuser a kapuspuskol dayta (0.5 mm). Mamin-8 pay a mas episiente ti shell a manglawag iti aglawlaw ngem kadagiti magatang a diffuser. Nakaskasdaaw ta daytoy a karkarna nga abilidad a mangiwaras iti lawag ket awan kadagiti shell dagiti di agandap a susó ti baybay nga asideg a kabagianda. Makapainteres ta daytoy a lawag ket isu ti kolor a kaadaywan ti madanonna iti uneg ti baybay.

Kuna ni Dr. Deheyn a ti panangadal iti clusterwink snail ket “mabalin a makatulong iti panagaramid kadagiti materiales a nasaysayaat a mangiwaras iti lawag.” Magunggonaan met iti dayta ti tay-ak ti medisina nga agus-usar iti lawag a mangdayagnos ken mangagas kadagiti sakit. Yantangay nagadun ti agus-usar iti light-emitting diode (LED), dagiti diffuser a mas episiente a manglawag manipud iti babassit a silaw ket makatulong tapno basbassit ti makonsumo a koriente.

Ania ti makunam? Babaen kadi iti ebolusion a timmaud ti shell ti clusterwink snail? Wenno nadisenio dayta?

[Ladawan iti panid 18]

Napadakkel a ladawan ti shell iti gagangay a lawag

[Ladawan iti panid 18]

Napadakkel a ladawan ti shell a mangiwarwaras iti lawag

[Picture Credit Lines iti panid 18]

Kannigid: www.robastra.com; tengnga ken kannawan: Impaay ni Dr. D. Deheyn, Scripps Institution of Oceanography, UC San Diego