Ania ti Pangrukodam iti Balligi?

Tapno masubokmo ti bagim, panunotem dagitoy a senario.

Para kenka, asino ti pudpudno a naballigi?

• 

  ALEX

  Adda negosio ni Alex. Isu ket mapagpiaran, nagaget, ken nadayaw. Immasenso ti negosiona isu a nanam-ay ti biagna ken ti pamiliana.

• 

  CAL

  Adda met negosio ni Cal a kas ken Alex, ngem dakdakkel nga amang ti mapastrekna a kuarta ngem ni Alex. Ngem iti panangikagumaan ni Cal a makikompetensia, ti la negosiona ti as-asikasuenna isu a naaddaan iti adu a sakit.

• 

  JANET

  Ni Janet ket maysa nga estudiante iti haiskul. Naanep nga agadal ken pagay-ayatna ti agsursuro isu a nangato dagiti gradona.

• 

  ELLEN

  Nangatngato dagiti grado ni Ellen ngem ni Janet ken adda iti honor-roll. Nupay kasta, agkuskusit no adda eksamenasion ken awan unay interesna iti panagadalna.

No ti sungbatmo ket da Cal ken Ellen—wenno aminda nga uppat—ti naballigi, amangan no dagiti laeng resulta ti pangrukrukodam iti balligi, aniaman a pamay-an ti nausar a pangragpat iti dayta.

Ngem no da Alex ken Janet laeng ti pinilim, posible a ti pangrukrukodam iti balligi ket ti ugali ken dagiti nasayaat a kababalin ti maysa a tao iti trabahona. Rumbeng laeng a kasta. Usigem dagitoy a pagarigan.

• Ania ti nasaysayaat para iti manayon a pagimbagan ni Janet—makaala kadagiti kangatuan a grado wenno maadalna nga ipateg ti panagsursuro?

• Ania ti nasaysayaat para kadagiti annak ni Alex—maaddaanda iti adu a kuarta tapno magatangda ti amin a kayatda wenno maaddaanda iti ama a mangipakpakita nga ipatpategna ti panawen a kaduana ida?

Laglagipem: Ti sinsinan balligi ket naibasar iti makitkita ngem ti pudpudno a balligi ket naibasar kadagiti umiso a prinsipio.