Ti Maaramidan Dagiti Nagannak

KAS ipakita dagita a komento, narigat ti agadal iti dadduma nga eskuelaan. Kas nagannak, kasanoyo a matulongan ti annakyo a makasursuro iti laksid dagiti pakarigatan? Adtoy ti sumagmamano a singasing.

Agdisnudokayo.

Ipamaysayo ti atensionyo iti mabalinyo nga aramiden imbes a kadagiti problema a nalabit adu kadagita ti diyo makontrol. No adda asignatura a kasla pakarigatan ti anakyo wenno no madagsenan iti kaadu ti homework-na, pagsasaritaanyo dayta ken agtitinnulongkayo a mangpanunot iti sumagmamano a solusion. Kas pagarigan, kasapulan kadi a pagbalinenyo a mas komportable ti lugar a pagadalanna iti balayyo? Kasapulan kadi ti anakyo ti tulong iti panagaramidna iti eskediul tapno mairingpasna dagiti kapatgan nga aramidenna? Magunggonaan ngata no adda tumulong kenkuana a tutor wenno personal a mangisuro? Para iti kanayonan a singasing, nalabit mabalinyo ti makisarita iti guidance counselor ken mannursuro ti anakyo. Ibilangyo ida a kabinnulig imbes a kabusor.

Tulonganyo ti anakyo a kanayon a panunotenna ti panggep ti panageskuelana.

Ti koma edukasion ti mangsukog iti anakyo nga agbalin a nasayaat ken responsable nga adulto. Ti panggep ket saan la koma a tapno masursurona no kasano ti makagun-od iti kinabaknang. Ngem ipakita ti panagsirarak nga ages-eskuela ti adu nga agtutubo gapu iti dayta a mismo a panggep​—ti agpabaknang. Isursuro ti Biblia ti balanse a panangmatmat iti material a bambanag. Ibagana a “ti kuarta agpaay a salaknib,” ngem pakdaarannatayo met a saan nga agbalin a pudpudno a naragsak “dagidiay determinado a bumaknang.”​—Eclesiastes 7:12; 1 Timoteo 6:9.

Ipalubosyo a makasursuro ti anakyo iti pakarigatan.

Sigun iti adu a mannursuro, narigat a pakilangenan ti dadduma nga estudianteda, ngem narigrigat pay nga aramiden dayta kadagiti nagannak. Insigida a makibiang ken agreklamo ti dadduma a nagannak no agproblema ti anakda wenno nababa ti naalana iti eksamen. Kas pagarigan, impadamag ti magasin a Time ti maipapan iti maysa a propesora iti kolehio nga addaan idi kadagiti estudiante nga “umawag iti nagannakda iti selpon bayat nga addada iti klasena ta ireklamoda ti nababa a gradoda. Kalpasanna, ipasada kenkuana ti selpon bayat nga agisursuro gapu ta kayat ti nagannak ti makibiang. Adda pay dagiti nagannak a nangibaga kenkuana a nagdakkel ti baybayadanda para iti panageskuela ti anakda, isu nga ipasimudaagda a rumbeng laeng a ti kangatuan a grado ti kasukat ti dakkel a gastoda.”

Saan a pagsayaatan ti annak ti kasta nga ar-aramiden dagita a nagannak. Kinapudnona, imbes a tultulonganda ida, laplapdanda ketdi a mapadasan ti annakda ti “aktual nga agdesision, mapaay, ken mangsango kadagiti ibunga dagiti palpak a desisionda,” insurat ni Polly Young-Eisendrath iti librona a The Self-Esteem Trap. Kinuna pay: “No napalalo ti panangyalikaka dagiti nagannak iti panangsagrap ti annakda iti dakes a resulta ti aramidda, idinto ta agul-uldag laeng ti annakda, dagiti nagannak ti makasursuro a mangtaming kadagiti pakarigatan. Ngem dinto kabaelan ti annakda a tamingen dagiti pakarigatan inton awandan iti poderda.”

Agbalinkayo a rasonable no mano a tawen ti busbosenna nga ageskuela.

Kas nadakamaten, makatulong ti edukasion tapno agbalinto ti anakyo a responsable nga adulto. (Genesis 2:24) Ngem kasano kapaut ti rumbeng a panageskuelana tapno agbalinto a kasta?

Diyo ipapan a ti anakyo ket rumbeng nga ageskuela iti unibersidad tapno maaddaanto iti disente a trabaho. Adda pay dagiti pagpilian a nalaklaka. Kinapudnona, adda dagidiay nageskuela iti bokasional a nakastrek iti nasayaat a trabaho a kas kadagidiay naggraduar iti unibersidad.

Laglagipem: Saan a perpekto dagiti eskuelaan, ken maipaspasango dagiti annak kadagiti problema nga awan iti napalabas a sumagmamano a dekada. Ngem babaen iti tulongyo, kabaelan ti anakyo ti agballigi iti panageskuelana! Kas sangapamiliaan, pagsasaritaanyo koma dagiti singasing iti panid 3-7 daytoy a magasin.