Ti Pateg ti Panangiwanwan Dagiti Adulto

ANIA TI RAMANEN TI PANANGIWANWAN DAGITI ADULTO?

Kasapulan dagiti ubbing ti panangiwanwan ken balakad dagiti adulto. Kangrunaan a responsabilidadmo dayta kas nagannak, ngem makatulong met ti dadduma nga adulto a mangisuro iti annakmo.

APAY A NAPATEG TI PANANGIWANWAN DAGITI ADULTO?

Iti adu a pagilian, manmano a makalangen dagiti ubbing dagiti adulto. Usigem daytoy:

• Iti eskuelaan ti pangusaran dagiti ubbing iti kaaduan nga orasda, a sadiay ket ad-adu nga amang dagiti estudiante ngem kadagiti mannursuro ken dadduma nga adulto.

• Kalpasan ti klase, agawid ti dadduma nga ubbing iti balayda nga awan masangpetanda ta agpada nga agtrabtrabaho dagiti nagannakda.

• Sigun iti maysa a panagadal idiay United States, dagiti ubbing nga agtawen iti 8 agingga iti 12 us-usarenda ti average nga agarup 6 nga oras iti kada aldaw kadagiti gadyetda.a

Kuna ti libro a Hold On to Your Kids: “Umad-adu dagiti agtutubo nga agpapaisuro, mangtultulad, ken agpatpatulong saan a kadagiti inna, amma, mannursuro, ken iti dadduma a responsable nga adulto no di ket . . . kadagiti kasadaranda.”

NO KASANO TI MANGIWANWAN

Makikaduaka kadagiti annakmo.

PRINSIPIO TI BIBLIA: “Sanayem ti ubing iti dalan a rumbeng a papananna; uray inton lumakay saannanto a panawan dayta.”​—Proverbio 22:6.

Natural laeng a kayat dagiti ubbing ti agpatulong kadagiti nagannakda. Kinapudnona, kuna dagiti eksperto nga uray tin-edyerdanton, kaykayatda ti balakad dagiti nagannakda ngem kadagiti kapatadanda. “Dagiti nagannak latta ti kangrunaan a mangimpluensia kadagiti ugali ken kababalin ti anakda manipud kinaubingda agingga iti kinaagkabannuagda,” insurat ni Dr. Laurence Steinberg iti libro a You and Your Adolescent. Innayonna: “Kayat a maammuan dagiti tin-edyer ti pampanunotem ken denggenda ti ibagbagam, uray no saanda a kanayon nga awaten ken anamongan ti amin nga ibagbagam.”

Gundawayam ti natural a pagannayasan ti annakmo nga agpatulong kenka. Makikaduaka kadakuada ken ibagam dagiti opinionmo, prinsipiom, ken kapadasam.

Mangbirok iti mangisuro.

PRINSIPIO TI BIBLIA: “Ti makikadkadua iti masirib agbalinto a masirib.”​—Proverbio 13:20.

Adda kadi am-ammom a mabalin a nasayaat a pagtuladan para iti tin-edyer nga anakmo? Apay a dimo ipakadua ti anakmo kenkuana? Siempre, saan met a kasapulan nga itedmo kenkuana ti autoridadmo kas nagannak. Ngem ti pammaregta ti mapagtalkan nga adulto nga ammom a dina isagmak ti anakmo, ket makatulong iti panangsanaymo kenkuana. Iti Biblia, uray adulto idin ni Timoteo, nakatulong unay ti pannakikadkaduana ken apostol Pablo, ket nakatulong met ken Pablo ti pannakigayyemna ken Timoteo.​—Filipos 2:20, 22.

Iti napalabas a siglo, adu a pamilia ti nagsisina gapu ta dagiti apong, angkel, anti, ken dadduma pay a kabagian ket mabalin nga agnanaeden iti sabali a paset ti lubong. No kasta ti situasionmo, mangaramidka kadagiti pamay-an tapno makasursuro dagiti tin-edyer nga annakmo kadagiti adulto nga addaan kadagiti ugali a kayatmo a matulad dagiti annakmo.