Ipangag ni Jehova ti Panagpatulong ti Malmaldaangan

KAS napaliiw ti masirib nga ari a ni Solomon iti Israel, “ti tiempo ken ti di mapakpakadaan a pasamak mapagteng [kadatayo] amin.” (Ecl. 9:11) Mabalin a dakkel ti epektona iti biagtayo ti maysa a trahedia wenno nakaro a pakarigatan. Kas pagarigan, mabalin a mangyeg iti saem ken ladingit ti di mapakpakadaan nga ipapatay ti nasinged a kapamilia, ken nalabit nga agpaut dayta iti sumagmamano a lawas ken bulbulan. Mabalin a malapunos iti pannakaupay ti maysa agingga a mariknana a saanen a maikari nga umadani ken Jehova iti kararag.

Kadagiti kasta a kasasaad, kasapulan ti maysa ti pammaregta, konsiderasion, ken ayat. Makapabileg ti inkanta ni salmista a David: “Ni Jehova mangipaay iti saranay kadagiti amin a mapasag, ket patakderenna ti isuamin a maparukob.” (Sal. 145:14) Kuna kadatayo ti Biblia a ‘mapan nga agsublisubli dagiti mata ni Jehova iti intero a daga tapno ipakitana ti pigsana maigapu kadagidiay a ti pusoda naan-anay kenkuana.’ (2 Cron. 16:9) Isu ket adda kadagiti ‘nailupitlupit ken napakumbaba ti espirituna, tapno paungarenna ti espiritu dagidiay napakumbaba wenno, malmaldaangan ken tapno paungarenna ti puso dagidiay mailupitlupit.’ (Isa. 57:15) Kasano a tulongan ken liwliwaen ni Jehova dagiti malmaldaangan?

‘Sao iti Umiso a Tiempo’

Ti maysa kadagiti pamay-an a mangipapaay ni Jehova iti tulong iti umiso a tiempo ket babaen kadagiti Kristiano a kakabsat. Naibalakad kadagiti Kristiano nga ‘agsaoda iti makaliwliwa kadagiti malmaldaangan a kararua.’ (1 Tes. 5:14) Dagiti naayat ken naasi a sasao dagiti kapammatian ket makapabileg iti maysa a malmaldaangan. Dagiti makaliwliwa a sasao a mayebkas uray kadagiti apagbiit laeng a panagsasarita ket makapabilegen iti malmaldaangan. Mabalin nga agtaud dagita iti maysa a nangdaer iti kasta a panagleddaang. Wenno babaen kadagiti nainsiriban a kapaliiwan ti maysa a gayyem nga aduan iti kapadasan iti biag. Babaen kadagitoy a praktikal a pamay-an a pabpabilgen ni Jehova dagiti malmaldaangan.

Usigentayo ti kapadasan ti kakaskasar a Kristiano a panglakayen nga agnagan iti Alex. Di ninamnama a natay ni baketna gapu iti di maagasan a sakitna. Maysa a mannakipagrikna nga agdaldaliasat a manangaywan ti nangiranud ken Alex iti makaliwliwa a sasao. Natayan met iti asawa ngem nagasawa manen idi agangay. Inlawlawag ti agdaldaliasat a manangaywan no kasano a nalapunos met idi iti liday. Magin-awaan no kaduana dagiti kakabsat iti ministerio ken kadagiti gimong. Ngem no agmaymaysan iti kuartona, napalalon ti lidayna. “Makapabang-ar a maammuan a normal laeng gayam ti marikriknak ken mapaspasaran met dayta ti dadduma,” kuna ni Alex. Wen, ‘ti sao a nayebkas iti umiso a tiempo’ ket talaga a makaliwliwa kadagiti malmaldaangan.​—Prov. 15:23.

