Salun-at
Ti Biblia ket saan a libro ti medisina. Ngem naglaon iti balakad a makatulong kadatayo a maaddaan iti nasalsalun-at a biag. Kitaem ti dadduma a prinsipio ti Biblia a mangpasalun-at iti bagim.
AYWANAM TI BAGIM
PRINSIPIO TI BIBLIA: “Awan pay a pulos ti tao a nanggura iti bukodna a bagi, no di ket pakanen ken dungdungnguenna dayta.”—Efeso 5:29.
TI KAIPAPANANNA: Iparegta daytoy a prinsipio ti Biblia nga aramidentayo ti amin a kabaelantayo a mangaywan iti salun-attayo. Ipakita ti maysa a panagadal nga adu a sakit ti resulta ti estilo ti panagbiag a pinili dagiti tattao. Isu a no pilientayo ti nasaysayaat nga estilo ti panagbiag nasalsalun-attayo.
TI MABALINMO NGA ARAMIDEN:
Nutrision. Manganka kadagiti nasustansia ken uminumka iti umdas a danum.
Agehersisioka. Aniaman ti edadmo, baldadoka man wenno saan nga umim-imbag ti sakitmo, sumalun-atka no agehersisioka. Makatulong ti pamiliam ken doktormo iti panagehersisiom ngem masapul a sika ti mangaramid iti dayta tapno magunggonaanka!
Saanka nga agpuyat. Ti kanayon a panagpuyat ket agresulta kadagiti nakaro a sakit. Adu ti mapuypuyat gapu iti pinilida nga estilo ti panagbiag. Ngem no piliem ti umdas a turog, pilpiliem ti nasaysayaat a biag.
ISARDENGMO DAGITI DAKES A BISIO
PRINSIPIO TI BIBLIA: “Dalusantayo ngarud ti bagitayo iti amin a mangrugit iti lasag ken espiritu.”—2 Corinto 7:1.
TI KAIPAPANANNA: Sumalun-attayo no ditay agusar kadagiti makadangran a produkto kas iti sigarilio, a kangrunaan a pakaigapuan ti sakit ken ipapatay.
TI MABALINMO NGA ARAMIDEN: Iplanom no kaano nga isardengmon ti agsigarilio ket markaam dayta iti kalendariom. Sakbay dayta nga aldaw, ibellengmo dagiti sigariliom, ashtray, lighter, ken dadduma pay a banag nga us-usarem iti daytoy a bisiom. Dika mapmapan iti ayan dagiti agsigsigarilio. Ibagam iti gagayyemmo ti desisionmo tapno matulongandaka.
DADDUMA PAY A PRINSIPIO TI BIBLIA
Kontakem ti maysa kadagiti Saksi ni Jehova iti lugaryo no kayatmo ti maaddaan iti nayimprenta a Biblia
KANAYONKA NGA AGANNAD.
“No mangipatakderkayo iti balay, masapul a barandiliasanyo ti atepna, tapno dikay makabasol iti dara no adda matnag manipud iti dayta.”—DEUTERONOMIO 22:8.
KONTROLEM TI PUNGTOTMO.
“Ti nabannayat nga agpungtot nauneg ti pannakatarusna, ngem ti saan a makaan-anus ipakpakitana ti kinamaagna.”—PROVERBIO 14:29.
LIKLIKAM TI KINARAWET.
“Dika makikadua . . . kadagidiay narawet.”—PROVERBIO 23:20.