Kasano nga Apektaran ti Teknolohia ti Panagasawayo?

Ngem adda dagiti agassawa a di umiso ti panangusarda iti teknolohia isu a . . .

• maagaw ti napateg a tiempoda nga agkadua.

• mayawidda ti trabahoda uray saan koma a kasapulan.

• tumaud ti panagduadua ken di kinamatalek.

TI MASAPUL A MAAMMUAM

TIEMPO NGA AGKADUA

Kuna ti asawa a lalaki a ni Michael: “No dadduma, uray agkaduakami ken baketko, kasla saanko met laeng a kadua. Sangkakitana ti selponna sa ibagana, ‘Tattak la a maiggaman daytoy selponko.’” Kuna ti asawa a lalaki a ni Jonathan nga iti kasta a situasion, “agkadua dagiti agassawa ngem kasla agduma a lugar ti ayanda.”

PANUNOTEM: Kasano kasansan nga agawen ti tawag, text, wenno notification ti napateg a tiempom para iti asawam?​—EFESO 5:33.

TRABAHO

Adda dagiti tattao a masapul a kanayon a makontak gapu iti kita ti trabahoda. Adda met dagiti mangiyawid latta iti trabahoda uray saan a kasapulan. Kuna ti asawa a lalaki a ni Lee: “Diak malapdan a kitaen no adda tawag wenno text manipud iti trabahok uray iti tiempo nga inlatangko para ken baketko.” Kuna ti asawa a babai a ni Joy: “Work from home ti trabahok isu a diak ammo no kaanok nga isardeng ti agtrabaho. Nagrigat ti agbalin a balanse.”

PANUNOTEM: Dumdumngegka kadi a naimbag iti asawam no makisarsarita kenka?​—LUCAS 8:18.

KINAMATALEK

Sigun iti maysa a surbey, adu nga agassawa ti agapa gapu ta pagsuspetsaan ti maysa ti im-post ti asawana iti social media. Sangapulo a porsiento kadagiti nasurbey ti nangibaga nga adda dagiti im-post-da iti Internet a saanda a kayat a makita ti asawada.

Adu ti mamati a nakapegpeggad ti social media para kadagiti agassawa ken gapu iti dayta, nalaklaka para kadagiti tattao ti agaramid iti immoralidad. Di pakasdaawan nga ibaga dagiti abogado a ti social media ti makagapu iti adu a panagdiborsio ita.

PANUNOTEM: Ilimlimedmo kadi iti asawam ti pannakisaritam iti kasungani a sekso?​—PROVERBIO 4:23.

TI MABALINMO NGA ARAMIDEN

MANGIKEDDENG KADAGITI PRIORIDAD

Ti tao a saan a mangan iti umiso nga oras ket saan nga agtalinaed a nasalun-at. Umasping iti dayta, agproblema ti relasion ti agassawa no awan ti ilatangda a panawen para iti maysa ken maysa.​—Efeso 5:28, 29.

Pagsaritaanyo nga agassawa dagiti suhestion a kayatyo nga aramiden, wenno isuratyo dagiti bukodyo nga ideya tapno saan a dadaelen ti teknolohia ti relasionyo nga agassawa.

• Agkaduakayo a mangan uray maminsan laeng iti inaldaw

• Mangilatangkayo iti tiempo nga awan ti agusar iti gadyet

• Mangyeskediulkayo iti tiempo nga agdeyt wenno agkaduakayo nga agaramid iti pakaragsakanyo

• Iddepen wenno ikabilyo iti adayo dagiti gadyetyo no maturogkayo

• Mangilatangkayo iti 15 a minuto kada aldaw nga agsarita nga awan ti gadyetyo

• Mangikeddengkayo iti espesipiko nga oras a maiddep ti Internet