DAMDAMAG ITI LUBONG

Lubong

Kinuna ti World Health Organization a ti malang-ab manipud iti tambutso ti makina nga agandar babaen iti krudo “ket adda pakainaiganna iti idadakkel ti posibilidad nga agkanser ti bara” ken mabalin nga uray ti basisaw.

Antarctica

Dagiti pollen ken semilia a nagbalin a fossil a naala iti lansad ti baybay ti mangipakita nga agbibiag idi iti Antarctica dagiti palma ken dadduma pay a kayo a makita la ita kadagiti lugar nga asideg iti tropiko. Adu ti mamati a minilion a tawenen ti napalabas, kalkalaingan laeng ken “di agyelo” ti tiempo ti lam-ek iti daytoy a lugar. Saan met unay idi a dakkel ti nagdumaan ti temperatura dagiti poles ken ti equator.

Ireland

Sigun iti report nga impablaak ti Association of Catholic Priests ti Ireland idi 2012, patien ti 87% kadagiti nasurbey a Katoliko ditoy a rumbeng a mapalubosan dagiti papadi a mangasawa; mamati ti 77% a rumbeng a mapalubosan nga agpadi dagiti babbai.

Abagatan ti Sahara iti Africa ken Abagatan a Daya nga Asia

Idi naeksamen dagiti agas kontra malaria, naduktalan nga iti dadduma a lugar, dagiti agas ket masansan a nababa ti kalidadda wenno peke. Nagbanag dayta iti di umiso wenno di epektibo a panangagas. Napaneknekan a peke ti 36% kadagiti naeksamen a sampol nga agas iti Abagatan a Daya nga Asia ken 20% iti abagatan ti Sahara iti Africa.

El Salvador

Idi Abril 15, 2012, impakaammo dagiti opisial ti gobierno ti kaunaan nga aldaw nga awan ti napapatay iti las-ud ti dandani 3 a tawen iti El Salvador. Yantangay nasaknap ti kinaranggas iti dayta a pagilian gapu iti droga, ti bilang dagiti napapatay idi 2011 nadanonna ti 69 kada 100,000—maysa kadagiti kakaruan iti lubong.