Manipud Kadagiti Agbasbasa

Espesial a Pannakaaywan Dagiti Dandanin Matay​—Ania ti Kalat? (Hulio 2011) Kas katulongan iti social welfare, agtartrabahoak iti kasta nga institusion isu a mapaneknekak nga agpayso ti imbagayo iti Hulio 2011 nga Agriingkayo! Kasapulan daytoy lubong dagiti pasilidad a naan-anay a nakasagana a mangaywan kadagiti dandanin matay. Segseggaak unay ti iyaay ti gobierno ti Dios, inton awanen ti agkuna a “Masakitak,” ken punasenen ti Dios ti amin a lua kadagiti matatayo.​—Isaias 33:24; Apocalipsis 21:3, 4.

M. R., Italia

Medio nadismayaak idi nakitak a nadakamat iti artikulo dagiti ‘diaper’ a para adulto. Makapainsulto dayta a termino iti asinoman a kasapulan nga agusaren iti kasta a kita ti aruaten.

Nailimed ti naganna, Estados Unidos

Sungbat ti “Agriingkayo!”: Pagyamanan ti panangibagayo kadakami iti dayta a punto. Makipagriknakami iti asinoman nga addaan iti nakaro a sakit. Dimi la ketdi kayat a nayonan ti panagsagaba ti asinoman babaen ti panangusar kadagiti termino nga ibilang ti dadduma a makapainsulto. Dispensarendakami no bilang ta napasaktanmi ti rikna dagiti agbasbasa.

Agimtuod Dagiti Agtutubo . . . Ania ti Masapul a Maammuak Maipapan iti Social Networking? (Hulio 2011) Pagyamanan iti daytoy nga artikulo. Agtawenak iti 26. Planok ti manglukat iti [social networking] account-ko, saan a gapu ta kayatko ti maaddaan iti adu a gagayyem no di ket adu ti mangal-allukoy kaniak. Dakkel ti naitulong kaniak daytoy nga artikulo. Naamirisko a maaddaanak latta iti gagayyem uray no awan ti social networking account-ko.

M. P., Pilipinas

Impagarupko no negatibo ti panangisalaysay ti artikulo maipapan iti social networking. Ngem balanse ti artikulo. Inlawlawagna dagiti pagsayaatan ken pagdaksan dayta. Nangted met iti balakad no kasano a maliklikantayo dagiti posible a peggad kadagiti social network. Naipasagepsep kaniak a masapul nga agannadak no adda personal nga impormasion nga i-post-ko iti Internet.

C. W., Estados Unidos

Ti Sekreto Dagiti Naballigi a Pamilia (Oktubre 2009) Dakkel ti naitulong daytoy espesial a ruar iti pamiliami. Nangruna a nagustuak dagiti kahon a “Padasem daytoy” a naipakuyog iti tunggal maysa kadagiti pito a sekreto. Inyaplikarmin a sangapamiliaan dagiti naipaay nga espesipiko a singasing.

H. H., Korea

Adalen ti Pamilia Pagyamanan unay iti daytoy a regular a benneg. Magusgustuan ti 6 ti tawenna nga anakmi ti paset nga “Ubbing, Birokenyo Dagiti Ladawan” ken kaay-ayona a koloran dagiti ladawan. Pinaglawag dagitoy nga artikulo ti akem dagiti nagannak a mangsanay iti annakda manipud kinaubingda. Nakapatpateg ti ar-aramidenyo agpaay kadagiti ubbing.

M. P., Poland