4. Nairanta Kadi nga Agsagabatayo?

No Apay a Napateg a Maammuam ti Sungbat

Ti sungbat iti daytoy a saludsod apektaranna ti panangmatmattayo iti biag.

Panunotem

Apay pay laeng a pinarsua ti Dios dagiti nagsasayaat a bambanag no ipalubosna met laeng ti panagsagaba?

Pagrason dagiti saan a relihioso a tattao ti panagsagaba a mangkuestion iti motibo ti Dios wenno no talaga nga adda Dios. Mamatida a ti panagsagaba ipakitana nga (1) awan ti pannakabalin ti Dios a mangpasardeng iti dayta, (2) saan a kayat ti Dios a pasardengen dayta, wenno (3) awan ti Dios.

Dagita laeng kadi ti rason nga agsagaba dagiti tattao?

Ti Kuna ti Biblia

Saannatayo a pinarsua ti Dios tapno agsagaba.

Kayatna a matagiragsaktayo ti biag.

“Awanen ti nasaysayaat para [kadagiti tattao] no di ti panagragsak ken panagaramid iti naimbag bayat ti panagbiagda, kasta met a mangan, uminum, ken tagiragsaken koma ti amin ti bunga ti napasnek a panagtrabahona. Sagut ti Dios dayta.”—ECLESIASTES 3:12, 13.

Nagsayaat ti panggep ti Dios para kadagiti immuna a pagassawaan.

Saanna a kayat nga agrigatda—wenno dagiti agbalin nga annakda.

Imbaga ti Dios kadakuada: “Agpaadukayo ken punnuenyo ti daga ken kultibarenyo.”—GENESIS 1:28.

Inggagara ti immuna a pagassawaan ti agsukir iti Dios.

Gapu iti dayta, nagsagabada ken ti amin nga annakda.

“Babaen ti maysa a tao, simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.”—ROMA 5:12.a

Saan a pinarsua ti Dios ti tao a mangiwanwan iti bagbagida.

No kasano nga imposible nga agyan dagiti tattao iti uneg ti danum, imposible met a maiturayanda ti bagbagida.

“Saan a naikkan ti tao iti autoridad a mangiturong uray iti addangna.”—JEREMIAS 10:23.

Saan a kayat ti Dios nga agsagabatayo.

Agingga a mabalin, saanna a kayat nga agproblematayo.

“No laeng koma tungpalenyo dagiti bilinko! Iti kasta, agbalin ti talnayo a kas iti karayan.”—ISAIAS 48:18.