Ilawlawag ti Maysa nga Orthopedic Surgeon No Apay a Mamati iti Dios

Apay a nagbalinka nga interesado iti siensia?

Idi ubingak, pagay-ayatko ti nakaparsuaan. Dimmakkelak iti Richterswil, maysa a napintas a lugar iti Switzerland iti igid ti Lake Zurich. No dadduma, ipasiardak dagiti nagannak ken kakabsatko ken isuroda kaniak ti maipapan kadagiti parsua ken mula a malabsanmi.

Apay nga inadalmo no kasano nga operaen dagiti tultulang, susuop, ken pennet?

Apagbiit a nagtrabaho idi ni tatangko kas attendant iti operating room iti maysa nga ospital iti lugarmi. Nakagangganaygay a mangestoria maipapan kadagiti nakitana a panagopera sadiay isu a rimmayray ti interesko ket nagbalinak a siruhano idi agangay. Nagbalinak nga espesialista iti panagopera kadagiti tultulang, susuop, ken pennet gapu ta iti daytoy a propesion, magustuak ti agpanunot a kas iti inheniero tapno matarimaan dagita a paset ti bagi a mamagkuti kadatayo.

Kangrunaan iti amin, maragsakanak a makakita iti isasayaat ti salun-at dagiti pasientek. Talaga a magustuak ti makilangen iti tattao.

Apay a pagduaduaam idi ti kaadda ti Dios?

Nangrugi ti panagduaduak idi tin-edyerak. Dua ti kangrunaan a makagapu. Umuna, natakuatak nga immoral ti dadduma a mangisursuro iti relihion iti simbaan isu a nariribukanak unay. Maikadua, dadduma kadagiti mannursurok iti biology ket mamati iti ebolusion—maysa a pannursuro nga inakseptarko nangruna idi ages-eskuelaakon iti unibersidad.

Apay a namatika iti ebolusion?

Pinatik ngamin dagiti propesorko. Impagarupko met a ti panagpapada ti estruktura ti bagi ti dadduma a kita ti animal ti mangipakita a maymaysa ti nagtaudanda ken mangpaneknek iti teoria a ti panagbalbaliw ti pakabuklan dagiti natawid a gene (mutation) ket agresulta iti itataud dagiti baro a kita ti animal.

Ngem apay a nagbalbaliw ti kapanunotam?

Adda gayyemko a nangawis kaniak a tumabuno iti gimong dagiti Saksi ni Jehova. Bilibak ta mannakigayyem dagidi adda sadiay ken makaisuro dagiti palawag. Kalpasanna, sinarungkarannak ti maysa a nasingpet a babai iti dayta a kongregasion. Dinamagko kenkuana no kasano a masiertok nga umiso ti Biblia.

Impakitana kaniak dagiti padto ti Biblia maipapan iti adu a pasamak a matungtungpalen iti kaaldawantayo. Ti maysa a pagarigan ket ti padto ni Jesus a pagilasinan ti maudi nga al-aldaw ti agdama a lubong: gubat iti nadumaduma a nasion, “dadakkel a ginggined,” ken nasaknap nga ‘angol ken kinakirang ti taraon.’a Dinakamatna met dagiti padto maipapan iti nariribuk a kagimongan ken ikakaro ti kinaagum ken dadduma a kinadakes a makitkitatayo ita.b Di nagbayag, rinugiakon ti napasnek a panagadalko iti Biblia ket idi agangay, naamirisko a kanayon a pumayso dagiti padtona. Inusigko met ti panangmatmatko maipapan iti nagtaudan iti biag.

Nakatulong kadi ti panagsirarakmo iti medisina tapno makombinsirka nga adda nagtaudan ti biag?

Wen. Idi rinugiak nga adalen ti Biblia, madama ti panagsirarakko maipapan iti panagopera iti tumeng. Idi maudi a paset ti 1960’s, nalawlawagen ti pannakaawat dagiti sientista iti komplikado a mekanismo ti tumeng. Natakuatanda a saan la nga agpilko ti tumengtayo iti maymaysa a direksion a kas iti bisagra no di ket agpuligos ken aguyas tapno makapagna, makasala, maka-skate, ken adu pay ti maaramidtayo.

Agarup 40 a tawenen nga ikagkagumaan dagiti managsirarak ti mangdisenio iti artipisial a tumeng. Ngem narigat a tuladen ti tumeng ti tao yantangay komplikado dayta. No idilig met iti tumengtayo, saan unay nga agpaut dagiti artipisial a tumeng. Uray de kalidad dagiti materiales a mausar, maayatanen dagiti diseniador no agpaut iti 20 a tawen dagiti produktoda. Siempre, ti tumengtayo ket buklen dagiti sibibiag a selula a kanayon a mapabpabaro. Para kaniak, ti tumeng ket ebidensia a saan a naiparna a timmaud dayta babaen iti ebolusion. Imbes ketdi, nadisenio babaen iti sirib ti Dios.

Dagiti ngay mutation ken panagpapada ti estruktura ti bagi ti dadduma a kita ti animal?

Dayta a panagpapada paneknekanna nga adda maymaysa a Diseniador. Dagiti met mutation dida mapasayaat dagiti disenio kadagiti sibibiag nga organismo babaen ti panamagbalinna kadagita a nangatngato a kita. Imbes ketdi, ti mutation madadaelna dagiti genes. Siempre, posible nga adda pagsayaatan ti maysa nga aksidente—kas koma no ti tren ket maidungpar iti rangtay isu a madadael dayta, iti kasta, masalakniban ti siudad manipud kadagiti rumaut a soldado. Ngem dayta nga aksidente dina mapasayaat ti kasasaad ti siudad. Kasta met laeng dagiti mutation—dida mapasayaat dagiti organismo. Dida met pulos makapataud iti nakasaysayaat a disenio kas iti tumeng ti tao—ken ti dadduma pay a paset ti bagitayo.

Apay a nagbalinka a maysa kadagiti Saksi ni Jehova?

Idi rinugiak a yaplikar dagiti prinsipio ti Biblia, dakkel ti simmayaatan ti kalidad ti biagko. Kasta met nga idi timmabunoak iti internasional a kombension dagiti Saksi ni Jehova idi 2003, nakitak ti kasla pamilia a naisangsangayan a panagkaykaysada, uray kadagiti delegado a damdamoda pay laeng nga agkikita. Ipakpakitada ti pudno nga ayat iti maysa ken maysa ket kayatko ti agbalin a maysa kadakuada.