Dagiti Anghel

Siasino dagiti anghel?

TI KUNA TI BIBLIA

Sakbay pay a pinarsua ti Dios ti pisikal nga uniberso ken ti immuna a tao, naparsuanan dagiti masirib a parsua a nangatngato ngem tao. Nabilbilegda ngem kadagiti tattao ken aggigianda iti lugar nga ayan ti Dios. Saan a madanon ken makita dayta ti tao. (Job 38:4, 7) Aw-awagan ti Biblia dagitoy a parsua kas “espiritu” ken “anghel.”—Salmo 104:4.a

Mano ti bilang dagiti anghel? Nakaad-adu. Dagiti anghel nga adda iti aglawlaw ti trono ti Dios ket “linaklaksa a laksa ken rinibu a ribu.” (Apocalipsis 5:11) No literal daytoy a sasao, agdagup dagiti anghel iti ginasut a milion!

‘Nakitak ti adu nga anghel iti aglawlaw ti trono, ket ti bilangda linaklaksa a laksa ken rinibu a ribu.’—Apocalipsis 5:11.

Ania ti ar-aramiden dagiti anghel idi un-unana?

TI KUNA TI BIBLIA

Masansan idi nga agserbi dagiti anghel kas pannakangiwat wenno mensahero ti Dios.b Sigun pay iti Biblia, nausarda met a mangibanag kadagiti milagro ti Dios. Imbaon ti Dios ti maysa nga anghel tapno bendisionanna ni Abraham ken lapdanna a mangidaton iti anakna a ni Isaac. (Genesis 22:11-18) Nagparang ti maysa nga anghel ken Moises iti tengnga ti sumsumged a bassit a kayo tapno idanonna ti nakapatpateg a mensahe. (Exodo 3:1, 2) Idi naitapuak ni propeta Daniel iti abut dagiti leon, ti “Dios imbaonna ti anghelna ket kinaemna ti ngiwat dagiti leon.”—Daniel 6:22.

“Ti anghel ni Jehova nagparang ken [Moises] iti gil-ayab ti apuy iti tengnga ti siitan a bassit a kayo.”—Exodo 3:2.

Ania itan ti ar-aramiden dagiti anghel?

TI KUNA TI BIBLIA

Saantay a maammuan amin nga ar-aramiden dagiti anghel ita. Ngem ipakita ti Biblia nga adda pasetda iti panangtulong kadagiti napudno a tattao a mangammo iti ad-adu pay maipapan iti Dios.—Aramid 8:26-35; 10:1-22; Apocalipsis 14:6, 7.

Iti tagtagainep ni patriarka a Jacob, impakita ni Jehova dagiti anghel nga umul-uli ken umul-ulog iti “agdan” iti nagbaetan ti langit ken daga. (Genesis 28:10-12) Gapu iti dayta a tagtagainep, mapanunottayo ti mabalin a napanunot met idi ni Jacob—nga ibabaon ni Jehova a Dios dagiti anghel ditoy daga tapno maipaay ti kasapulan a tulong dagiti matalek a tattao.—Genesis 24:40; Exodo 14:19; Salmo 34:7.

‘Adda agdan a naisaad iti rabaw ti daga ket ti murdongna dumanon iti langlangit; ket adda dagiti anghel ti Dios nga umul-uli ken umul-ulog iti dayta.’—Genesis 28:12.