Kapitulo 21—Pannakailasat Agturong ti Baro a Daga
Nabara a Panangabrasa Kadagidiay Agsubli
1. Ania a kita dagiti tattao ti masalsalaysay iti daytoy a kapitulo?
Adda adu a tattao nga iti naminsan nakaammon iti kinapudno ti Biblia ket naammuandan a ni Jehova ti pudno a Dios ken naawatandan ti maipapan kadagiti pangpanggepna. Nupay saanda a Saksi ni Jehova, mabalin a nakipagadalda iti Biblia a kadua dagiti Saksi ni Jehova. Wenno nalabit Saksi dagiti dadakkelda. Adu kadagitoy ti nakatabunon kadagiti dadduma a gimgimong idiay Kingdom Hall. Mabalin a nakipasetda pay iti panangiraman iti mensahe ti Pagarian kadagiti sabsabali. Ngem saanda nga impaay ti biagda iti panangaramid iti pagayatan ti Dios. Apay a saan?
2. (a) Apay nga immadayuda iti organisasion ni Jehova? (b) Apay a nangrugi a tinarigagayanda ti panagsubli manen?
2 Ti lubong mangipaay iti pakaawisan a pagarupenda a tarigagayanda, bambanag a mariknada nga ad-adda a mangparagsak iti biagda, ket umadayuda iti organisasion ni Jehova iti panangsapulda kadagita a bambanag. Kabayatanna, nupay kasta, dadduma kadagitoy ti makabigbig a saanda a nasarakan ti kita ti biag a ninamnamada. Nariingda iti kinapudno nga agtultuloy a di nagbalbaliw ti kasasaadda, ket mapukawda a kadua ti lubong. Saanda a nalipatan ti kinatalged ken ti naespirituan a kinawadwad iti “balay” ni Jehova, ket kayatda manen ti maadda sadiay. Ngem awatento aya ida ni Jehova?
TI NAYAW-AWAN NGA ANAK
3. (a) Iti pangngarig ti naiyaw-awan nga anak, ania a deskripsion ti inted ni Jesus iti umasping a kasasaad? (b) Asino ti inladawan ti ama?
3 Ti sungbat ti impamatmat ni Jesus iti nalatak a pangngarigna maipapan iti naiyaw-awan nga anak. Kas maysa nga ilustrasion, sinarita ni Jesus ti maipapan iti maysa a tao nga addaan dua nga annak a lallaki. Ti inaudi dinawatna ken amana ti pasetna iti sanikua. Idi nagun-odannan daytoy, napan iti adayu a daga, ket idiay dinadadaelna ti kukuana ket nagbiag a nakadakdakes. Ngarud isut’ naiyaw-awan. Idi napasamak ti dakkel a bisin iti dayta a daga, ti agtutubo, gaput’ kasapulanna unay, ti napilit nga agtaraken kadagiti baboy, ngem di pay mapalubosan a mangan iti kanen ti baboy. Natignay gapu iti parikut a nangringbaw kenkuana, isut’ nakapanunot. Linagipna ti nagsayaatan a biag uray pay dagiti mangmangged iti balay ni amana, ket inkeddengna ti agsubli. Bigbigenna ti panagbasolna ket dawatenna ti pannakaawatna manen, saan a kas anak, no di ket kas mangmangged nga adipen. (Lucas 15:11-19) Ngem kalpasan dagiti amin a bambanag nga inaramidna, awatento kadi manen ti amana? Kasano ti panangmatmat ni Jehova, isu a nangiladawan iti ama iti daytoy a pangngarig, iti kasta a tao?
4. Kasano ti panangawat ti ama iti anakna idi nagsubli daytoy?
4 Iti nalawag a panangiladawan ni Jehova iti riknana iti dayta a banag, intuloy a kinuna ni Jesus: “Ngem idi adayu pay laeng [ti inaudi nga anakna], nakita ni amana ket simnek ti kaasina, ket timmaray ket inappungolna ti tengngedna, ket inag-agkanna. Ket di anak kinunana kenkuana, ‘Ama, nakabasolak iti maikaniwas ti langit ken iti sanguanam. Diak maikarin a managan ti anakmo. Itudingnak a mangmanggedmo.’ Ngem ni amana kinunana kadagiti adipenna, ‘Alaenyo iti madaras! ti kapatgan a pagan-anay ket kawesanyo, ket ikabilyo ti maysa a singsing iti imana, ken sapatos kadagiti saksakana. Ket iyegyo ti baka a napalukmeg, ket partienyo ket mangantayo ket agragsaktayo, ta daytoy anakko natay ket nagungar; napukaw ket nasarakan.’ Ket nangrugida a nagrarambak.”—Lucas 15:20-24.
