Nagannak​—Ania ti Kayatyo a Masakbayan Dagiti Annakyo?

“Dakayo nga agtutubo a lallaki ken kasta met dakayo a birhen . . . Idaydayawda koma ti nagan ni Jehova.”​—SALMO 148:12, 13.

1. Ania ti pakaseknan dagiti nagannak kadagiti annakda?

SIASINO koma a nagannak ti di maseknan iti masakbayan dagiti annakda? Manipud pannakaipasngay ti maladaga​—wenno sakbay pay ketdi dayta​—maseknanen dagiti nagannak iti pagimbaganna. Nasalun-atto ngata? Normal ngata ti panagdakkelna? Bayat a dumakdakkel ti ubing, tumaud dagiti kanayonan a pakaseknan. Kadawyanna a tarigagayan dagiti nagannak ti kasayaatan para kadagiti annakda.​—1 Samuel 1:11, 27, 28; Salmo 127:3-5.

2. Apay nga adu a nagannak ita ti agtarigagay a maaddaan dagiti annakda iti makapnek a biag inton dumakkelda?

² Ngem iti agdama a lubong, maysa a karit kadagiti nagannak no kasanoda a maipaay ti kasayaatan kadagiti annakda. Adu a nagannak ti limmasat kadagiti rigat​—gubgubat, riribuk iti politika, rigat iti ekonomia, pisikal ken emosional a pannakadangran, ken dadduma pay. Natural laeng a dida kayat a mapasaran dagiti annakda dagita a napasaranda. Kadagiti nabaknang a pagilian, mabalin a makita dagiti nagannak ti narang-ay a propesion ken kasla naballigi a biag dagiti annak ti gagayyem ken kakabagianda. Gapuna, mapilitanda a mangaramid iti amin a kabaelanda tapno masiguradoda nga agbalin a nasaliwanwan ken natalged ti biag dagiti annakda​—maysa a makapnek a biag​—inton dumakkelda.​—Eclesiastes 3:13.

Panangpili iti Makapnek a Biag

3. Ania ti pinili dagiti Kristiano?

³ Kas pasurot ni Jesu-Kristo, pinili dagiti Kristiano nga idedikar ti biagda ken ni Jehova. Impapusoda ti sasao ni Jesus: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotennak.” (Lucas 9:23; 14:27) Wen, ti biag ti maysa a Kristiano iramanna ti panagsakripisio. Ngem dina kayat a sawen a napanglaw ken nakakaasi ti biagna. Imbes ketdi, maysa dayta a biag a naragsak ken makapnek gapu ta iramanna ti panangted, ket kas kinuna ni Jesus, “ad-adu ti kinaragsak iti panangted ngem iti panangawat.”​—Aramid 20:35.

4. Ania ti indagadag ni Jesus nga aramiden dagiti pasurotna?

⁴ Idi kaaldawan ni Jesus, agbibiag dagiti tattao iti sidong dagiti narigat a kasasaad. Malaksid iti panagsapul iti pagbiagda, masapul nga anduranda ti naulpit a turay dagiti Romano ken ti mangirurumen a pammadagsen dagiti napeklan a relihionista kadagidi nga aldaw. (Mateo 23:2-4) Kaskasdi, adu kadagidiay nakangngeg maipapan ken ni Jesus ti sidadaan a nangtallikud kadagiti personal nga aktibidadda​—uray pay ti karerada​—ket nagbalinda a pasurot ni Jesus. (Mateo 4:18-22; 9:9; Colosas 4:14) Ipuspusta laeng kadi dagidi nga adalan ti biag ken masanguananda? Imutektekanyo ti kinuna ni Jesus: “Ti tunggal maysa a nangpanaw iti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga maigapu iti naganko umawatto iti adu a daras nga ad-adu ken tawidennanto ti agnanayon a biag.” (Mateo 19:29) Impanamnama ni Jesus kadagiti pasurotna nga ammo ti nailangitan nga Ama ti ar-aramidda. Indagadagna ngarud kadakuada: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—Mateo 6:31-33.

