Masursurom ti Agbalin a Mannakikappia
NUPAY nayanaktayo nga addaan iti sumagmamano a dakes a pagannayasan, ti naranggas a kababalin ket kaaduanna a masursuro. Kasta met laeng ti pannakikappia. Ngem asino ti makaisuro kadatayo kadagiti pamay-an ti pudno a talna? Awan sabali no di ti mapagtalkan unay a Namarsua kadatayo ta awan umartap iti siribna. Panunotem ti sumaganad a lima a punto ken dagiti nainaig nga agkakapateg a sirib a masarakan iti Biblia.
1 “Dika agbalin a naapal iti tao ti kinaranggas.” (Proverbio 3:31) Bigbigem a ti pudno a bileg ket adda kadagiti galad kas iti panagteppel ken kinaalumamay. “Daydiay nabannayat nga agunget nasaysayaat ngem iti nabileg a lalaki,” kuna ti Proverbio 16:32. Kas iti natibker a pader ti dam, kabaelanna a daeran dagiti manggargari kenkuana nga agpungtot. Kinapudnona, naalumamay no maipasango iti agung-unget isu a ‘mapagbaw-ingna ti pungtot.’ (Proverbio 15:1) Ngem ti managpungpungtot ket insigida nga agunget uray no nakasimsimple laeng ti makagapu.—Proverbio 25:28.
2 Nainsiriban a piliem ti kakaduam. “Ti tao ti kinaranggas allilawennanto ti padana a tao,” kuna ti Proverbio 16:29. Ngem “daydiay makipagna kadagiti masirib a tattao agbalinto a masirib.” (Proverbio 13:20) Wen, no makikaduatayo kadagiti mannakikappia a managteppel ken naalumamay, dakdakkel ti posibilidadna a tuladentayo ida.
3 Patanorem ti pudno nga ayat iti sabsabali. Ti kasayaatan a pannakadeskribir ti ayat ket mabasa iti 1 Corinto 13:4-7. Kuna ti dadduma a pasetna: “Ti ayat mabayag-panagituredna ken manangngaasi. . . . Saan a magargari nga agpungtot. Saanna nga ing-ingpen ti pannakadangran. . . . Anusanna ti amin a bambanag, . . . ibturanna ti amin a bambanag.” Kinuna ni Jesus a no kayattayo a tuladen ti ayat ti Dios, masapul nga ayatentayo uray dagiti kabusortayo.—Mateo 5:44, 45.
4 Agtalekka iti Dios nga agtignay maibusor kadagiti nadangkes. “Dikay subadan ti dakes iti dakes iti asinoman. . . . Agingga a makapagpannuray kadakayo, makikappiakayo iti amin a tattao. Dikay ibalesan ti bagbagiyo, dungdungnguen, . . . ta adda a naisurat: ‘Kukuak ti pammales; supapakakto, kuna ni Jehova.’” (Roma 12:17-19) No adda pammatitayo iti Dios ken kadagiti karina, maaddaantayo iti natalna a panunot a di matarusan dagidiay awanan iti pammati.—Salmo 7:14-16; Filipos 4:6, 7.
5 Agpannurayka iti Pagarian ti Dios a mangyeg iti pudno a talna ditoy daga. Ti Pagarian ti Dios ket maysa a nailangitan a gobierno nga asidegen a mamagpatingga iti amin a nadangkes ken naan-anay a mangituray iti intero a daga. (Salmo 37:8-11; Daniel 2:44) Iti panangituray dayta a Pagarian, “agtubonto daydiay nalinteg,” ken addanto “kinaruay ti talna agingga nga awanen ti bulan.”—Salmo 72:7.
Dagita a pannursuro ti Biblia ket nakatulongen iti minilion a tattao—agraman ti sumagmamano a naranggas ti kababalinda—tapno agbalinda a managayat iti talna. Usigem ti kapadasan ni Salvador Garza.