Ni Jesus Nagsubli Idiay Langit

BAYAT a naglabas dagiti al-aldaw, nagparang ni Jesus kadagiti paspasurotna iti adu a daras. Naminsan 500 ti nakakita kenkuana. No agparang kadakuada, agsao maipapan ti pagarian ti Dios. Ni Jehova imbaonna ni Jesus ditoy daga a mangisuro maipapan ti Pagarian. Ket intultuloyna daytoy uray kalpasan panagungarna manipud kadagiti natay.

Laglagipem, a ti Pagarian ket pudno a gobierno ti Dios idiay langit, ket ni Jesus ti pinili ti Dios kas ari. Kas naammuantayon, impakita ni Jesus nga isut’ nakaskasdaaw nga ari babaen ti panangpakanna kadagiti mabisin, pinaimbagna dagiti masakit, ken pinagungarna pay dagiti natay.

Inton agturayen ni Jesus kas ari idiay langit iti sangaribo a tawen, anianto ti kasasaad ditoy daga? Wen, ti intero a daga agbalinton a napintas a paraiso. Awanton ti gubat, wenno krimen, sakit, wenno uray ipapatay.

Itan dimtengen ti oras nga agsublin ni Jesus idiay langit. Nagparparangen ni Jesus kadagiti adalanna iti 40 nga al-aldaw, ket siguradodan nga isut’ sibibiag. Sakbay a pinanawan ni Jesus ida, imbagana nga agtalinaedda idiay Jerusalem inggana nga awatenda ti nasantuan nga espiritu. Ti nasantuan nga espiritu ket isut’ aktibo a puersa ti Dios a mangtulong kadagiti pasurotna a mangaramid ti pagayatan ti Dios. Kamaudiananna, kuna ni Jesus: ‘Ikaskasabadakto agingga kadagiti adayo nga ungto ti daga.’

Itan, maysa a nakaskasdaaw a banag ti napasamak. Inrugin ni Jesus ti agpalangit, kas makitam ditoy. Ket maysa nga ulep ti nangilingeden kenkuana, ket dagiti adalanna didanto makita ni Jesus manen. Napanen ni Jesus idiay langit, ket isut’ nagturayen kadagiti paspasurotna ditoy daga manipud idiay.