5. Ania ti panagrikna ti dadduma a nagannak maipapan iti pammasiguro ni Jesus nga aywanan ti Dios dagiti adipenna?

⁵ Kasta met laeng ita. Ammo ni Jehova dagiti aramidtayo, ket kadagidiay mangyun-una kadagiti interes ti Pagarian, nangnangruna dagidiay agserserbi iti amin-tiempo a ministerio, maipasigurado met kadakuada nga aywanan ida ti Dios. (Malakias 3:6, 16; 1 Pedro 5:7) Nupay kasta, dadduma a nagannak ti agpangpangadua iti daytoy a banag. Kayatda met ketdi a makita dagiti annakda a rumang-ay ti panagserbida ken ni Jehova, a nalabit sumrekdanto iti amin-tiempo a ministerio. Ngem gapu iti agdama a kasasaad iti ekonomia ken panggedan, marikna dagita a nagannak a napateg no manggun-od pay nga umuna iti nasayaat nga edukasion dagiti annakda tapno maaddaanda kadagiti kualipikasion a kalikaguman ti maysa a matarigagayan a trabaho wenno tapno adda man la mausarda no tumaud ti panagkasapulan. Kadagiti kasta a nagannak, ti nasayaat nga edukasion masansan a kaipapananna ti pananggun-od iti nangatngato nga edukasion.

Panagsagana Agpaay iti Masanguanan

6. Iti ania nga anag a nausar ti termino a “nangatngato nga edukasion” iti daytoy nga artikulo?

⁶ Saan nga agpapada ti sistema ti edukasion iti tunggal pagilian. Kas pagarigan, dagiti publiko nga eskuelaan iti Estados Unidos ket agkalikagum iti 12 a tawen a panageskuela iti elementaria ken haiskul. Kalpasanna, mabalin nga ikeddeng dagiti estudiante no agkolehioda pay, nga agpaut dayta iti uppat a tawen wenno nasursurok pay agingga nga aggraduarda, wenno ituloydanto pay ti agala iti nangatngato manen a kurso iti medisina, abogasia, kinainheniero, ken dadduma pay. Ti kasta a panagkolehio ti tuktukoyen ti termino a “nangatngato nga edukasion” a nausar iti daytoy nga artikulo. Iti sabali a bangir, adda dagiti teknikal ken bokasional nga eskuelaan, a mangituktukon kadagiti ababa a kurso (vocational course) a pakagun-odan met iti sertipiko wenno diploma.

7. Ania ti maidagdagadag ita kadagiti estudiante iti haiskul?

⁷ Umad-adu ita dagiti eskuelaan iti haiskul a mangisagsagana kadagiti estudianteda para iti nangatngato nga edukasion. Gapuna, ipangpangruna dagita nga eskuelaan ti panangisuro kadagiti asignatura a tumulong kadagiti estudiante a gumun-od iti nangato a grado kadagiti eksaminasion para kadagiti agkolehio, imbes nga isuroda dagiti kurso a tumulong kadagiti estudiante tapno makabirok dagitoy iti panggedan. Babaen kadagiti mannursuro, mamalbalakad, ken pada nga estudiante, kasta unay a maidagdagadag ita kadagiti estudiante iti haiskul nga agpasalistada kadagiti kasayaatan nga unibersidad, a pakagun-odanda kadagiti titulo a mangilukat kadakuada kadagiti panggedan a mangyeg iti balligi ken nangato a sueldo.

8. Ania a desision ti pakaipaspasanguan dagiti Kristiano a nagannak?

⁸ Ania ngarud ti rumbeng nga aramiden dagiti Kristiano a nagannak? Siempre, kayatda a saysayaaten dagiti annakda ti panageskuelada ken sursuruenda dagiti kasapulan a paglaingan (skill) a mausardanto a pangsuporta iti bagida. (Proverbio 22:29) Ngem ipalubosda kadi a maimpluensiaan dagiti annakda iti espiritu ti kompetision tapno laeng magun-odda ti material a gunggona ken balligi? Aniada a kalat ti iparparegtada kadagiti annakda, babaen man ti ibagbagada wenno ti ulidanda? Dadduma a nagannak ti mangigaed nga agtrabaho ken agurnong tapno mapageskuelada dagiti annakda kadagiti unibersidad inton agangay. Dadduma ti sisasagana a mailumlom iti utang tapno laeng maaramidda dayta. Ngem saan laeng a kuarta ti nairaman iti kasta a pangngeddeng. Ania pay ti ramanen ti pananggun-od iti nangatngato nga edukasion?​—Lucas 14:28-33.

