Pannakakayaw Idiay Babilonia Inggana ti Panangbangon Manen ti Bakud ti Jerusalem

Bayat ti kaaddada idiay Babilonia, adut’ nakasuotan dagiti Israelitas iti pammatida. Ni Sidrac, Misac ken Abdenago ti naipalladawda iti umapapuy nga urno, ngem inruar ida ti Dios a sibibiag. Kalpasanna, ni Daniel ti naipalladaw met iti rukib dagiti leon, ngem isu met ti sinalakniban ti Dios.

Iti kamaudiananna, ti ari ti Persia a ni Ciro winayawayaanna dagiti Israelitas. Nagsublida idiay ilida kalpasan la unay ti 70 a tawen a pannakakayawda. Dagdagus, rinugianda a bangonen ti templo ni Jehova. Nupay kasta, gaput’ panangsinga dagiti kabusorda, sa la nalpas daytoy a trabaho agarup 22 a tawtawen iti kamaudianna.

Sumaganad, maammuantay ti panagsubli ni Esdras idiay Jerusalem a mangpapintas iti templo, 47 a tawen kalpasan a makompleto. Sa, 13 a tawtawen kamaudiananna, timmulong ni Nehemias a mangbangon kadagiti bakud ti Jerusalem a nadadael. Ti Paset SINKO saklawenna ti 152 a tawtawen ti historia agingga iti daytoy.