Panangmatmat iti Lubong
Idi naeksamen ti keypad dagiti ATM machine iti intero nga England, naduktalan a dagiti makadangran a bakteria kadagita ket kas iti kaadu dagiti adda kadagiti publiko nga inidoro. —THE TELEGRAPH, BRITAIN.
“No dadduma, makigtot dagiti sientista kadagiti ginggined [a kas idiay New Zealand ita a tawen ken Haiti idi napan a tawen] gapu ta napasamak dagita kadagiti di pay nadiskobre a fault. . . . Mangpataud dayta iti makapadanag a saludsod: Mano pay ngata a dadakkel a ginggined ti dandani mapasamak kadagiti di maipagpagarup ken di pay naammuan a fault?” —THE NEW YORK TIMES, U.S.A.
“Ti uppat a kabaknangan a tao . . . ket nabakbaknang ngem iti 57 a kapanglawan a pagilian iti lubong.”—FOREIGN POLICY, January/ February 2011, U.S.A.
Imbaga dagiti makinkua iti 90% kadagiti negosio idiay Poland nga iti napalabas a dua a tawen, tinakawan wenno inallilaw ida dagiti empleadoda. —GAZETA PRACA, POLAND.
Pagmulmultaenen ti Iglesia Katolika idiay Brazil iti $300 (U.S.) dagiti nobia no maladawda iti kasarda. Dagiti agkasar ket masapul a mangted iti tseke sakbay ti kasarda. Maisubli laeng dayta no dida maladaw a sumangpet.—G1, BRAZIL.
Papa—Saanen nga “Organ Donor”
Idi kardinal pay laeng ni Joseph Ratzinger iti Iglesia Katolika Romana, isu ket maysa nga “organ donor,” kuna ti La Repubblica a diario ti Italia. Ngem saanen a kasta sipud idi nagbalinen a Pope Benedict XVI. Apay? “Ti bagi ti papa ket kukua ti Iglesia,” kuna ti arsobispo a ni Zygmunt Zimowski a kameng ti Vatican. “Nalawag ngarud a no matay ti papa, mapreserba ti intero a bagina yantangay posible a pagdaydayawandanto dayta.”
Biag Wenno Kuarta?
Kayat kadi ti tattao nga isukat ti makatawen a biagda para iti sangamilion a euro? Idiay Germany, nasurok a 25% kadagiti lallaki ken agarup 15% kadagiti babbai ti mayat iti dayta, sigun iti surbey ti ahensia nga Emnid para iti Reader’s Digest Deutschland. Kadagiti nasurbey, ub-ubing ti kaaduan a mayat a mangisukat iti biagda—29% kadagiti agtawen iti 14-29 ken 25% kadagiti agtawen iti 30-39. Ngem para kadagiti natataengan, napatpateg ti biagda. Kadagiti agtawen iti 50-59, 13% laeng ken 11% kadagiti nasurok nga 60 ti edadda ti mayat a mangilako iti makatawen iti biagda.