Ti Ramanen ti Pananggun-od iti Nangatngato nga Edukasion

9. Ania ti maikuna maipapan iti pinansial a magastos iti panagpaadal iti kolehio ita?

⁹ No maipapan iti panagpaadal, masansan a mapanunottayo dagiti pinansial a magastos. Iti dadduma a pagilian, ti gobierno ti libre a mangpaadal iti kolehio kadagiti kualipikado nga estudiante. Ngem iti kaaduan a lugar, agtultuloy a ngumato ti matrikula iti kolehio. Kuna ti maysa nga artikulo ti New York Times: “Dati a mamatmatmatan ti nangatngato nga edukasion kas maysa a ridaw a manglukat kadagiti oportunidad. Ngem ita, agserbi laengen dayta a pagrukodan no siasino ti nabaknang ken no siasino ti saan unay a nabaknang.” Iti sabali a pannao, dagiti de-kalidad nga unibersidad ket napartak nga agbalbalinen nga eskuelaan dagiti nabaknang ken naimpluensia a tattao. Dita a pagadalen dagiti nabaknang dagiti annakda tapno masiguradoda nga agbalinto met dagitoy a nabaknang ken naimpluensia iti daytoy a lubong. Kasta kadi a kalat ti kayat dagiti Kristiano a nagannak para kadagiti annakda?​—Filipos 3:7, 8; Santiago 4:4.

10. Kasano a dakkel ti pakainaigan ti nangatngato nga edukasion ken ti panangyadelantar kadagiti interes daytoy sistema ti lubong?

¹⁰ Uray pay no libre ti mangala iti nangatngato nga edukasion, adda dagiti bambanag a kalikagumanna. Kas pagarigan, ti The Wall Street Journal ipadamagna nga iti maysa a pagilian iti Makin-abagatan a daya nga Asia, adda maysa a publiko nga eskuelaan nga “arig piramida ti pamay-anda a mangpili kadagiti kasisiriban nga estudiante.” Dagidiay ‘mapili’ nga estudiante ti maibaon nga ageskuela kadagiti kasayaatan nga institusion iti daytoy a lubong​—ti Oxford ken Cambridge nga unibersidad idiay England, dagiti nalatak ken mararaem nga unibersidad idiay Estados Unidos, ken dadduma pay. Apay a mangituktukon ti gobierno iti kasta a napaut a programa? “Tapno mayadelantar ti ekonomia ti pagilian,” kuna ti report. Mabalin a libre ti panageskuela, ngem kalikagumanna kadagiti estudiante nga ipamaysada ti biagda iti panangyadelantar kadagiti interes daytoy sistema ti lubong. Nupay dayta a kita ti biag ti tartarigagayan daytoy a lubong, dayta kadi ti kayat dagiti Kristiano a nagannak para kadagiti annakda?​—Juan 15:19; 1 Juan 2:15-17.

11. Ania ti ipakita dagiti report maipapan iti panangabuso iti arak ken seksual nga imoralidad kadagiti estudiante iti kolehio?

¹¹ Masapul met nga ikabilangan ti kasasaad iti aglawlaw. Agdindinamag dagiti dakes nga aramid kadagiti eskuelaan ti kolehio​—panagdroga ken panagbartek, imoralidad, panagkopia (cheating), panangparigat (hazing), ken dadduma pay nga umasping nga aramid. Usigenyo ti panangabuso iti arak. No maipapan iti panaginum tapno agbartek, kuna ti magasin a New Scientist: “Agarup 44 a porsiento [nga estudiante iti unibersidad iti Estados Unidos] ti sigurado nga agbartek iti uneg ti kada dua a lawas.” Kasta met laeng ti gagangay a parikut kadagiti agtutubo idiay Australia, Britania, Russia, ken dadduma pay a lugar. No maipapan iti seksual nga imoralidad, uso ita kadagiti estudiante ti makunkuna iti Ingles a “hooking up,” a sigun iti maysa a report ti Newsweek, “tukoyenna ti maminsan laeng a seksual a panagsinnarak​—panaginnungngo wenno panagdenna pay ketdi​—ti dua nga agam-ammo ngem awanan iti panggep nga agsarita kalpasanna.” Ipakita ti panagadal nga adda 60 agingga 80 a porsiento nga estudiante ti makipaspaset iti kasta a kita ti aramid. “Normalen dayta kadagiti estudiante ti kolehio,” kuna ti maysa a managsirarak.​—1 Corinto 5:11; 6:9, 10.

