Kasanoka nga Agdesision?
‘Ti uniberso ket naggapu iti awan; basta nagadda lattan dayta.’ —Stephen Hawking ken Leonard Mlodinow, agpada a physicist, 2010.
“Idi punganay, pinarsua ti Dios ti lubong.”—Ti Baro a Naimbag a Damag Biblia, Genesis 1:1.
Pinarsua kadi ti Dios ti uniberso ken ti amin a biag nga adda iti dayta, wenno basta nagaddada lattan? Ipakita ti imbaga ti dua a physicist iti daytoy nga artikulo ken ti sasao ti umuna a bersikulo ti Biblia nga adda dua nga agkontra a sungbat iti dayta a saludsod. Agpada nga adda dagiti kombinsido kadagita a dua a sungbat. Ngem adu ti saan a sigurado. Pagdedebateanda dayta kadagiti popular a libro ken iti media.
Baka insuro dagiti titsermo a basta nagadda lattan ti uniberso ken ti amin a biag nga adda iti dayta, nga awan ti Namarsua kadagita. Ngem adda kadi impakitada nga ebidensia a talaga nga awan Namarsua? Wenno mabalin a nangnangngegmo met nga isursuro dagiti lider ti relihion nga adda Namarsua. Ngem adda kadi ebidensiada a husto ti ibagbagada, wenno basta imbagada lattan a masapul a mamatika?
Mabalin a napampanunotmo metten dayta a saludsod. Ngem baka mariknam nga awan a talaga ti makaibaga no adda Namarsua. Ken mabalin a maisaludsodmo pay: Importante kadi a maammuak ti sungbat?
Ipakita daytoy a ruar ti Agriingkayo! dagiti kinapudno a nangkombinsir iti adu nga adda Namarsua. Ilawlawagna met no apay nga importante a maammuantayo ti nangrugian ti biag.