KASANO NGA AGAPLIKAR TI PANGNGARIG ITATTA?
5. (a) Sino ti inladawan ti inauna nga anak iti pangngarig ni Jesus? (b) Sino, ngarud, ti inladawan ti inaudi nga anak, ti naiyaw-awan nga anak?
5 Iti daytoy nga ilustrasion ti inauna, maitutop a katupag “ti kongregasion dagiti inauna a nailnad ti nagnaganda idiay langit.” (Hebreo 12:23) Ti ngay inaudi nga anak? Dayta irepresentarna ti maysa a grupo a saan a ti “bassit nga ipastoran” nga addaan iti nailangitan a namnama. Saan nga amin dagiti “sabsabali a karnero” maibagayda iti deskripsion ti inaudi nga anak, ngem dadduma ti maibagay iti dayta. Uray pay sakbay ti nakalawlawag a pannakaurnong ti “sabsabali a karnero,” a nangrugi idi 1935, addada dagiti tattao a makaammo a ni Jehova ti kakaisuna a pudno a Dios. Ammoda ti namnama iti naindagaan a biag iti sidong ti Pagarianna, ket dida pinanunot ti panagbalinda a kameng “ti kongregasion dagiti inauna” nga addaan iti nailangitan a namnama. Ngem imbes nga ipaayda ti bagbagida iti panagserbi ken Jehova, naipamaysada kadagiti nailubongan nga ar-aramid. Innalada ti “pamay-an ti panagbiag” nga inted ti Dios kadakuada, ti panawen ken ti biag nga impalubosna a maadda kadakuada, ket inusarda dagitoy a maipaay iti inaagum a pagimbaganda met laeng. Ngem idi 1935 idi damo unay a naawatan dagiti ad-adipen ni Jehova ti kasasaad ti “dakkel a bunggoy,” adu ti katupag ti inaudi nga anak a naimpusuan a nangipaay iti bagbagida iti panagserbi iti balay ti Ama. Dayta ti panawen ti panagrag-o kas ti dineskribir ni Jesus iti pangngarigna.
6. Iti kaitungpalan, kasano a dadduma a tattao mangiparangarangda iti kababalin ti inauna nga anak, ngem pudno kadi dayta kadagiti amin a natda?
6 Pudno nga, iti dayta a tiempo, saan nga isuamin nakiraman iti daytoy a panagrag-o iti isasangpet ti klase nga inladawan ti inaudi nga anak. Iti pangngarigna impamatmat ni Jesus a daytoy ti mapasamak. Ngem saan nga amin dagiti natda iti “bassit nga ipastoran” nangipakita iti kasta nga espiritu, ket iti ilustrasionna binaybay-an ni Jesus a silulukat ti dalan uray pay kadagidiay a di naay-ayo idi damo, a makiraman iti dayta a rag-o ni Jehova a mismo idi dagita a managbasol pudno a nagbabawida.—Lucas 15:7, 10, 25-32.
7, 8. (a) Kadagiti nabibiit pay a tawtawen, ania ti nangiyadayu kadagiti dadduma iti sangakabbalayan ni Jehova? (b) Kadagiti ania a pamay-an a dadduma nariknada ti kas iti naiyaw-awan nga anak? (c) Apay a masapul nga agsublida?
7 Nanipud kadagidiay a paspasamak idi agtengnga a 1930’s, nupay kasta, dadduma ti nakabigbig, met, nga iti dadduma a pamay-an kasda la iti naiyaw-awan nga anak. Ammoda a naimbag ti naespirituan a sangakabbalayan ni Jehova, ti makitkita nga organisasionna, ngem ti pamay-an ti panagbiagda ti nangiyadayu kadakuada iti dayta, a kasla iti “adayu a daga.” Saanda a binusbusor dagiti ad-adipen ni Jehova, ngem ti bukodda a pamay-an ti panagbiag saan a maitunos iti pagalagadan ti Sao ti Dios. Mabalin nga imbangonda ti intero a panagbiagda iti aglawlaw ti sekular a trabahoda ket dida impatpateg ti obligasionda iti sanguanan ti Dios ken ti kinarikut ti tiempo a pagbibiagantayo. Dadduma ti nasaktan ti nakemda kadagiti kinaimperpekto dagiti dadduma a nainaig iti kongregasion ket dida siaanus a naguray ken Jehova a mangkorehir kadagiti bambanag. Ngem iti ania a kasasaad ti nakagtengan amin dagitoy idi insinada ti bagbagida manipud iti sangakabbalayan ti pammati?
