Masapul Kadi a Mapanka iti Templo, Santuario, Wenno Simbaan Tapno Agkararag iti Dios?

ADU ti regular a mapmapan iti nadumaduma a kita ti narelihiosuan a pasdek tapno agkararag iti Dios. Adda pay dagidiay agbiahe iti adayo tapno makapanda kadagita a lugar. Para kenka, masapul kadi a mapanka iti templo, santuario, wenno simbaan tapno agkararag iti Dios? Wenno iti panagkunam ket mabalinmo latta ti makisarita kenkuana iti aniaman nga oras wenno iti sadinoman a lugar? Ania ti kuna ti Biblia?

Idi nangrugi ti pakasaritaan ti tao, awan dagiti narelihiosuan a pasdek. Ti immuna a nagannaktayo ket nagnaed iti napintas a hardin. (Genesis 2:8) Mabalinda sadiay ti makisarita ken Jehova a Dios a Namarsua kadakuada. Idi agangay, bayat nga umad-adu ti tao, “nakipagna iti pudno a Dios” ti nalinteg a tattao a kas ken Noe uray awan dagiti narelihiosuan a pasdek. (Genesis 6:9) Managkararag dagitoy a mangay-ayat ken Jehova ket nagun-odda ti anamongna.

Saan nga Agnanaed ti Dios Kadagiti Pasdek nga Inaramid ti Tao

Ammo dagiti matalek a tattao idi ugma a ti Namarsua iti daga ken iti naglawa nga uniberso ket saan nga agnanaed kadagiti estruktura nga inaramid ti tao. “Pudpudno kadi a makipagnaedto ti Dios iti sangatauan iti rabaw ti daga?” insaludsod ti masirib a ni Ari Solomon. “Adtoy! Ti langit, wen, ti langit ti langlangit, saannaka a malaon,” siuumiso a binigbigna. (2 Cronicas 6:18) Pudno, adda idi tabernakulo dagiti nagkauna nga Israelita a nasuktan idi agangay iti templo a tinawen a nagtataripnonganda para kadagiti narelihiosuan a piesta nga ipapaannurot ti Linteg ti Dios. (Exodo 23:14-17) Ngem mabalinda latta ti agkararag iti aniaman nga oras​—agipaspastorda man, agtaltalon, kaduada ti pamiliada, wenno agmaymaysada.​—Salmo 65:2; Mateo 6:6.

Mabalintayo met ti agkararag iti Dios iti sadinoman a lugar ken iti aniaman nga oras. Ti ulidantayo a ni Jesu-Kristo ket masansan a napan nagkararag iti naulimek ken pribado a lugar. (Marcos 1:35) Kas pagarigan, iti maysa a gundaway “rimmuar a napan iti bantay tapno agkararag, ket agpatpatnag a nagkararag iti Dios.”​—Lucas 6:12.

Siempre, kas maysa a Judio, regular nga umat-atender ni Jesus kadagiti narelihiosuan a piesta iti templo idiay Jerusalem. (Juan 2:13, 14) Ngem impadtona a dumteng ti tiempo a saanen a ti templo ti sentro ti pudno a panagdayaw. Idi kasarsaritana ti maysa a Samaritana iti asideg ti maysa a bantay ti Samaria nga ayan ti temploda, kinunana: “Um-umayen ti oras a saankayton nga agdayaw iti Ama iti daytoy a bantay wenno idiay Jerusalem.” Sana innayon a dagiti pudno nga agdaydayaw “agdayawdanto iti Ama buyogen ti espiritu ken kinapudno.”​—Juan 4:21, 23.

Wen, saan a ti patakder a naaramid iti ladrilio ken argamasa ti napateg ken Jesus no di ket ti naimpusuan a pudno a panagdayaw. Ngem kayat kadi a sawen dayta a dagiti pasurot ni Jesus, a naawagan idi agangay kas Kristiano, ket didan kasapulan dagiti pasdek para iti panagdayawda iti Dios? (Aramid 11:26) Saan, ken adda dagiti nasayaat a rason a kasapulanda dagita.

Naespirituan a Pamilia ti Ili ti Dios

Dagiti pudno nga adipen ti Dios ket maymaysada a pamilia​—maysa a naespirituan a pamilia. (Lucas 8:21) Adu dagiti sangsangkamaysa nga aramiden ti nasayaat a pamilia kas iti pannangan, ket dayta ti mangpasinged kadakuada a sangapamiliaan. Agaplikar met dayta iti naespirituan. Dagiti Nakristianuan a taripnong ket naespirituan a pannangan a mangpasalun-at iti makin-uneg a kinatao ken mangpabileg iti naespirituan a relasion. Insurat ti Kristiano nga apostol a ni Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo.”​—Hebreo 10:24, 25.

Gapuna, bigbigen dagiti pudno nga agdaydayaw iti Dios a napateg ti akem ti kongregasion gapu ta tumulong dayta iti tunggal miembro a mangpatanor kadagiti naespirituan a galad a di naan-anay a mapatanor no isu ket agmaymaysa. Karaman kadagita ti ayat, kinamanangpakawan, kinamanangngaasi, kinaalumamay, ken talna.​—2 Corinto 2:7; Galacia 5:19-23.

Sadino ti nagtataripnongan dagiti nagkauna a Kristiano iti panagdaydayawda? Masansan a kadagiti pribado a pagtaengan. (Roma 16:5; Colosas 4:15) Kas pagarigan, idi sinuratan ni apostol Pablo ti maysa a padana a Kristiano, inturongna met ti suratna “iti kongregasion nga adda iti balaymo.”a​—Filemon 1, 2.

Saan met a dagiti nangayed a narelihiosuan a pasdek ti kasapulan ita ti ili ti Dios no di ket dagiti patakder a komportable ken makalaon iti amin a tumabuno. Dagiti Saksi ni Jehova ket addaan kadagiti kasta a patakder, nga aw-awaganda iti Kingdom Hall. Nalabit adda met Kingdom Hall iti lugaryo. Saan unay a nangayed dagita a pasdek ken nairantada a pagtataripnongan. Simple met dagiti gimong a maang-angay​—karaman kadagita ti panagkanta, panagkararag, ken panagadal iti Biblia.

Ipatpateg dagiti Saksi ni Jehova ti pribado ken nasinged a kanito a pannakisaritada iti Dios. Isu nga adda tiempoda iti kada aldaw nga agkararag, kas sangapamiliaan ken uray no maymaysada. “Umadanikayo iti Dios, ket isu umadaninto kadakayo,” kuna ti Santiago 4:8.

[Footnote]

NAPANUNOTMO KADIN?

● Agnanaed kadi ti Dios kadagiti pasdek nga inaramid ti tao?​—2 Cronicas 6:18.

● Sadino ti nagpatnag a nagkararagan idi ni Jesus?​—Lucas 6:12.

● Apay nga agtataripnong dagiti pudno nga agdaydayaw iti Dios? ​—Hebreo 10:24, 25.

[Blurb iti panid 15]

Dakdakkel kadi ti posibilidadna a maipangag dagiti kararagmo no addaka kadagiti masinunuo a lugar?