Ti Biag ken Ministerio ni Jesus

Ti Dakkel a Pammati ti Pangulo ti Buyot

IDI inted ni Jesus ti Sermonna idiay Bantay, nadanonnan ti kagudua ti punto iti ministeriona iti publiko. Kaipapanan daytoy nga agangay makatawen ken siam a bulan laengen ti nabati tapno maturposna ti trabahona ditoy daga.

Itan sumrek ni Jesus idiay siudad ti Capernaum, agarup nga isu ti pagtataenganna nga agpaay kadagiti ar-aramidna. Ditoy dagiti panglakayen dagiti Judio ti immasideg kenkuana nga addaan ti kalikagum. Isuda ti imbaon ti maysa a pangulo ti buyot Romano a maysa a Gentil.

Ti ay-ayaten nga adipen ti pangulo dagiti buyot ti ngangngani matay manipud iti nadagsen a panagsakit, ket kayatna a paimbagen ni Jesus ti adipenna. Nagpakpakaasi dagiti Judio a maipaay iti daytoy a pangulo ti buyot: “Maikari nga ipaaymo kenkuana daytoy,” kunana, “ta ayatenna ti nasiontayo ket isu imbangonannatayo ti sinagogatayo.”

Awan panagalikaka, simmurot ni Jesus kadagiti lallaki. Nupay kasta, idi a makaasidegdan, ti pangulo ti buyot ti nagbaon kadagiti gagayyemna nga agkuna: “Apo, saanka nga agbannogen, ta diak maikari a sumrekka iti uneg ti balayko. Siak pay diak impapan a maikariak nga umay kenka.”

Anian a nagpakumbaba nga ebkas para iti maysa a pangulo a nairuam a mangbilbilin kadagiti dadduma! Ngem nalabit pampanunotenna met ti maipapan ken ni Jesus, a pagaammona a ti kustombre ti mangiparit iti maysa nga Judio a maaddaan iti sosial a pannakilangen kadagiti di Judio. Uray pay ni Pedro kunana: “Ammoyo a dakes iti maysa a lalaki a Judio ti makitipon wenno umay iti sabali a nasion.”

Nalabit gapu ta kayatna a di agsagaba ni Jesus kadagiti ibunga ti panangsalungasing iti daytoy a kustombre, ti pangulo ti nangikalikagum kadagiti gagayyemna nga agkuna kenkuana: “Ngem agsaoka laeng, ket ti adipenko umimbagto. Ta siak idinto a taoak a naisaad iti babaen ti turay adda met iturayak a solsoldado, ket kunak itoy, ‘Inka!’ ket mapan, ket iti sabali, ‘Umayka! ket umay, ket iti adipenko, ‘Aramidem daytoy!’ ket aramidenna.”

Idi mangngeg ni Jesus daytoy isu ti nagsidaaw. “Kunak kadakayo,” kunana, “nga uray iti Israel diak pay nakasarak ti kastoy a kadakkel ti pammati.” Kalpasan ti panangagasna iti adipen ti pangulo, inusar ni Jesus ti okasion a mangisalaysay no kasano a dagiti di Judio nga addaan pammati maparaburandanto ti bendision nga isut’ inlaksid dagiti awanan pammati a Judio.

“Adu,” kuna ni Jesus, “dagiti umayto nga aggapu iti daya ken laud ken makikatugawdanto ken Abraham ken Isaac ken Jacob iti pagarian ti langit; ngem dagiti annak ti pagarian maibellengdanto iti sipnget iti ruar. Idiay addanto panagdung-aw ken panagngaretnget dagiti ngipen.”

Dagiti annak ti pagarian . . . a maibellengdanto iti sipnget iti ruar” ket isuda dagiti Judio iti lasag a di nangawat iti gundaway nga immuna a naitukon kadakuada nga agbalin nga agturay a kadua ni Kristo. Da Abraham, Isaac, ken Jacob irepresentarda ti urnos ti Pagarian ti Dios. Gapuna isalsalaysay ni Jesus no kasano a dagiti Gentil maabrasadanto a makilanglang iti nailangitan a lamisaan, ti kaiyariganna, “iti pagarian dagiti langlangit.” Lucas 7:1-10; Mateo 8:5-13; Aramid 10:28.

◆ Apay a nagpakpakaasi dagiti Judio a maipaay iti maysa a pangulo ti buyot a Gentil?

◆ Apay a ti pangulo nagdawat ken ni Jesus a saanen a sumrek iti balayna?

◆ Aniat’ kayat a sawen ni Jesus kadagiti pangserra a sasaona?