No Kasanoyo a Sanguen Dagiti Pagdumaanyo

TI PROBLEMA

Mahiligka iti isports ngem mas kaykayat ti asawam ti agbasa. Metikuloso ken organisadoka ngem medio nawara ti asawam. Magustuam ti makipulapol iti sabsabali ngem saan a kasta ti asawam.

‘Talaga a saankami nga agkabagayan!’ nakunam iti bagim. ‘Apay a saanmi a nadlaw dayta idi agnobiokami pay?’

Nadlawmo met siguro idin. Ngem idi, baka mas managpasensiaka laeng—maysa nga ugali a nagsayaat no ipakitam manen ita ta adda asawamon. Tulongannaka daytoy nga artikulo a mangaramid iti dayta. Ngem umuna, ikabilangam ti dadduma a kinapudno maipapan kadagiti ipapanmo a pagdumaanyo.

TI MASAPUL A MAAMMUAM

Serioso ti dadduma a pagdumaanyo. Ti kangrunaan a panggep ti panagnobio ket tapno makita ti dua no agkabagayanda met laeng. Isu a no adda dagiti serioso a madiskobre a nagdumaan, adu dagiti agnobio nga agsina imbes a sumrekda iti panagasawa. Ngem kasano met ngarud dagiti babassit a pagdumaan—dagiti saan a talaga a maliklikan iti panagasawa?

Awan ti dua a tao nga eksakto nga agpada. Normal laeng ngarud nga adda dagiti pagdumaan ti agassawa iti maysa wenno ad-adu pay kadagitoy nga aspeto:

Interes. “Diak man la magustuan dagiti aktibidad iti ruar ti balay,” kuna ti asawa a babai a ni Anna,a “ngem inkaubingan ni lakayko ti umul-uli kadagiti naniebe a bambantay ken ti magmagna iti adu nga al-aldaw kadagiti kakaykaywan.”

Nakairuaman. “Kaya ni baketko ti agpuyat sa agriing latta iti alas singko ti bigat. Ngem no siak, masapul a 7-8 nga oras ti turogko ta no saan, iritableak no kua,” kuna ni Brian.

Ugali. Mabalin a saanka a maun-uni idinto ta maibaga ti asawam ti amin a rikriknana. “Sipud kinaubingko, diak ugali nga ibagbaga dagiti problemak iti sabsabali,” kuna ti asawa a lalaki a ni David, “ngem dimmakkel ni baketko iti pamilia a naruam a maibagada ti amin.”

Adda pagimbaganna dagiti pagdumaan. “Mabalin a mayat met ti pamay-ak, ngem dina kayat a sawen a dayta laengen ti kakaisuna a pamay-an,” kuna ti asawa a babai a ni Helena.

TI MABALINMO NGA ARAMIDEN

Suportaram ti hiligna. Kuna ti asawa a lalaki a ni Adam: “Awan a pulos ti interes ni baketko a Karen iti isports. Ngem kadkaduaennak no kua a mapan agbuya iti ay-ayam ken giddanannak pay ketdi nga ag-cheer. Ti met hilig ni Karen ket mapan kadagiti art museum, isu a kadkaduaek no kua a mangbuya kadagiti displey agingga iti kaykayatna. Ar-aramidek ti amin tapno aginteresak iti arts ta importante dayta kenkuana.”—Prinsipio ti Biblia: 1 Corinto 10:24.

Palawaem ti panagpampanunotmo. Dina kayat a sawen a kamali ti kapanunotan ti asawam gapu laeng ta naiduma iti kapanunotam. Dayta ti nasursuro ti asawa a lalaki a ni Alex. “Kunak idi no maymaysa la ti epektibo a pamay-an a mangaramid iti maysa a banag ket saanen nga epektibo ti aniaman pay a sabali a pamay-an,” kunana. “Ngem idi adda asawakon, naawatak nga adu gayam ti pamay-an a mangaramid iti maysa a banag, ken adda latta pagsayaatanna ti tunggal pamay-an.”—Prinsipio ti Biblia: 1 Pedro 5:5.

Agbalinka a realistiko. Saan a masapul nga agpadakayo iti amin a banag tapno laeng makuna nga agkabagayankayo. Isu a dimo koma ibaga a nagkamalika iti nakiasawaan gapu laeng ta addan dagiti makitam a pagdumaanyo. “Pagpambar ti adu a tattao, ‘Binulseknak ni ayat,’” kuna ti libro a The Case Against Divorce. Ngem “ti kada aldaw a naragsakkayo nga agkadua,” intuloy ti libro, “ti mangipakita nga uray adda dagiti nairamuten a nagdumaanyo, posible latta a maayatyo ti maysa ken maysa.” Ikagumaanyo nga ‘itultuloy nga anusan ti maysa ken maysa no ti asinoman adda pakaigapuan ti reklamona maibusor iti sabali.’—Colosas 3:13.

Padasem daytoy: Isuratmo dagiti kayatmo ken magustuam iti asawam, ken dagiti pagpadaanyo. Kalpasanna, isuratmo dagiti makitam a pagdumaanyo. Mabalin a makitamto a saan met gayam a kasdiay kaserioso dagiti pagdumaanyo a kas iti pampanunotem. Makitam met kadagiti insuratmo no ania dagiti situasion a mas maipakitam pay ti panagbalin a managpasensia wenno aspeto a pangsuportaram pay iti asawam. “Maapresiarko no pakibagayannak ni baketko, ken ammok a maapresiarna met no pakibagayak isuna,” kuna ni Kenneth. “Uray no kasapulan nga agsakripisioak, basta makitak isuna a naragsak, naragsakak metten.”—Prinsipio ti Biblia: Filipos 4:5.