Natignay met a mangliwliwa ken Alex ti maysa pay a Kristiano a panglakayen nga addan kadagiti am-ammo a natayan iti asawa. Buyogen ti ayat ken pannakipagrikna, imbagana nga ammo ni Jehova ti riknatayo ken no ania ti kasapulantayo. “No dumtengto ti tiempo a kayatmo ti maaddaan iti kadua,” kinuna ti kabsat, “mabalinmo ti makiasawa manen, naayat a probision dayta ni Jehova.” Siempre, saan nga amin a nabalo ken agtarigagay a mangasawa manen inton agangay ket mabalinda ti mangasawa manen. Ngem iti panangutobna iti imbaga ti kabsat, kinuna ni Alex: “No maipalagip kenka a maysa a probision ni Jehova ti pannakiasawa manen, ikkatenna ti negatibo a kapanunotan a saanka a nasungdo iti asawam wenno iti urnos ni Jehova.”​—1 Cor. 7:8, 9, 39.

Ti salmista a ni David, a nakapasar a mismo iti adu a suot ken pakarigatan, nabigbigna: “Dagiti mata ni Jehova situturongda kadagidiay nalinteg, ket dagiti lapayagna situturongda iti panagpatulongda.” (Sal. 34:15) Wen, sungbatan ni Jehova iti umiso a tiempo ti panagpatulong ti malmaldaangan babaen kadagiti naasi a sasao dagiti naayat ken nataengan iti naespirituan a kapammatiantayo. Agpadpada a napateg ken makatulong dagiti kasta a probision.

Tulong Babaen Kadagiti Nakristianuan a Gimong

Ti maysa a malmaldaangan ket nalaka nga agpanunot kadagiti negatibo a bambanag a mangituggod kenkuana a mangyadayo iti bagina. Ngem mamakdaar ti Proverbio 18:1: “Ti maysa a mangiputputong iti bagina sapulennanto ti kabukbukodanna nga iniimut a tarigagay; maibusor iti isuamin a praktikal a kinasirib isu umalsanto.” Aminen ni Alex: “No natayanka iti asawa, puro negatibo ti mapanunotmo.” Naisaludsodna pay iti bagina: “‘Adda kadi nasaysayaat pay koma nga inaramidko? Kurang ngata ti impakitak a konsiderasion ken pannakaawat?’ Diak kayat ti agmaymaysa. Kayatko nga adda kaduak. Nagrigat nga iwaksi dagita iti panunotko gapu ta inaldaw nga ammok nga agmaymaysaak.”

Ad-adda a kasapulan ti maysa a malmaldaangan ti makapabileg a pannakilangen. Matagiragsakna dayta kadagiti gimong ti kongregasion. Kadagita a gimong, mapno ti isiptayo kadagiti positibo ken makapabileg a pannursuro ti Dios.

Dagiti gimong tulongandatayo a maaddaan iti natimbeng a panangmatmat iti kasasaadtayo. Bayat nga umim-imdeng ken ut-utobentayo dagiti teksto iti Biblia, maipamaysatayo ti panunottayo iti dua a kapatgan nga isyu​—ti pannakaalangon ti kinasoberano ni Jehova ken ti pannakasantipikar ti naganna​—imbes nga iti bukodtayo a panagsagaba. Kanayonanna, bayat ti gimong, makapabileg a maammuan nga uray saan nga ammo ti dadduma ti pakarigatantayo wenno dida maawatan ti marikriknatayo, sigurado nga ammo ken maawatan dayta ni Jehova. Ammona a “gapu iti saem ti puso adda ti nadanar nga espiritu.” (Prov. 15:13) Kayatnatayo a tulongan ti pudno a Dios, ket dayta ti mangtignay ken mangpabileg kadatayo a di sumuko.​—Sal. 27:14.

