Inaramidda ti Pagayatan ni Jehova

Ti Ama a Sisasagana a Mamakawan

MAAW-AWAGAN dayta kas ti kalatakan pay laeng nga ababa a sarita a naisurat​—ket maitutop dayta. Ti pangngarig ni Jesus maipapan iti ayat ti maysa nga ama iti napukaw nga anakna ket kasla tawa a pakaimatangantayo iti naisangsangayan nga asi ti Dios kadagiti managbasol nga agbabawi.

Napukaw Ngem Nasapulan Met Laeng

Adda dua nga annak a lalaki ti maysa a tao. Kinuna kenkuana ti inaudi: ‘Itedmon ti tawidko, imbes nga urayek pay ti ipapataymo.’ Immannugot ti ama, a nalabit intedna kenkuana ti kakatlo ti amin a sanikuana​—ti legal a pannakabági ti inaudi kadagiti dua nga annak. (Deuteronomio 21:17) Inurnong a dagus ti agtutubo ti kukuana sa napan iti adayo a lugar ket sadiay binusbosna amin a kuartana iti nakadakdakes a panagbiag.​—Lucas 15:11-13.

Kalpasanna dimteng ti nakaro a bisin. Gapu ta marigatan unayen, nagtrabaho ti agtutubo kas agtartaraken kadagiti baboy​—trabaho a karugit ti maysa a Judio. (Levitico 11:7, 8) Nakirang unay ti taraon ket kayatna koman ti mangan iti algarroba a kanen dagiti baboy! Kamaudiananna, nakapanunot met laeng ti agtutubo. ‘Imbag pay dagiti adipen ni amak ta agsobsobraanda iti taraon!’ kinunana iti nakemna. ‘Agsubliak ketdi, ipudnok dagiti basolko, sa ipakpakaasik ken amak nga ibilangnak a kas maysa kadagiti tangtangdananna.’a​—Lucas 15:14-19.

Nagnagna a nagawid ti agtutubo. Awan duadua a dakkel ti namalbaliwan ti langana. Ngem nailasin ni amana “bayat nga isu adayo pay laeng.” Simnek ti asina ket timmaray a simmabat iti anakna, inapungolna, sana ‘inagkan a sidudungngo.’​—Lucas 15:20.

Ti kastoy a nabara a panangabrasa ti namagbalin a nalaklaka para iti agtutubo a mangipeksa iti dagensenna. “Ama,” kinunana, “nagbasolak a maibusor iti langit ken maibusor kenka. Diak maikarin a maawagan ti anakmo. Aramidennak a kas maysa kadagiti patangtangdanan a tattaom.” Inayaban ti ama dagiti adipenna. “Darasenyo!” imbilinna. “Mangiruarkayo iti pagan-anay, ti kasayaatan, ket isu kawesanyo iti dayta, ket mangikabilkayo iti maysa a singsing iti imana ken palluka kadagiti sakana. Ket iyegyo ti pinalukmeg nga urbon a toro, partienyo dayta ket mangantayo ken agragragsaktayo, agsipud ta daytoy nga anakko natay ket nagbiag manen; napukaw ket nasarakan.”​—Lucas 15:21-24.

Naangay ti engrande a padaya, nga adda toktokar ken salsala. Adda idi ti inauna nga anak idiay taltalon, ket idi agawid nangngegna ti ariwawa. Idi naammuanna a nagsublin ti kabsatna a nakaipuonan daytoy a rambak, kasta unay ti pungtotna. ‘Adu a tawen a nagpaadipenak kenka, ket pulos a dika sinukir, ngem dinak la inikkan iti urbon a kalding a pakipagragragsakko kadagiti gagayyemko,’ inreklamona ken amana. ‘Ngem ita ta nagsublin daytoy nga anakmo a nangsayang iti kinabaknangmo, pinadayaam ketdin.’ ‘Anak,’ sidudungngo a kinuna ni amana, ‘addaka a kankanayon kaniak, ket kukuam amin a kukuak. Ngem masapul nga agragsaktayo agsipud ta natay ti kabsatmo ngem nagungar. Napukaw ngem nasapulan met laeng.’​—Lucas 15:25-32.

Ti Maadaltayo

Ti ama iti pangngarig ni Jesus irepresentarna ti naasi a Diostayo, ni Jehova. Kas iti napukaw nga anak, adda panawen a panawan ti sumagmamano a tattao ti natalged a sangakabbalayan ti Dios ngem agsublidanto met laeng. Kasano ti panangmatmat ni Jehova iti kakasta a tattao? Dagidiay agsubli ken Jehova a sipapasnek nga agbabawi makapagtalekda nga isu ket “saanto a kankanayon a mangbabalaw; ket dinanto met ing-ingpen a kanayon ti pungtotna.” (Salmo 103:9) Iti pangngarig, timmaray ti ama a simmabat iti anakna. Umasping iti dayta, saan laeng a madadaan no di ket magagaran ni Jehova a mangpakawan kadagiti managbasol nga agbabawi. “Sisasagana a mamakawan,” ket aramidenna dayta “iti nawadwad.”​—Salmo 86:5; Isaias 55:7; Zacarias 1:3.

Iti pangngarig ni Jesus, ti napudno nga ayat ti ama ti namagbalin a nalaklaka para iti anak a maaddaan iti tured nga agsubli. Ngem panunotenyo: Ania ngata ti napasamak no inlaksid ti ama ti anakna wenno imbugkawna a saanen nga agsubsubli? No inaramidna ti kasta, mabalin a saanen a pulos nagpakpakita ti agtutubo.​—Idiligyo ti 2 Corinto 2:6, 7.

Ngarud, no an-anagen, inwayaan ti ama ti panagsubli ti anakna idi a pumanaw. No dadduma, dagiti Kristiano a panglakayen ita kasapulan nga ilaksidda iti kongregasion dagiti nakabasol a saan nga agbabawi. (1 Corinto 5:11, 13) Iti panangaramidda iti kasta, mabalinda nga iwayaan ti panagsubli ti nakabasol babaen ti siaayat a panangilawlawagda no ania dagiti addang a mabalinna nga aramiden no mapanunotnanto ti agsubli. Iti pannakalagipda iti kasta a naimpusuan a panagpakaasi, adu dagiti napukaw iti naespirituan a natignay idi kamaudianna nga agbabawi ken agsubli iti sangakabbalayan ti Dios.​—2 Timoteo 4:2.

Impakita met ti ama ti asi idi a nagsubli ti anakna. Nadlawna a dagus ti napasnek a panagbabawi ti anakna. Kalpasanna, imbes nga ipasaggaysana iti anakna dagiti basolna, inabrasana nga awanen ti adu a sao, ket pagragsakanna nga inaramid dayta. Mabalin a tuladen daytoy dagiti Kristiano. Rebbeng nga agrag-oda no masapulan met laeng ti napukaw.​—Lucas 15:10.

Nalawag nga ipamatmat ti kababalin ti ama a nabayagen nga inur-urayna ti panagsubli ti nayaw-awan nga anakna. Siempre, iladladawan laeng dayta ti panangiliw ni Jehova kadagiti amin a nangpanaw iti sangakabbalayanna. “Saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.” (2 Pedro 3:9) Ngarud, dagidiay agbabawi kadagiti basolda mainanamada a maparaburanda iti “panawen ti pannakabang-ar . . . manipud iti persona ni Jehova.”​—Aramid 3:19.

[Footnote]