Ti Napuskol a Dutdot ti Emperor Penguin

SIPAPARTAK a makalangoy ti emperor penguin ken nakaskasdaaw ti kapaspasna a sumagpat iti nangato a disso iti kayeluan. Kasano?

Usigem: Agur-urnong iti angin dagiti dutdot ti emperor penguin. Daytoy ti mangpaimeng kenkuana iti nakaro a lamiis ken mangpapartak pay kenkuana nga aggaraw iti mamindua wenno mamitlo ngem iti gagangay a kapartakna. Kasano? Babaen iti panangiruarna iti babassit a labutab manipud iti nagbabaetan dagiti dutdotna, sigun kadagiti marine biologists. Maksayan ti risiris iti makinrabaw a dutdot ti penguin bayat ti panagruar dagitoy a labutab, isu a lalo a pumartak.

Makapainteres ta ad-adalen dagiti inheniero no kasanoda a mapapartak dagiti barko babaen kadagiti labutab a mangkissay iti risiris iti kaha dagita a lugan. Kayat a tuladen dagiti managsirarak ti abilidad ti penguin a mangkissay iti risiris bayat nga aglanglangoy. Ikagkagumaanda ti agaramid kadagiti materiales nga umasping iti dutdot ti penguin ngem marigatanda.

Ania ti makunam? Babaen kadi iti ebolusion a timmaud ti napuskol a dutdot ti emperor penguin? Wenno nadisenio dayta?