Idi naipasango ni Ari David iti nakaro a pakarigatan manipud kadagiti bumusbusor kenkuana, inyararawna iti Dios: “Ti espirituk talipungawen iti unegko; iti kaunggak mabibineg a mismo ti pusok.” (Sal. 143:4) Masansan a mapaksuyan ti maysa nga uray la mabibineg ti pusona gapu kadagiti pakarigatan, kas iti sakit wenno napaut nga an-annayen. Makapagtalektayo a tulongannatayo ni Jehova nga agibtur. (Sal. 41:1-3) Nupay awanen ti paimbagen ita ti Dios babaen ti milagro, ipaayanna iti sirib ken bileg ti maysa nga agsagsagaba tapno madaeranna ti kasasaadna. Laglagipenyo nga idi nagsagaba ni David kadagiti pakasuotan, nagpatulong ken Jehova. “Linagipko dagiti aldaw ti nabayagen a tiempo,” inkantana, “minennamennak ti isuamin nga aramidmo; situtulokak a nangut-utob iti aramid dagiti bukodmo nga ima.”​—Sal. 143:5.

Yantangay nairekord iti Biblia dagita a sasao ni David, pammaneknek dayta a matarusan ni Jehova ti riknatayo. Dagita a sasao ket pammatalged nga ipangagna dagiti pakaasitayo. No awatentayo ti tulong ni Jehova, ‘saranayennatayto.’​—Sal. 55:22.

“Agkararagkayo a Di Agressat”

Kuna ti Santiago 4:8: “Umadanikayo iti Dios, ket isu umadaninto kadakayo.” Ti maysa a pamay-an a makaadanitayo iti Dios ket babaen ti kararag. Idagadag kadatayo ni apostol Pablo nga ‘agkararagtayo a di agressat.’ (1 Tes. 5:17) Uray no marigatantayo a mangyebkas iti rikriknatayo, “ti espiritu a mismo agdawat a maipaay kadatayo buyogen dagiti asug a di mayebkas.” (Roma 8:26, 27) Sigurado a matarusan ni Jehova ti riknatayo.

Ni Monika, nga addaan iti nasinged a relasion ken Jehova, kinunana: “Babaen ti kararag, panagbasa iti Biblia, ken personal a panagadal, nariknak a nagbalin ni Jehova a kasingedan a Gayyemko. Isu ket nagbalin nga ad-adda a pudno a persona kaniak ta mariknak a kanayon a tultulongannak. Makaliwliwa a maammuan nga uray diak mailawlawag ti riknak, maawatannak. Ammok nga aglaplapusanan ti kinaimbag ken pamendisionna.”

Gapuna, awatentayo koma ti naayat ken makaliwliwa a sasao dagiti kapammatiantayo, iyaplikartayo ti naasi a balakad ken makapabileg-pammati a pammalagip a mangngegtayo kadagiti gimong, ken iyebkastayo ti amin a linaon ti pusotayo ken Jehova babaen ti kararag. Babaen kadagita a naintiempuan a probision, ipakpakita ni Jehova a maseknan kadatayo. Maibatay iti kapadasan ni Alex, kinunana: “No aprobetsarentayo ti amin a probision nga ipapaay ni Jehova a Dios a mamagtalinaed kadatayo a natibker iti naespirituan, maaddaantayo iti ‘pannakabalin a nalablabes ngem ti gagangay’ a mangibtur iti aniaman a suot a pakaipasanguantayo.”​—2 Cor. 4:7.

[Kahon/Ladawan iti panid 18]

Liwliwa Para iti Malmaldaangan

Napno dagiti salmo iti nagduduma a rikna ti tao a napakuyogan kadagiti maulit-ulit a pammatalged nga ipangag ni Jehova ti panagpatulong ti maysa a malmaldaangan a nadudog ti pusona. Usigenyo dagiti sumaganad a teksto:

“Iti pannakaparigatko immaw-awagak ken Jehova, ket iti Diosko nagpatpatulongak.Manipud templona nangngegna ti timekko, ket ti mismo a panagpatulongko iti sanguananna dimteng ita kadagiti lapayagna.”​—Sal. 18:6.

“Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.”​—Sal. 34:18.

“[Ni Jehova] paimbagenna dagidiay nasnaayan ti pusona, ket bedbedanna dagiti naut-ot a pasetda.”​—Sal. 147:3.

[Ladawan iti panid 17]

Anian a makaliwliwa iti maysa a malmaldaangan dagiti ‘sasao a mayebkas iti umiso a tiempo’!