Kapitulo 36
Ti Dakkel a Pammati ti Pangulo ti Buyot
IDI inted ni Jesus ti Sermonna idiay Bantay, nadanonnan ti kagudua ti ministeriona iti publiko. Kaipapanan daytoy nga agarup makatawen ken siam a bulan laengen ti nabati tapno maturposna ti trabahona ditoy daga.
Itan sumrek ni Jesus idiay siudad ti Capernaum, nga isut’ pagtataenganna maipaay kadagiti ar-aramidna. Ditoy dagiti panglakayen dagiti Judio immasidegda kenkuana nga addaan kalikagum. Isudat’ imbaon ti maysa a pangulo ti buyot Romano a maysa a Gentil, tao a naidumat pulina kadagiti Judio.
Ti ay-ayaten nga adipen ti pangulo dagiti buyot ket ngangnganin matay gaput’ nadagsen a panagsakit, ket kayatna a paimbagen ni Jesus ti adipenna. Nagpakpakaasi dagiti Judio a maipaay iti pangulo ti buyot: “Maikari nga ipaaymo kenkuana daytoy,” kunada, “ta ayatenna ti nasiontayo ket isu imbangonannatayo ti sinagogatayo.”
Awan panagalikaka, simmurot ni Jesus kadagiti lallaki. Nupay kasta, idi a makaasidegdan, ti pangulo ti buyot nagbaon kadagiti gagayyemna tapno ibagada: “Apo, saanka nga agbannogen, ta diak maikari a sumrekka iti uneg ti balayko. Siak pay diak impapan a maikariak nga umay kenka.”
Anian a nagpakumbaba nga ebkas para iti maysa a pangulo a nairuam a mangbilbilin kadagiti dadduma! Ngem nalabit pampanunotenna met ti maipapan ken ni Jesus, a pagaammona a ti kustombre iparitna ti maysa a Judio a maaddaan iti sosial a pannakilangen kadagiti di Judio. Uray pay ni Pedro kunana: “Ammoyo a dakes iti maysa a lalaki a Judio ti makitipon wenno umay iti sabali a nasion.”
Nalabit gapu ta kayatna a di agsagaba ni Jesus kadagiti ibunga ti panangsalungasing iti daytoy a kustombre, imbaon ti pangulo dagiti gagayyemna tapno kiddawenda kenkuana: “Ngem agsaoka laeng, ket ti adipenko umimbagto. Ta siak idinto a taoak a naisaad iti babaen ti turay adda met iturayak a solsoldado, ket kunak itoy, ‘Inka!’ ket mapan, ket iti sabali, ‘Umayka!’ ket umay, ket iti adipenko, ‘Aramidem daytoy!’ ket aramidenna.”
Idi mangngeg ni Jesus daytoy, nagsiddaaw. “Kunak kadakayo,” kunana, “nga uray iti Israel diak pay nakasarak ti kastoy a kadakkel ti pammati.” Kalpasan ti panangagasna iti adipen ti pangulo, inusar ni Jesus ti okasion a mangisalaysay no kasano a dagiti di Judio nga addaan pammati maparaburandanto ti bendision nga inlaksid dagiti awanan pammati a Judio.
“Adu,” kuna ni Jesus, “dagiti umayto nga aggapu iti daya ken laud ken makikatugawdanto ken Abraham ken Isaac ken Jacob iti pagarian ti langit; ngem dagiti annak ti pagarian maibellengdanto iti sipnget iti ruar. Idiay addanto panagdung-aw ken panagngaretnget dagiti ngipen.”
“Dagiti annak ti pagarian . . . a maibellengto iti sipnget iti ruar” isuda dagiti Judio iti lasag a di nangawat iti gundaway nga immuna a naitukon kadakuada nga agbalin nga agturay a kadua ni Kristo. Da Abraham, Isaac, ken Jacob irepresentarda ti urnos ti Pagarian ti Dios. Gapuna isalsalaysay ni Jesus no kasano a dagiti Gentil maabrasadanto a makilanglang iti nailangitan a lamisaan, ti kaiyariganna, “iti pagarian ti langit.” Lucas 7:1-10; Mateo 8:5-13; Aramid 10:28.
▪ Apay nga agpakpakaasi dagiti Judio maipaay iti maysa a pangulo ti buyot a Gentil?
▪ Aniat’ mabalin a mangilawlawag no apay a ti pangulo dina inimbitaran ni Jesus a sumrek iti balayna?
▪ Aniat’ kayat a sawen ni Jesus kadagiti pangserra a sasaona?