Panangmatmat iti Lubong
Idiay Germany, 7 iti kada 10 a maladaga ti addaanen iti account iti Internet. Iyaramidan ida dagiti nagannakda iti profile ken e-mail address wenno ikabilda kadagita dagiti retrato wenno ladawan ti ubing a naala iti ultrasound. Ngem mamakdaar dagiti eksperto, ta dagiti retrato a maikabil iti Internet ket kakuykuyogen ti ubing agingga nga agmataengan.—BABY UND FAMILIE, GERMANY.
Sigun iti estadistika ti gobierno, 14,000 a babbai ti matmatay idiay Russia kada tawen gapu iti panangranggas dagiti kaparehada.—RIA NOVOSTI, RUSSIA.
Idiay Mount Everest, ti niebe nga adda iti kangato nga 6,858 a metro agingga iti 7,752 a metro ket addaan iti arsenic ken cadmium a ti kaadu dagita ket maibilang a napeggad no mailaok iti danum nga inumen. Gapu kano dayta iti polusion a pinataud dagiti tao.—SOIL SURVEY HORIZONS, U.S.A.
Ti kakaisuna a kompania nga autorisado nga agimprenta iti Biblia idiay China ket nabiit pay a nangimaldit iti maika-80 a milion a kopia. Binulan nga agim-imprenta dayta iti 1 milion a Biblia—25% iti amin a mayim-imprenta iti intero a lubong.—XINHUA, CHINA.
‘Kadagiti adulton nga Americano a napadakkel a Katoliko, 10.1% ti immikkaten iti dayta a relihionda.’—NATIONAL CATHOLIC REPORTER, U.S.A.
Dagiti Natural a Didigra iti 2010
Sigun iti nalatak a kompania ti insurance, 950 a natural a didigra ti napasamak iti intero a lubong idi 2010. Ad-adu dayta ngem iti average a 785 kada tawen iti napalabas a dekada. Ti lima a kakaruan a didigra ket dagiti ginggined idiay Chile, China, ken Haiti; dagiti layus idiay Pakistan; ken ti napalalo a kinabara idiay Russia a nakatayan ti pinullo a ribu gapu kadagiti epekto ti bara ken polusion iti angin. Iti makin-amianan a Europa, di unay nangdangran ti dapo nga impugso ti bulkan idiay Iceland ngem dandanina pinasardeng ti serbisio dagiti eroplano. Idiay Australia, nadadael ti nasurok a $2 bilion (U.S.) a sanikua gapu iti dua a nakaro a panagtudo ti uraro. Kuna ti The Telegraph ti London: “Ti dagup ti napukaw iti ekonomia, agraman dagiti saan a sakup ti insurance ket immabut iti $130 bilion idinto ta $50 bilion laeng idi napalabas a tawen.”
Kapadatayo Kadi Dagiti Neanderthal?
“Nabayagen a maipagpagarup a dagiti Neanderthal ket nababbaba ngem kadagiti Homo sapiens. Ngem nagbaliwen dayta yantangay kabaelanda met gayam nga aramiden dagiti naipagarup a datayo laeng ti makabael a mangaramid,” kuna ti New Scientist. Nabiit pay a naduktalan a dagiti Neanderthal ket nagaramid kadagiti pagnaedan, paginuduan, remienta, ken pigket tapno maisulbong ti tirad ti pika iti putanna. Nagkawesda, ammoda nga usaren ti apuy, ken naglutoda iti taraon. Adda met ebidensia nga inaywananda dagiti masakit, nagaruatda kadagiti simboliko nga arkos, ken inkalida dagiti minatayda. Sigun ken Erik Trinkaus a propesor ti physical anthropology idiay Washington University, St. Louis, Missouri, U.S.A., “Dagiti Neanderthal ket tattao, ken posible a kas met la kadatayo ti abilidadda nga agpanunot.”