12. Aniada a parikut ti nakaisarangan dagiti estudiante iti kolehio?

¹² Malaksid iti dakes a kasasaad iti aglawlaw, adda met parikut nga iyeg dagiti homework ken eksaminasion. Siempre, masapul nga agadal dagiti estudiante ken aramidenda ti homework-da tapno makapasada iti eksaminasion. Dadduma ti masapul a sumrek iti paset-tiempo a panggedan bayat nga ages-eskuelada. Agkalikagum amin dagitoy iti dakkel a panawen ken pigsa. Ania ngarud ti mabati agpaay kadagiti naespirituan nga aktibidad? No umadu dagiti pakaringgoran, ania ti maisakripisio? Mayun-una kadi dagiti interes ti Pagarian, wenno dagita ti maisakripisio? (Mateo 6:33) Idagadag ti Biblia kadagiti Kristiano: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib a tattao, a gatangenyo ti nainggundawayan a tiempo maipaay iti bagbagiyo, agsipud ta dagiti aldaw dakesda.” (Efeso 5:15, 16) Nakalkaldaang ta pinanawan ti dadduma ti pammatida gapu ta adu unay a panawen ken pigsa ti binusbosda iti panageskuelada, wenno nakiramanda iti saan a nainkasuratan nga aramid bayat ti panagadalda iti kolehio!

13. Ania a salsaludsod ti nasken nga usigen dagiti Kristiano a nagannak?

¹³ Siempre, saan laeng met a kadagiti unibersidad nga adda imoralidad, dakes a kababalin, ken parikut. Nupay kasta, adu nga agtutubo iti lubong ti mangmatmat kadagita kas gagangay laeng a paset ti panageskuela. Gapu ta ammo dayta dagiti Kristiano a nagannak, ipalubosda ngata a maisarang dagiti annakda iti kasta nga aglawlaw iti uppat wenno nalabit ad-adu pay a tawen? (Proverbio 22:3; 2 Timoteo 2:22) Umdas kadi ti magunggona dagiti agtutubo no idilig iti peggad a mabalin a mapasaranda? Kangrunaanna, ania ti idagadag ti unibersidad a rumbeng nga iyun-una dagiti agtutubo iti biagda?a (Filipos 1:10; 1 Tesalonica 5:21) Nasken a sikakararag ken usigen a naimbag dagiti nagannak dagitoy a saludsod, agraman dagiti peggad nga iyeg ti panangpaadal kadagiti annakda iti sabali a siudad wenno pagilian.

Ania Dagiti Mabalin nga Aramiden?

14, 15. (a) Nupay maisupadi iti kuna ti kaaduan, ania ti balakad ti Biblia nga agaplikar ita? (b) Ania a salsaludsod ti nasayaat nga imtuoden dagiti agtutubo iti bagida?

¹⁴ Kaaduan ita ti agkuna nga agballigi laeng dagiti agtutubo no agadalda iti kolehio. Ngem imbes a surotenda ti kuna ti kaaduan, ipangag dagiti Kristiano ti balakad ti Biblia: “Dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Ania aya ti pagayatan ti Dios kadagiti adipenna, ubbing ken nataengan, bayat daytoy maudi a paset ti tiempo ti panungpalan? Ni Pablo pinaregtana ni Timoteo: “Agtalinaedka a sipupuot iti amin a bambanag, anusam ti dakes, aramidem ti trabaho ti managebanghelio, naan-anay nga itungpalmo ti ministeriom.” Sigurado nga agaplikar dagita a sasao kadatayo amin ita.​—2 Timoteo 4:5.

¹⁵ Imbes a sumurottayo iti materialistiko nga espiritu daytoy a lubong, kasapulantayo amin ti ‘agtalinaed a sipupuot’​—nasalukag iti naespirituan. No maysaka nga agtutubo, imtuodem iti bagim: ‘Ar-aramidek ngata ti amin a kabaelak a “mangitungpal iti ministeriok,” tapno agbalinak a kualipikado a ministro ti Sao ti Dios? Ania dagiti planok tapno “naan-anay” a matungpalko ti ministeriok? Panggepko kadi a pagbalinen a karerak ti amin-tiempo a panagserbi?’ Narigat dagitoy a saludsod, nangnangruna no makitayo ti dadduma nga agtutubo a naipamaysa kadagiti managimbubukodan a kalatda, a ‘sapsapulenda ti naindaklan a bambanag’ nga ipagarupda a mangyeg kadakuada iti naraniag a masakbayan. (Jeremias 45:5) Gapuna, dagiti Kristiano a nagannak nainsiriban nga ipaayda ti umiso a naespirituan a kasasaad ken panangsanay kadagiti annakda mangrugi iti kinaubing dagitoy.​—Proverbio 22:6; Eclesiastes 12:1; 2 Timoteo 3:14, 15.

