Ti Nainsiriban a Panangusar iti Teknolohia

Ti panangusar iti teknolohia ket mabalin a makatulong wenno mangdadael iti relasionyo nga agassawa. Ania ti epekto ti teknolohia iti panagasawayo?

• Ti masapul a maammuam

• Ti mabalinmo nga aramiden

• Ti makuna dagiti agassawa

• Salsaludsod a pagsaritaan

Ti masapul a maammuam

• Ti nainsiriban a panangusar iti teknolohia ket makatulong iti agassawa. Kas pagarigan, us-usaren dayta ti dadduma nga agassawa tapno makapagtungtongda latta iti agmalem uray aginnaddayoda.

  

  “Uray ti panangiteks iti ‘I love you’ wenno ‘I miss you’ ket dakkel ti epektona.”—Jonathan.

• Ti di nainsiriban a panangusar iti teknolohia ket mangdadael iti relasion ti agassawa. Kas pagarigan, sobra ti panangusar ti dadduma a tattao kadagiti gadyetda, isu a bumasbassiten ti oras ken atensionda iti asawada.

  “Siguradok nga adda dagiti tiempo a kaykayat koma ni lakayko ti makitungtong kaniak no saanak la koma idi nga agkaraselpon.”—Julissa.

• Para iti dadduma, nasayaat latta kano ti panagtungtongda nga agassawa uray no us-usarenda ti gadyetda. Sigun iti sociologist a ni Sherry Turkle, “imposible dayta.” Isu a talaga a saan a nasayaat a paggigiddanen nga aramiden dagiti bambanag. Imbagana a ti kinaagpaysuanna, “no ad-adu ti paggigiddanentayo nga aramiden, saan a nasayaat dagiti resultada.”a

  “Maragragsakanak a makiinnestoria ken lakayko no saanna la koma a paggigiddanen nga aramiden dagiti bambanag. Ngamin no agselselpon bayat a makiin-inestoria kaniak, kasla ibagbagana a napatpateg ti gadyetna ngem siak.”—Sarah.

Laglagipem: Ti panangusarmo iti teknolohia ket mabalin a makatulong wenno mangdadael iti relasionyo nga agassawa.

Ti mabalinmo nga aramiden

Panunotem dagiti prioridadmo. Kuna ti Biblia: ‘Siguraduenyo ti napatpateg a bambanag.’ (Filipos 1:10) Isaludsodmo iti bagim, ‘Ad-adu kadi ti orasmi nga agassawa kadagiti gadyetmi ngem iti orasmi iti maysa ken maysa?’

“Makapaladingit a makita ti agassawa nga agpada nga agselselpon bayat a mangmanganda iti restawran. Ditay kayat a sobra ti panangusartayo iti teknolohia nga uray la malipatantayon ti kapatgan—ti relasiontayo iti asawatayo.”—Matthew.

Limitaram. Kuna ti Biblia: “Itultuloyyo ti agannad a naimbag a ti pannagnayo ket saan a kas kadagiti maag no di ket kas kadagiti masirib, nga usarenyo ti tiempoyo iti kasayaatan a pamay-an.” (Efeso 5:15, 16) Isaludsodmo iti bagim, ‘Mabalin kadi a mangyeskediulak iti oras a mangbasa ken mangsungbat kadagiti teks wenno e-mail a saan nga agap-apura, imbes a basaek amin dagita kada sumangpet?’

“Nakitak a makatulong no i-silent-ko ti cell phone-ko, sako sungbatan dagiti teks inton addan wayak. Manmano met ketdi nga adda tawag, teks, wenno e-mail a masapul a masungbatan a dagus.”—Jonathan.

No posible, ibatim ti trabahom iti pagtrabahuan. Kuna ti Biblia: “Adda tiempo ti tunggal banag.” (Eclesiastes 3:1) Isaludsodmo iti bagim: ‘Ipalpalubosko kadi a ti trabahok ti mangistorbo iti pamiliak gapu iti kaseselponko uray no nakaawidakon tapno aramidek dagiti banag a konektado iti trabahok? No wen, ania ti epektona iti relasionmi nga agassawa? Ania ti makuna ti asawak?’

“Gapu iti teknolohia, mabalintayon ti agtrabaho iti aniaman nga oras. Ikagkagumaak a saanko a sangkakita ti selponko ken asikasuen dagiti trabahok no kaduak ni misis.”—Matthew.

Pagsaritaanyo nga agassawa no kasanoyo nga usaren ti teknolohia. Kuna ti Biblia: “Itultuloy koma ti tunggal maysa a sapulen ti pagimbagan ti sabali, saan a ti bukodna a pagimbagan.” (1 Corinto 10:24) Pagsaritaanyo nga agassawa no kasano ti panangusar ti tunggal maysa kadakayo iti teknolohia ken no ania dagiti masapul a balbaliwanyo, no adda man. Mabalinyo nga usaren ti salsaludsod a pagsaritaan iti daytoy nga artikulo.

“Maibagak ti amin ken lakayko ket kasta met isuna kaniak, isu a makapagbinnagakami no sobra ti panangusarmi iti gadyetmi. Ammomi a posible nga agbalin a problema dayta, isu nga ikabilanganmi a naimbag ti kapanunotan ti tunggal maysa.”—Danielle.

Laglagipem: Siguraduem a sika ti mangkontrol iti teknolohia, imbes a sika ti kontrolenna.