8 Kabayatanna, dadduma ti nakabigbig a nagbalindan a nakapangpanglaw iti naespirituan. Makitada nga aniaman nga apagkanito a ragsakda di makaipaay iti napaut a ragsak kadakuada. Masarakanda met a ti pamay-an ti panagbiagda adda epektona iti pisikal, emosional ken naespirituan. Mariknada ti kinaawan mamaay ti biagda, a kas kadagiti amin a di makaammo iti Dios ken awanan namnama. (Efeso 2:12) Mabigbigda a ti kakaisuna a tiempo a naragsakda isu idi addada iti “balay” ni Jehova. Kayatda ti agsubli. Agsublida kadi? Ania ti posible a gunggona ti panagtultuloy itoy a nakapangpanglaw a kasasaad? Mabalin a napeggad ti panagtaktak. No agtalinaedda iti lubong, no madadael dayta mapukawda ti biagda.
9. (a) Apay a tarigagayan ni Jehova a dagita a tattao agsublida? (Ezequiel 18:23) (b) Ania ti kasapulan iti biangda?
9 Ngem dagita kadi a tattao makasublida? Sibabara nga inawis ida ni Jehova nga agsubli, ket ti makitkita nga organisasionna siaayat a nangipaay iti tulong kadagidiay a nangaramid iti kasta. (Zacarias 1:3, 4) Ania ti kasapulan? Kas naipakita iti pangngarig ni Jesus, masapul a mabigbigda, aramidenda ti panagsubli ken bigbigenda a nagbasolda iti Dios. No nagaramidda kadagiti dakes a di nakristianuan a kababalin, masapul a mangipaayda iti makakumbinsir a pammaneknek kadagiti panglakayen a pinanawandan dayta a pamay-an ti panagbiag ket sipapasnek a nagbabawida. Ti napasnek a tarigagayda masapul a ti panagserbin ken Jehova kas paset ti makitkita nga organisasionna. (Lucas 15:18-21; Proverbio 28:13) No pudno a dayta ti adda iti pusoda, makasiguradoda a ti panangpanawda kadagiti dakes nga ar-aramid ken pampanunotda ken panagsublida ken Jehova mangyegto iti dakkel a rag-o. (Isaias 55:7) Nupay kasta, tapno ti rag-oda lab-awanna ti ragsak ti nabara a pannakaawat manen idiay Kingdom Hall, masapul ti nasayaat a naespirituan a pannakaibangon manen.
PANANGIBANGON ITI NASAYAAT A PAMUON
10. (a) Ania a kababalin ti patauden dagiti agbabawi kadagiti bambanag a sapulen ni Jehova? (b) Kasano a masukayanda ti nasinged a personal a relasion ken Jehova?
10 Nangnangruna a napateg para iti siasinoman nga agsubli iti sangakabbalayan ni Jehova ti pannakaammo a naimbag kadagiti nadumaduma a kasasaad ti personalidad ni Jehova ken ti panangpataud iti nasinged a personal a relasion kenkuana. Masapul a mabigbigda a ti laeng sapulen ni Jehova kadatayo isu ti pudno a pakagunggonaantayo. Dagiti bilbilinna dida ikkaten ti ragsaktayo iti panagbiag, no di ket, salwadannatayo iti panagaramid kadagiti bambanag a mabalin a mangiyeg iti apagkanito a ragsak ngem mangiturong iti napait a pagbanagan. (Isaias 48:17; Galacia 6:7, 8) No disiplinaennatayo, dayta ket gapu ta inay-ayatnatayo. (Proverbio 3:11, 12) Ti personal a panagadal a mapasarunuan iti panangmennamenna iti naammuan, ti napasnek a panagkararag ken ti regular a pannakigimong ti makatulongto kadatayo a mangipaay iti naan-anay a panagtalektayo ken ni Jehova, ti panagpannuraytayo kenkuana maipaay iti panangiturong iti aniaman nga aramidentayo.—Proverbio 3:5, 6.
11. Kasano a dagidiay nga immadayu natulonganda babaen ti (a) panangpataud iti pananggura iti kinadakes? (b) ti panangsapul iti pannakaawat? (c) ti pannakitunos iti panangiyaplikar kadagiti nadiosan a pagalagadan? (d) ti panangsuro a mangpanunot iti pagbanagan ti aniaman a planotayo nga aramiden? (e) ti panangipakita iti naayat a pannakaseknan kadagiti sabsabali?