16. Kasano a nainsiriban a maipaay dagiti Kristiano a nagannak ti umiso a naespirituan a kasasaad kadagiti annakda?

¹⁶ “Binantayan a naimbag ni Nanang ti pakitimtimpuyoganmi,” kinuna ti inauna kadagiti tallo nga agkakabsat a lallaki maipapan iti inada nga adu a tawenen iti amin-tiempo a ministerio. “Dikami nakibarbarkada kadagiti kaeskuelaanmi no di ket kadagidiay laeng kakongregasionmi nga addaan iti nasayaat nga espiritualidad. Regular met nga awisen ni Nanang dagidiay adda iti amin-tiempo a ministerio​—dagiti misionero, agdaldaliasat a manangaywan, Bethelite, ken papayunir​—tapno aglalangenkami idiay balay. Naimula iti pusomi ti tarigagay a sumrek iti amin-tiempo a panagserbi gapu kadagiti mangmangngegmi a kapadasanda ken ti makitkitami a rag-oda.” Nagragsak a makita ita a simrek dagita a tallo nga annak iti amin-tiempo a ministerio​—maysa ti agserserbi iti Bethel, maysa ti nakatabuno iti Ministerial Training School, ken maysa ti agpaypayunir!

17. Kasano a matulongan dagiti nagannak ti annakda a mangpili kadagiti asignatura ken kurso nga alaenda? (Kitaenyo ti kahon iti panid 29.)

¹⁷ Malaksid a mangipaay dagiti nagannak iti natalged a naespirituan a kasasaad, napateg a nasapa a mangipaayda iti umiso a panangiwanwan no ania nga asignatura ken ababa a kurso ti alaen dagiti annakda. Kuna ti maysa nga agkabannuag a lalaki nga agserserbi ita iti Bethel: “Payunir dagiti dadakkelko sakbay ken kalpasan ti panagkallaysada ket inkagumaanda nga intukit dayta nga espiritu ti kinapayunir kadakami nga annakda. Tunggal mangpilikami kadagiti asignatura idiay eskuelaan wenno mangaramidkami kadagiti desision a mangapektar iti masanguananmi, kanayonda nga iparegta a pilienmi daydiay mangipaay kadakami iti kasayaatan a gundaway a makabirok iti paset-tiempo a panggedan ken makapagpayunir.” Imbes a mangpili kadagiti asignatura a mangiparegta iti panangala iti nangatngato nga edukasion, nasken a pilien dagiti nagannak ken annakda no ania a kurso ti makatulong iti panangragpat iti amin-tiempo a ministerio kas karera.b

18. Aniada a trabaho ti mabalin nga ikabilangan dagiti agtutubo?

¹⁸ Ipakita ti panagadal nga iti adu a pagilian, naganat ti panagkasapulan kadagiti trabahador, saan a kadagiti nagturpos iti nangatngato nga edukasion. Sigun iti USA Today, “70 porsiento kadagiti makalikaguman nga empleado kadagiti sumaganad a dekada ket saan a dagidiay nagturpos iti uppat a tawen a kurso no di ket dagidiay nagturpos iti ababa a kurso.” Adu nga eskuelaan ti mangipapaay kadagiti ababa a kurso mainaig iti panagopisina, panagmekaniko, panangtarimaan iti kompiuter, panagtubero, panagpukis ken panagkulot, ken adu pay a trabaho. Nadayaw kadi dagitoy a trabaho? Wen! Nalabit a saanda a natan-ok a kas iti pampanunoten ti dadduma, ngem makatulong dagita tapno nalaka a makabirok iti panggedan dagidiay ti pudpudno a karerada ket agserbi ken ni Jehova.​—2 Tesalonica 3:8.

19. Ania ti katalgedan a pamay-an a masagrap ti naragsak ken makapnek a biag?

¹⁹ “Dakayo nga agtutubo a lallaki ken kasta met dakayo a birhen,” idagadag ti Biblia, “idaydayawda koma ti nagan ni Jehova, ta ti naganna laeng ti di magaw-at ti kangatona. Ti dayawna adda iti ngatuen ti daga ken langit.” (Salmo 148:12, 13) No idilig kadagiti posision ken gunggona nga ituktukon ti lubong, awan duadua a ti amin-tiempo a panagserbi ken ni Jehova ti katalgedan a pamay-an tapno masagrap ti naragsak ken makapnek a biag. Laglagipenyo ti pammatalged ti Biblia: “Ti bendision ni Jehova​—isu dayta ti mangpabaknang, ket awan rigat nga inayonna iti dayta.”​—Proverbio 10:22.

