Nagpipintas a Macaw

NABIAG ken agduduma a kolor ti makita bayat nga agtatayab ti pinangen a billit a rumrummuar iti kabakiran! Pirmi a naay-ayatan iti dayta a nakapimpintas a buya dagiti European nga eksplorador, a nangrugi nga agsangpet idiay Central ken South America idi maudi a tawtawen ti 1400’s. Ania ti nakitada? Dagiti macaw​—dagiti atiddog ti ipusna a parrot nga aggigian kadagiti tropikal a rehion ti Americas. Di nagbayag, nagparangen dagiti ladawan dagitoy a nagpipintas a billit kadagiti mapa ti rehion kas simbolo ti kadisdiskobre a paraiso.

Saan a kas iti kaaduan a dekolor a billit, agpada a nabiag ken narangrang ti kolor ti lalaki ken babai a macaw. Nalaing dagiti macaw ken kanayon nga agkakaduada kas grupo. Nakapigpigsa ken makatitileng ti ikkisda. Pinangenda no pumanawda iti agsapa kadagiti pagaponanda tapno agsapul kadagiti bukel, prutas, ken dadduma pay a makanda. Umabut iti agarup 30 a macaw ti maysa a pangen. Kas gagangay kadagiti parrot, ti karaykayda ti usarenda a pangpetpet iti kanenda, ken kittabenda dayta babaen ti dakkel ken nagkurba a sippitda. Mabettakda pay ti natangken a balay dagiti nuts! No makapangandan, kaaduanna a sangapangen a mapanda kadagiti rangkis wenno igid ti karayan tapno tuktutuktoken sa kanenda dagiti pila (clay), a mabalin a makatulong tapno saanda a masabidongan kadagiti toxin a naggapu kadagiti kinnanda. Mangted pay dagiti pila kadagiti kemikal a kasapulan ti bagida.

Gagangay kadagiti macaw a maymaysa laeng ti asawada agingga a matayda, ken agtinnulongda a mangaywan kadagiti babassit nga annakda. Adda dagiti species nga agumok kadagiti abut ti kayo, abut iti igid ti karayan ken bunton ti anay, wenno ab-abut ken rikki kadagiti rangkis a pakakitaam kadagiti agassawa a mangdaldalus iti maysa ken maysa. No innem a bulandan, naan-anay a dadakkeldan, ngem makipagyanda latta kadagiti nagannakda agingga nga agarup tallo ti tawenda. Iti kabakiran, umabut iti 30-40 a tawen ti biagda, ngem no maipupok ken maaywananda, adda dagiti agbiag agingga iti nasurok nga 60 a tawen. Adda sumurok-kumurang a 18 nga species. Naipakita ditoy ti dadduma.