11 Dagidiay a simmina mabalin a naammuanda no ania ti umiso ken no ania ti dakes. Ngem itan masapul a pataudenda ti pananggura iti dakes ken masapul nga itultuloyda nga aramiden ti kasta bayat nga adda dayta iti aglawlawda. (Salmo 97:10) Matulongandanto iti daytoy no sapulenda saan laeng a ti pannakaammo no di ket ti met pannakaawat. Umuna ngem amin, daytoy ramanenna ti panangmatmat kadagiti bambanag a mainaig iti Dios. Masapul a bigbigentayo dagiti nadumaduma a pamay-an ti panangisurona kadatayo ken no kasano a ti panagtignaytayo iti balakadna apektaranna ti relasiontayo kenkuana. (Proverbio 4:7; 9:10) Masapul nga apresiarentayo ti kinapateg ti pannakitunos, nga iyaplikar dagiti pagalagadan ni Jehova iti amin a tiempo, iti isuamin a banag nga aramidentayo. (Tito 2:11, 12; 1 Tesalonica 4:7) Masapul met ti panagannadtayo a saantay laeng a panunoten ti apagkanito a ragsak no di ket no anianto ti pagbanagan ti pangngeddengtayo. (Idiligyo iti Proverbio 20:21; 23:17, 18; Hebreo 11:24-26.) Masapul met a siaayat a maseknantayo iti epekto dagiti sawentayo ken aramidentayo kadagiti dadduma.—Roma 15:1, 2.
12. (a) Ti pannakaammo ken ni Satanas ken dagiti pamay-anna makatulong a mangsalwad kadatayo? (b) Ania ti kasapulan tapno agballigitayo iti daytoy a pannakidangadang?
12 Kas Kristiano mapabilegtayo a naimbag babaen iti panangbigbig nga addatayo iti tengnga ti naespirituan a pannakigubat. Ti kangrunaan a kabusortayo isu ni Satanas a Diablo, agraman dagiti demoniona. Babaen iti amin a mabalin a pamay-an sapulenna ti panangisiasi kadatayo manipud iti nasken a trabaho iti Pagarian nga inted ni Jehova nga aramidentayo. Ti panggepna isu ti pananggargari kadatayo a mangidian kadagiti pagalagadan ni Jehova, ti panagbalin a paset iti lubong a pagturayanna. Ti pannulisogna masansan a makaawis iti gagangay a tarigagay (iti ragsak, pisikal a panagnam-ay, ayat ken panangipateg), ngem paregtaennatayo a mangipangpangruna iti dayta a tarigagay a mangdadael iti panggepda wenno mangpennek kadakuada iti di umiso a pamay-an. Babaen laeng ti panangikabaltayo iti naan-anay a naespirituan nga igam nga ipaay ti Dios nga agballigitayo iti daytoy a pannakidangadang a maipaay iti naespirituan a panagbiagtayo.—Efeso 6:11-18.
13. (a) Kasano a makasaraktayo iti inana kadagiti kararuatayo? (b) Apay a ti panagserbi ken Jehova kas panangtulad ken Kristo ti pudno a mangyeg kadatayo iti ragsak?
13 Kinuna ni Jesus a no umadanitayo kenkuana ket alaentayo ti “sangolna,” makasaraktayo iti inana a maipaay kadagiti kararuatayo. (Mateo 11:29, 30) Ti panangala iti “sangol” kaipapananna ti panagserbi. Ngem ti panagserbi ken Jehova kas panangtulad iti Anakna mangyeg iti pudno nga inana. Kasano? Agsipud ta dayta mangyeg iti pudno a wayawaya. Saantayon nga adipen ti basol, a naibalud iti dayta, nga aramidentayo dagiti bambanag a ditay rebbeng nga aramiden ken nalabit tarigagayantayo a ditay koma ar-aramiden. (Juan 8:32, 34-36) No ti Nakristianuan a personalidadtayo ket naibangon ken Jesu-Kristo kas ti pamuon, apresiarentayon ti pasetna iti panggep ni Jehova, umimdengtayo kenkuana ken agsurotayo kenkuana. Pagragsakanna ti mangaramid iti pagayatan ni Amana. Suruentayo met ti mangaramid iti dayta. (Juan 4:34; Salmo 40:8) Gapu iti panangipangagtayo iti moral a pagalagadan ti Dios tagiragsakentayto ti nadalus a konsiensia. Imbes nga agbiagtayo a maipaay iti bagitayo met laeng, mapadasantayo ti ragsak nga agtaud iti pannangted. (Aramid 20:35) Ti biag addaanto ti pudno a panggep agpaay kadatayo. Kangrunaan ngem amin, addanto rag-otayo iti pannakaammo nga addaantayo ti anamong ni Jehova met laeng, ti Ama dagiti amin a nagbalin nga annakna.—Proverbio 10:22.