Euro 2012​—Naisangsangayan a Paay-ayam

MAGUSTUAM kadi ti agbuya wenno agay-ayam pay ketdi iti soccer? No wen, posible nga ammom ti UEFA (Union of European Football Associations) EURO 2012 games a nakaeskediul a mangrugi idiay Warsaw, Poland, iti Hunio 8 ken ti pinal a paay-ayam a maangay inton Hulio 1, idiay Kiev, Ukraine. Ania ti EURO 2012, ken kasano ti pannakaisagana dayta? Apay a naisangsangayan dayta a paay-ayam?

“Creating History Together”

Sipud idi 1960, maang-angay dagiti European football (soccer) championship kada uppat a tawen. Karaman ti Austria, Belgium, England, France, Germany, Italy, Netherlands, Portugal, Spain, Sweden, Switzerland, ken Yugoslavia iti nadumaduma a pagilian a nakaangayan dagitoy a paay-ayam.

Ita a tawen, iti Poland ken Ukraine a maangay dagiti pinal a pasalip. Iti Poland, kadagiti siudad ti Gdańsk, Poznan, Warsaw, ken Wroclaw a maaramid dagiti ay-ayam. Idiay Ukraine, mapasamak dagiti pasalip iti Donetsk, Kharkiv, Kiev, ken L’viv.

Sigun iti UEFA, daytoy ti “maikatlo a gundaway a dua a pagilian ti agkadua a mangsangaili iti pinal a torneo (kalpasan ti Belgium/Netherlands idi 2000 [ken] Austria/Switzerland idi 2008).” Nupay kasta, naisangsangayan ti EURO 2012. Apay? Saan la a ti pinal a salisal ita a tawen ti tampok ti kasta unay a panagtinnulong ti dua a mangsangaili a pagilian ken dagiti nangyurnos iti salip. Dayta pay ti kaunaan a pinal a salisal a maangay iti Makintengnga ken Makindaya a Europa. Gapuna, ti opisial nga islogan a napili iti pay-ayam ita a tawen ket “Creating History Together” (Agkadua a Mangaramid iti Historia).

Panagsagana

Siempre, ti maysa kadagiti kapatgan iti aniaman a pasalip ket ti kaadda ti umdas a pasilidad a pagay-ayaman. Gapuna, pinapintas dagiti siudad ti Poznan ken Kharkiv dagiti istadiumda, idinto ta kaar-aramid dagiti istadium iti innem a siudad. Malaonda ti agarup 358,000 nga agbuya.

Yantangay nagadu ti mainanama nga agbuya, implano ken insagana a naimbag dagiti mangsangaili a siudad ti seguridad ti paay-ayam. Nabayag a nag-training ti rinibu a miembro para iti seguridad. Sigun iti Science & Scholarship in Poland, karaman iti training-da ti “panangpraktis iti natalged nga aramidenda iti 140 nga okasion kas ti . . . panangkontrol iti adu a tao, panangisaad kadagiti natalged a lugar ken pannakikooperar kadagiti security team ti dadduma a pagilian.”

Apay a kasapulan dagita a panagsagana? Ammo dagiti autoridad a ti dadakkel a paay-ayam ket mabalin a puntiriaen dagiti terorista. Ammoda pay a posible nga aglalaban dagiti paan-anawa nga agbuybuya, kas nakita kadagiti napalabas a naranggas ken nariribuk a pasamak.

Balanse a Panangmatmat

Nakalkaldaang ta adu nga agbuybuya ti sobra ti hiligda iti isports. “Nalidayak ken masuronak no saan a makaiskor ti manokko a [football] team,” kuna ti maysa a fan. “No bilang man ta adda nuklear a gubat, ti pakaseknak unay ket no maapektaran dagiti sumaruno nga ay-ayam iti ngudo ti lawas.”

Iti kasumbangirna, usigem ti balanse a panangmatmat iti panaglinglingay a masarakantayo iti Biblia​—ti nabayagen a libro a pakagun-odan iti sirib. Bigbigenna ti kinapateg ti makagunggona a panagaliwaksay ta kinunana nga adda “tiempo ti panagkatawa . . . ken tiempo ti panaglagtolagto.” (Eclesiastes 3:1-4) Iparparegta met ti Biblia ti kinabalanse. (1 Timoteo 3:2, 11) Isu a no ikeddengtayo ti pangipamaysaantayo iti biagtayo, nainsiriban a surotentayo ti balakad ti Biblia a ‘siguraduentayo ti napatpateg a bambanag.’​—Filipos 1:10.

[Kahon/Ladawan iti panid 25]

MAIPARIT TI SIGARILIO ITI EURO 2012

Idi Oktubre 20, 2011, impakaammo ti UEFA nga “interamente nga iparitna ti panagusar, panagilako wenno panagipatalastas iti sigarilio iti amin nga istadium a pakaangayan ti UEFA EURO 2012.” Apay? “Ti pannakaiparit ti sigarilio ket panangipakita a maseknankami iti salun-at dagiti agbuya ken ti amin a karaman iti torneo,” kinuna ni Michel Platini a presidente ti UEFA. Ti European Commissioner a ni Androulla Vassiliou ti maysa kadagiti nangsuporta iti dayta panangiparit. Imparegtana kadagiti mangsangaili a siudad a ti dadduma a lugar a kas iti restawran ken pangpubliko a transportasion ket mairaman koma kadagiti pakaiparitan ti panagsigarilio. “Ti football ken isports ket maipapan iti salun-at ken kinalaing nga agay-ayam,” kuna ni Vassiliou, “idinto ta maikontra iti dayta ti panagsigarilio: dida pulos mabalin nga agtipon.”

[Mapa iti panid 24]

(Para iti aktual a pannakaurnosna, kitaem ti publikasion)

POLAND

WARSAW

Gdańsk

Poznan

Wroclaw

UKRAINE

KIEV

L’viv

Kharkiv

Donetsk

[Ladawan iti panid 24]

Ti pinal nga ay-ayam ti Germany ken Spain iti EURO 2008 a naangay iti Ernst Happel Stadium idiay Vienna, Austria

[Ladawan iti panid 25]

Olympic Stadium idiay Kiev, Ukraine

[Picture Credit Line iti panid 25]

Panid 24 ken 25, dua a retrato: Getty Images