Aborsion
Kayuloganna: Ti aborsion isut’ panangikkat iti sikog wenno alis a no gagangay dina kabaelan ti agbiag iti ruar ti aanakan. Ti di ginagara nga aborsion wenno pannakaalis mabalin a maigapu iti kinaimperpekto ti tao wenno gapu iti aksidente. Ti inranta nga aborsion tapno maikkat ti inlimlimed a sikog isut’ sipapakinakem a panangkettel iti natauan a biag.
Kasano a ti Gubuayan ti natauan a biag ket apektaranna ti panangmatmattayo itoy a banag?
Ara. 17:28: “Ta kenkuana [iti Dios] agbiagtayo ken aggunaytayo ken addatayo.”
Sal. 36:9: “Ta adda kenka [Jehova a Dios] ti ubbog ti biag.”
Roma 14:12: “Tunggal maysa kadatayo idatagnanto iti Dios ti kinaisuna met laeng.”
Napateg kadi ken Jehova ti biag ti maysa nga ubing uray no di pay unay nabayag ti pannakaisikogna?
Sal. 139:13-16: “Sika [Jehova] ti nangbungon kaniak idiay aanakan ni inak. . . . Dagiti matam nakitada daydi bagik a di pay nabukel, ket ita librom naisurat aminen a pasetna.”
Imbaga kadi ti Dios nga adda madusa no madangran ti di pay naipasngay nga ubing?
Ex. 21:22, 23: “No dagiti tattao agriringgorda ket makabilda ti maysa a babai a masikog ket iti kasta maipasngay dagiti annakna ngem awan ti naipusay, di bumurong a mamultanto kas mayalubog iti ipatay ti makinkukua iti babai; ket bayadannanto a kas ituding dagiti ukom. Ngem no adda naipusay, itdemto ngarud ti kararua iti kararua.” (Dagiti dadduma nga agipatpatarus pagparangenda a sigun iti daytoy a linteg iti Israel daydiay napasamak iti ina isu ti nasken, saan ket nga iti daydiay sikogna. Ti orihinal a texto ti Hebreo, nupay kasta, tukoyenna ti pannakaipusay ti ina wenno ti ubing.)
Kasano ti kaseriosona ti panangkettel iti natauan a biag a maipuon iti rason a di met inautorisaran ti Dios?
Gen. 9:6: “Ti mangibukbok iti dara ti tao, ti darana ibuyatto ti tao, ta ti Dios inaramidna ti tao a ladawanna.”
1 Juan 3:15: “Awan ti manangpapatay nga adda biagna nga agnanayon nga agtaeng kenkuana.”
Ex. 20:13: “Dika mamapatay.”
Ti opinion ti doktor a ti salun-at ti ina ket madangran no di maikkat ti sikogna isu ngata ti mamagbalin iti aborsion a nainkalintegan?
No dadduma agkamali dagiti medikal nga opinion. Nainkalintegan ngata a papatayem ti padam a tao gapu ta nalabit isu ket makadangran iti padana? Inton oras ti panagpasngay ta kasapulan a pilien no ti biag ti ina wenno ti ubing ti masapul a salbaren, dagidiay indibidual a maseknan isuda ti masapul a mangeddeng. Nupay kasta, mammano a mapasamak daytoy gapu iti kinamoderno dagiti medikal a pamuspusan kadagiti adu a daga.
No Adda Agkuna—
‘Ngem adda kalintegak a mangngeddeng no kadagiti banag a mangapektar iti bagik.’
Kunaenyo: ‘Maawatak ti riknayo. Masansan itatta nga ilupitlupit dagiti dadduma dagiti kalintegantayo; adut’ di mangikankano iti mapasamak iti padada a tao. Ngem ti Biblia mangted kadagiti prinsipio a manalaknib kadatayo. Tapno maparaborantayo, nupay kasta, masapul nga ibaklaytay met dagiti responsabilidadtayo.’ Sayonto inayon: (1) ‘Adu nga inna ti tinalawan dagidiay lallaki a nangputot kadagiti annakda. Ngem iti balay nga an-annuroten ti asawa a lalaki ken babai dagiti estandarte ti Biblia, ti lalaki talaga nga ayatennanto ti asawana ken dagiti annakna ket sisusungdonto a makipagtaeng ken mangsuportar kadakuada. (1 Tim. 5:8; Efe. 5:28-31)’ (2) ‘No personal a kayattayo nga awaten dayta a kita ti panagayat ken panagraem, masapul met nga iyaplikartayo dagiti estandarte ti Biblia no iti kababalintayo kadagidiay kameng ti pamiliatayo. Kasanot’ kunaen ti Biblia a panangmatmattay koma kadagiti annak a patpataudentayo? (Sal. 127:3; idiligyo ti Isaias 49:15.)’