[Footnotes]

Mailawlawagyo Kadi?

• Iti ania nga agtalek dagiti Kristiano agpaay iti natalged a masakbayan?

• Ania dagiti karit a pakaipasanguan dagiti Kristiano a nagannak mainaig iti masakbayan dagiti annakda?

• Ania dagiti nasken nga ikabilangan no sukimaten dagiti ramanen ti pananggun-od iti nangatngato nga edukasion?

• Kasano a dagiti nagannak matulonganda dagiti annakda tapno pagbalinen dagitoy kas karerada ti panagserbi ken ni Jehova?

[Kahon iti panid 29]

Ania ti Pateg ti Nangatngato nga Edukasion?

Kaaduan nga agadal kadagiti unibersidad ti agtarigagay a makaleppas iti maysa a kurso a mangilukat kadakuada kadagiti panggedan a nangato ti sueldona ken natalged. Nupay kasta, ipakita dagiti report ti gobierno iti Estados Unidos a kakapat laeng kadagidiay agkolehio ti makalpas iti kursoda iti uneg ti innem a tawen​—maysa a makapadismaya a resulta. Ken uray pay agturposda, dayta kadi a naileppasda a kurso garantisaranna a makaalada iti nasayaat a trabaho? Imutektekanyo ti kuna dagiti agdama a panagsirarak ken panagadal.

“Ti panageskuela iti Harvard wenno Duke [nga unibersidad] dina garantisaran ti nasaysayaat a trabaho ken nangatngato a sueldo. . . . Dagiti kompania dida am-ammo dagiti aplikante nga agtutubo. Mabalin a makaala iti atension ti nasayaat a rekord (kas iti panagturpos iti Ivy League). Ngem kalpasan dayta, ad-adda a napateg iti kompania no ania ti kabaelan wenno di kabaelan ti aplikante.”​—Newsweek, Nobiembre 1, 1999.

“Nupay dagiti trabaho ita kalikagumanda ti dakdakkel a paglaingan (skill) ngem idi naglabas . . . , dagiti paglaingan a kalikagumanda ket paglaingan a maadalmo iti haiskul​—matematika, panagbasa, ken panagsurat . . . , saan a dagiti maadalmo iti kolehio. . . . Saan a masapul nga agkolehio dagiti estudiante tapno makaalada iti nasayaat a trabaho, no di ket masapul a manggun-odda kadagiti paglaingan a mabalin a masursuroda iti haiskul.”​—American Educator, Spring 2004.

“Kaaduan nga eskuelaan iti kolehio ket saan a realistiko no maipapan iti panangisagana kadagiti estudiante nga agtrabaho kalpasan nga agturpos dagitoy. Medio umad-adu ita ti mangal-ala iti ababa a kurso. Ngimmato ti bilangda iti 48% nanipud 1996 agingga 2000. . . . Kabayatanna, saanen a kas iti dati ti pateg dagiti nangina, mangibus iti panawen a kurso iti kolehio.”​—Time, Enero 24, 2005.

“Pattapattaen ti U.S. Department of Labor nga iti tawen 2005, di kumurang a kakatlo kadagiti amin a nagturpos iti uppat a tawen a kurso iti kolehio ket saan a makabirok iti panggedan a maitutop iti naileppasda a kurso.”​—The Futurist, Hulio/Agosto 2000.

Gapu kadagitoy a banag, umad-adu a mannursuro ti agduaduan no talaga a napateg ti nangatngato nga edukasion ita. “Ipapaayantayo dagiti tattao iti edukasion a dida met mausar iti masanguanan,” inyasug ti report ti Futurist. Maisupadi iti dayta, imutektekanyo ti kuna ti Biblia maipapan iti Dios: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon ti baybay.”​—Isaias 48:17, 18.

[Ladawan iti panid 26]

Tinallikudanda dagiti personal nga aktibidadda ket simmurotda ken ni Jesus

[Ladawan iti panid 31]

Dagiti Kristiano a nagannak nainsiriban a mangipaayda iti natalged a naespirituan a kasasaad para kadagiti annakda mangrugi iti kinaubing dagitoy