Panangmatmat iti Lubong

Ti 17% kadagiti estudiante idiay Brazil nga agtawen iti 10-13 ket biktima dagiti naasing a maton wenno isuda a mismo ti mangbikbiktima.—O ESTADO DE SÃO PAULO, BRAZIL.

Dagiti ubbing nga awan pay 12 ti tawenda ket madaydayagnos nga addaanen iti alta presion, batbato iti kidney, saksakit iti dalem, ken nangaton ti kolesterolda. Ania dagiti kangrunaan a makagapu? Masansan a nakatugawda, mangmanganda iti adu unay a sitsiria, ken sobra ti kinalukmegda.—ABC, SPAIN.

Ti magastos iti panangpadakkel iti ubing a nayanak idi 2008 agingga nga agtawen iti 18 iti pamilia a kalkalainganna ti panagbiagna iti Estados Unidos ket “agarup $221,190 ($291,570 no maisurot iti panagbaliw ti balor ti doliar),” sigun iti pattapatta ti gobierno.—UNITED STATES DEPARTMENT OF AGRICULTURE, U.S.A.

Nalipatandan ti Makiay-ayam

Kuna ti 20% kadagiti nagannak idiay Britania a nalipatandan “ti makiay-ayam kadagiti annakda,” sigun iti nabiit pay a surbey. Impudno ti 33% nga aglaladutda a makiay-ayam, idinto ta awan tiempo ti dadduma wenno awan ammoda nga ay-ayam. Mainaig iti daytoy, kuna ti clinical psychologist a ni Propesora Tanya Byron: “Adda uppat a napateg nga aspeto iti naballigi a pannakiay-ayam ti nagannak kadagiti annakda: edukasion, inspirasion, komunikasion, ken pannakilangen.” Nupay kaykayat ti 1 iti kada 3 a nagannak ti makiay-ayam iti anakda babaen kadagiti computer game, kaykayat ti kaaduan nga ubbing ti agsolsolo a mangay-ayam kadagita. Karaman kadagiti aktibidad a magusgustuan ti kaaduan nga agtawen iti 5-15 a kadua dagiti nagannakda ket ti panagay-ayam iti ruar ken dagiti board game.

Panagestoria Sakbay ti Pannaturog

Adda serbisio iti Internet a tumultulong kadagiti amma nga awanan iti tiempo a personal a mangibasa kadagiti estoria iti annakda sakbay ti pannaturog. “Babaen iti hi-tech software, mairekord ti boses ti amma a mangibasbasa iti estoria sakbay a maturog ti anakda. Adda pay musika ken sound effect a mainayon iti audio file a maipatulodto iti ubing babaen iti e-mail,” sigun iti Daily Telegraph iti Sydney. Ngem saan nga umanamong iti dayta dagiti eksperto kadagiti relasion. “Ti panangibasa iti anak saklawenna ti adu nga aspeto a mamagsinged iti relasion,” kuna ni Dr. Richard Fletcher a miembro ti maysa a programa idiay Newcastle University, Australia, a mangad-adal maipapan kadagiti pamilia. Ramanen dayta ti pannakisarita, panangsaklot, ken pannakikinnatawa dagiti amma iti annakda. Awan e-mail a makaartap kadagiti pagimbagan ti aktual a panagtugaw ken panangibasa iti sibay ti anakmo, kuna ni Fletcher.